Sɔ̃ɔsiru 31

1Mɔwisi u kpam Isireliba gari yini sɔ̃ɔwa u nɛɛ, 2wee gisɔ na wɔ̃ɔ wunaa teeru mɔ, na ǹ maa kpɛ̃ n bɛɛ kpara. Yeniba kpuron biru, Yinni Gusunɔ u man sɔ̃ɔwa u nɛɛ, na ǹ Yuudɛni tɔburɔ. 3Adama win tiiwa u koo bɛɛ swaa gbiiya kpa u bwese ni nu wãa mi go kpa i nin tem mwa. Yosuewa u koo ko bɛɛn kparo nge mɛ wi, Yinni Gusunɔn tii u gerua. 4U koo bwese ni kam koosia nge mɛ u Amɔreban sinam beni, Sihoni ka Ogun tem kam koosia. 5U koo bɛɛ bu nɔmu bɛria kpa i bu kua nge mɛ na bɛɛ sɔ̃ɔwa. 6Yen sɔ̃, i tii dam kɛ̃ɛyɔ kpa i n wɔrugɔru mɔ. I ku nanda, i ku maa diiri ben wuswaaɔ. Domi Gusunɔ bɛsɛn Yinnin tiiwa u koo bɛɛ swaa gbiiya. U ǹ bɛɛ derimɔ, u ǹ maa bɛɛ biru kisimɔ. 7Yera Mɔwisi u Yosue soka u na Isireliba kpuron wuswaaɔ ma u nùn sɔ̃ɔwa u nɛɛ, a tii dam kɛ̃ɛyɔ kpa a n wɔrugɔru mɔ. Domi wuna kaa ka tɔn be da tem mɛ sɔɔ, mɛ Yinni Gusunɔ u ben baababa nɔɔ mwɛɛru kua ka bɔ̃ri. Wuna kaa bu mu bɔnu kua. 8Win tiiwa u koo nun swaa gbiiya kpa u n ka nun wãa. U ǹ nun biru kisimɔ, u ǹ maa nun derimɔ. Yen sɔ̃, a ku nanda, a ku maa de wunɛn tororu tu kara. 9Mɔwisi u wooda ye yorua ma u ye yãku kowobu Lefiban bweseru be ba ra Yinni Gusunɔn woodan kpakororu sɔbe ka Isireliban guro gurobu wɛ̃. 10U bu sɔ̃ɔwa u nɛɛ, wɔ̃ɔ nɔɔba yiru baayere yè sɔɔ ba ra be ba dibu nɛni kare, Kunun tɔ̃ɔ bakarun saa, 11sanam mɛ Isireliba kpuro ba mɛnna Yinni Gusunɔn wuswaaɔ batuma ye u gɔsa sɔɔ, saa yera kaa n da wooda ye kpuro gari bu nɔ. 12Be kpurowa kaa mɛnna, tɔn durɔbu ka tɔn kurɔbu ka bibu ka tɔn tukobu be ba wãa ka bɛɛ, bu ka woodan gari yi nɔ, kpa bu wa bu Gusunɔ bɛsɛn Yinni nasia kpa bu wooda ye kpuro mɛm nɔɔwa. 13Nge mɛya bɛɛn bii be ba ǹ wooda yen gari yɛ̃ ba koo ka ye nɔ, kpa bu Gusunɔ bɛsɛn Yinni nasia saa kpuro ye ko i n wãa tem mɛ sɔɔ, mɛ i ko i mwa ì n Yuudɛni tɔbura. 14Yinni Gusunɔ u Mɔwisi sɔ̃ɔwa u nɛɛ, wee tɔ̃ɔ te kaa gbi ta turuku kooma. Yen sɔ̃, a Yosue sokuma kpa i na i yɔ̃ra nɛn kuu bekurugii ten mi, mi na ra ka bɛɛ yinnɛ, kpa n Yosue sɔ̃ ye u koo ko. Ma Mɔwisi ka Yosue ba da ba yɔ̃ra kuu ten mi. 15Miya Yinni Gusunɔ u bu kure guru wii wuroru sɔɔ. Ma guru wii wuro te, ta da ta yɔ̃ra kuu ten kɔnnɔwɔ. 16Yinni Gusunɔ u Mɔwisi sɔ̃ɔwa u nɛɛ, wee kaa wura a wunɛn sikadoba deema. Wunɛn biru, Isireliba ba koo man deri kpa bu nɛn arukawani kusia ye na ka bu bɔkua kpa bu da bu bũnu gasiri bu sã tem mi ba duɔ mi sɔɔ. 17Yen tɔ̃ɔ te, kon ka bu mɔru ko kpa n bu biru kisi n bu deri. Ba koo kam kowa. Wahala ka nɔni swãa dabinu koo bu deema. Saa ye sɔɔra ba koo tii sɔ̃ bu nɛɛ, nɛ, Gusunɔ ben Yinni na ǹ wãa ben suunu sɔɔ, yen sɔ̃na wahala yeni ya bu deemamɔ. 18Ka gem nɛ, Yinni Gusunɔ kon bu biru kisi n bu deri. Domi ba kɔ̃sa kua ba bũnu sãwa. 19Tɛ̃, a womu geni yoruo ga n sãa seeda nɛ ka Isireliban suunu sɔɔ. A bu womu ge sɔ̃ɔsio kpa ga n wãa ben nɔɔwɔ. 20Domi kon de bu du tem mɛ na gerua ka bɔ̃ri na nɛɛ, kon ben baababa wɛ̃ sɔɔ, mi tim ka bom mu kokumɔ. Ba koo di bu debu bu bɔria. Adama ba koo man torari bu nɛn arukawani kusia bu ben gɔ̃ru gɔsie bũnu ganun mi bu nu sã. 21Saa ye sɔɔ, wahala ka nɔni swãaru garu tà n maa seewa ben suunu sɔɔ, ben bibun bweseru ta koo womu ge yaaya kpa ga n sãa seeda. Na ben gɔ̃run gari yɛ̃ saa tɛ̃n di n sere mam bu duusia tem mɛ sɔɔ mɛ na bu nɔɔ mwɛɛru kua ka bɔ̃ri. 22Tɔ̃ɔ te sɔɔra Mɔwisi u womu ge yorua ma u gu Isireliba sɔ̃ɔsi. 23Yinni Gusunɔ u Yosue, Nunin bii wooda yeni wɛ̃ u nɛɛ, a de a tii dam kɛ̃ kpa a n wɔrugɔru mɔ. Domi wuna kaa Isireliba duusia tem mɛ sɔɔ, mɛ na bu nɔɔ mwɛɛru kua ka bɔ̃ri. Mɛya nɛn tii ko na n wãa ka wunɛ. 24Sanam mɛ Mɔwisi u wooda ye yorua tireru sɔɔ u kpa, 25yera u Lefiba be ba ra Yinni Gusunɔn woodan kpakororu sɔbe sɔ̃ɔwa u nɛɛ, 26i woodan tire teni suo kpa i tu yi kpakoro ten bɔkuɔ kpa ta n sãa seeda bɛɛn sɔ̃. 27Na bɛɛn swaa taabu yɛ̃. Domi i ra Yinni Gusunɔ seesi nɛn wuswaaɔ. Kaa ra sere gere nɛn gɔɔn biru? 28I bɛɛn bwese kɛrin guro gurobu ka bɛɛn tabu sinambu mɛnnama bu na nɛn mi. Kon gari yini gere bu yi nɔ. Kpa wɔllu ka tem mu n sãa nɛn seeda bɛɛn wuswaaɔ. 29Na yɛ̃ ma nɛn gɔɔn biru i ko wɔri durum sɔɔ. Kpa i swaa ye deri ye na bɛɛ sɔ̃ɔsi. Yen sɔ̃, wahala koo bɛɛ deema. Domi i ko kɔ̃sa ko i Yinni Gusunɔn mɔru seeya ka bwãaroku ni i seka. 30Ma Mɔwisi u womu genin gari kpuro gerua, ma Isireliba kpuro ba yi nua. Ge wee.

will be added

X\