Sɔ̃ɔsiru 30

1Sanam mɛ bɔ̃ri ka domarun gari yi na bɛɛ sɔ̃ɔwa kpuro yi bɛɛ deema, ma Yinni Gusunɔ u bɛɛ gira i da i wãa tem tukumɔ, 2ma i gɔ̃ru gɔsia i wurama win mi, ma i win gere mɛm nɔɔwa ka gɔ̃ru tia bɛɛ ka bɛɛn bibu nge mɛ na bɛɛ yiiremɔ gisɔ, 3saa ye sɔɔra wi, Yinni Gusunɔ u koo bɛɛ wɔnwɔndu kua kpa u ka bɛɛ wurama mìn di u raa bɛɛ yarinasia i yoru dimɔ. 4Ù n daa dera ba ka bɛɛ yoru da n toma, u koo da u bɛɛ kasuma 5u ka bɛɛ wurama tem mɛ bɛɛn baababa ba raa mɔ sɔɔ kpa i n mu mɔ. U koo bɛɛ gea kua n kere bɛɛn baababa kpa i bu dabiru kera. 6Yinni Gusunɔ u koo bɛɛn gɔ̃rusu ka bɛɛn bibugisu dɛɛrasia kpa i nùn kĩa ka gɔ̃ru tia ka bɛɛn bwɛ̃ra kpuro kpa i wa i n wãa. 7Saa ye, kpa u bɔ̃ri yi yi wãa tire te sɔɔ bɛɛn yibɛrɛba sure be ba bɛɛ tusa ba nɔni sɔ̃ɔwa mi. 8Bɛɛ maa, i ko i gɔsirama i wi, Yinni Gusunɔ mɛm nɔɔwa, kpa i win woodaba swĩi ye na bɛɛ wɛ̃ɛmɔ mini gisɔ. 9Yinni Gusunɔ u koo bɛɛ dukia yibie kpa u bɛɛ kuurasia ye i mɔ̀ kpuro sɔɔ. U koo bɛɛn bibu ka bɛɛn yaa sabenu ka bɛɛn gbean dĩanu dabiasia. Domi u koo maa bɛɛn doo nɔɔru kĩa nge mɛ u raa yellu bɛɛn sikadobagiru kĩa. 10Yeni kpuro ya koo koora ì n wurama win mi ka gɔ̃ru teu ka bɛɛn bwɛ̃ra kpuro ma i win gere mɛm nɔɔwa ma i win woodaba swĩi dee dee ye ba yorua win tire te sɔɔ. 11Wooda ye na bɛɛ wɛ̃ɛmɔ mini gisɔ, ya ǹ sɛ̃ yu ka bɛɛ yeeri. Ya ǹ maa sɛ̃ i ka ye mɛm nɔɔwa. 12Ya ǹ wãa wɔllɔ bu sere nɛɛ, wara u koo da wɔllɔ u ka sun ye naawa u sun nɔɔsia su sere ye mɛm nɔɔwa. 13Ya ǹ maa wãa daarun guru giɔ bu sere nɛɛ, wara u koo nim wɔ̃ku tɔbura u da u ka sun ye naawa u sun nɔɔsia su sere ye mɛm nɔɔwa. 14Ka gem wooda ye, ya wãawa bɛɛn bɔkuɔ ka bɛɛn nɔsɔ ka bɛɛn gɔ̃rusɔ. I ko i kpĩ i ye mɛm nɔɔwa. 15Bɛɛ Isireliba, wee na wãaru ka gea ka maa gɔɔ ka kɔ̃sa yiimɔ bɛɛn wuswaaɔ i ka gɔsi. 16Yen sɔ̃na na bɛɛ yiiremɔ gisɔ, i Gusunɔ bɛɛn Yinni kĩɔ kpa i sĩ win swɛɛ sɔɔ. Kpa i win woodaba mɛm nɔɔwa ka win gere ka win yiirebu kpa i kpĩ i n wãa i n dabiamɔ. Saa ye sɔɔ, u koo bɛɛ domaru kua tem mɛ i ko i mwa sɔɔ i n mɔ. 17Adama bɛɛn gɔ̃ru gà n sĩira ma i ǹ nùn mɛm nɔɔwɛ, ma i da i bũnu sãamɔ, 18na bɛɛ sɔ̃ɔmɔ ma i ko i gbiwa tem mɛ sɔɔ mɛ i ko i mwa i n mɔ mi, ì n Yuudɛnin daaru tɔbura. 19Wɔllu ka tema mu sãa nɛn seeda gisɔ ma na bɛɛ wãaru ka gɔɔ, ka maa domaru ka bɔ̃ri yiiyammɛ. Ǹ n mɛn na, i wãaru gɔsio kpa i wa i n wãa bɛɛ ka bɛɛn bibun bweserɔ. 20Kpa i Gusunɔ bɛsɛn Yinni kĩa i n ka nùn maninɛ kpa i n nùn mɛm nɔɔwammɛ. Domi yera ya koo de i n wãa kpa yu bɛɛn wãaru dɛnyasia i ka wa i n wãa tem mɛ sɔɔ, mɛ u bɛsɛn sikadoba Aburahamu ka Isaki ka Yakɔbu nɔɔ mwɛɛru kua.

will be added

X\