Sɔ̃ɔsiru 3

1Yen biru, sa tem tureru yɔɔwa sa da Basaniɔ. Ma Ogu, Basanin sina boko ka win tabu kowobu ba na ba sun tabu wɔri Edɛɛɔ. 2Ma Yinni Gusunɔ u man sɔ̃ɔwa u nɛɛ, su ku Ogu win bɛrum ko domi u koo sun nùn nɔmu bɛria, wi ka win tabu kowobu ka win tem kpuro. Sa ko nùn kuawa nge mɛ sa Sihoni, Amɔreban sina boko kua, wi u wãa Hɛsiboniɔ. 3Ma Gusunɔ bɛsɛn Yinni u sun Ogu, Basanin sina boko nɔmu bɛria ka win tabu kowobu kpuro. Sa bu kamia sa kpeerasia, baa tɔn turo sa ǹ deri. 4Sa win wusu kpuro mwɛɛra, baa teu ga ǹ kpĩa gu sun ma. Siya wusu wata ye ya wãa Aagɔbun temɔ Basaniɔ. Ogun tema sere mi. 5Wuu si kpuro su gbãranu mɔwa ni nu gunu, ma ba nu gambo sisugii kua ba ra ka kɛnɛ. Wusu maa wãa su dabi mi, si ba ǹ gbãranu toosi. 6Sa si kpuro mwɛɛra ma sa tɔn durɔbu ka tɔn kurɔbu ka bibu kpuro kpeerasia nge mɛ sa Sihoni, Hɛsibonin sina boko kua. 7Ma sa wuu sin yaa sabenu ka sin arumani gura sa tii yiiya. 8Nge mɛya sa ka Amɔreban sinambu yiru yen tem mwa Yuudɛnin sɔ̃ɔ yari yeru gia saa Aanɔɔn daarun di n ka da Hɛɛmɔɔn guurɔ. 9Sidonigibu ba ra Hɛɛmɔɔn guu te sokuwa Sirioni, kpa Amɔreba bu maa tu soku Seniri. 10Sa Basanin sina boko Ogun wusu kpuro tabu di. Siya wuu si su wãa gunguru wɔllɔ ka Galadin temɔ ka Basanin tem mɛ kpuro sɔɔ n ka girari Salikaɔ ka Edɛɛɔ. 11N deema Refaban bweseru sɔɔ, Ogu, Basanin sina boko, wi turowa u raa tie. Kpakoro sisugiru sɔɔra ba win goru doke. Kpakoro te, ta wãa Amɔniban wuu maro Rabaɔ. Ten dɛ̃ɛbu sãawa gɔm soonu nɔɔba nnɛ. Ma ten yasum sãa gɔm soonu nnɛ. 12Saa ye sɔɔra na Rubɛnin bweseru ka Gadin bweseru tem mɛ wɛ̃ mɛ mu wãa Aanɔɔn bera gia Aroɛɛn sɔ̃ɔ yɛ̃san nɔm geu gia ka wuu si su wãa Galadin guunun bee tia. 13Ma na Manasen bweserun bɔnu Galadin tem sukum mɛ mu tie wɛ̃ ka Basanin tem mi Ogu u raa bandu dii. N deema Aagɔbun tem ka Basanin tem mɛya ba ra maa soku Refaban tem. 14Yairi, Manasen bii, u Aagɔbun tem kpuro mwa n ka da Gesuriba ka Maakatigibun tem nɔɔ bura yerɔ. Ma u wuu si su wãa tem mɛ sɔɔ soka Yairin wusu nge mɛ ba su sokumɔ sere ka gisɔn gisɔ. 15Ma na Makiri Galadin tem wɛ̃. 16Ma na Rubɛnin bweseru ka Gadin bweseru Galadin tem bee tia wɛ̃ n ka da Aanɔɔn daarɔ sere ka Yabɔkun daarɔ. Aanɔɔn daara ta sãa tem mɛn nɔɔ bura yeru sɔ̃ɔ yɛ̃san nɔm dwaru gia, ma Yabɔkun daaru ta maa bu buranɛ ka Amɔniba. 17Ben tem mɛya mu wãa Yuudɛnin wɔwaɔ, saa Genɛsarɛtin daa burerun di n ka da nim wɔ̃ku bɔruguuɔ. Ma mu da sere ka Pisigan guurɔ sɔ̃ɔ yari yeru gia. 18Saa ye sɔɔ, ma na bɛɛ wooda yeni wɛ̃ na nɛɛ, tɛ̃, wee Gusunɔ bɛsɛn Yinni u bɛɛ tem mɛ wɛ̃ i n mɔ. Tɛ̃, bɛɛ tabu kowobu kpuro, i bɛɛn tabu yãnu suo kpa i Yuudɛni tɔbura ka bɛɛgibu Isireliba sannu. 19Bɛɛn kurɔbu ka bɛɛn bibu ka bɛɛn yaa sabe ni tɔnawa i ko i deri wuu si na bɛɛ wɛ̃ sɔɔ. 20I bɛɛn mɛro bisibu somiɔ sere Gusunɔ bɛsɛn Yinni u ka bu swĩi ben temɔ nge mɛ u bɛɛ kua, kpa bu sina tem mɛ sɔɔ mɛ u koo bu wɛ̃ Yuudɛnin sɔ̃ɔ kpee yeru gia. Saa ye sɔɔra i ko i wura bɛɛn temɔ mɛ na bɛɛ wɛ̃. 21Ma na Yosue wooda yeni wɛ̃ na nɛɛ, win nɔni yi wa ye Gusunɔ bɛsɛn Yinni u sinambu yiru ye kua. Nge mɛya u koo maa sinambu kpuro kua be u koo ka tabu ko sanam mɛ i Yuudɛni tɔbura. 22I ku bu nasia, domi Gusunɔ bɛsɛn Yinni u koo bɛɛ sanna. 23Saa ye sɔɔ, na Yinni Gusunɔ suuru kana na nɛɛ, 24Gusunɔ nɛn Yinni, a nɛ wunɛn sɔm kowo wunɛn kpãaru ka wunɛn dam bakam kookoo gbiikisu sɔ̃ɔsi. Yinni goo sari wɔllɔ ka temɔ wi u koo kpĩ u ko ye a ra ko. 25A de n Yuudɛni tɔbura kpa n tem buram mɛ wa guru giɔ mi guu buranu wãa ka maa Libani. 26Adama Yinni Gusunɔ u ka man mɔru kua bɛɛn sɔ̃ ma u yina u nɛn kanaru nɔ. U nɛɛ, ya tura mɛ. N ku maa nùn yen gari sɔ̃. 27U nɛɛ, n yɔɔwo Pisigan guurun wii kpiirɔ kpa n nɔni seeya n mɛɛri sɔ̃ɔ yɛ̃san nɔm geu gia ka sɔ̃ɔ yɛ̃san nɔm dwaru gia ka sɔ̃ɔ kpee yeru gia ka sere maa sɔ̃ɔ yari yeru gia. Adama na ǹ Yuudɛni tɔburamɔ. 28U nɛɛ, n Yosue bwisi kɛ̃ɛyɔ kpa n nùn dam kɛ̃, n de u n wɔrugɔru mɔ. Domi wiya u koo Yuudɛni tɔbura kpa u Isireliba kpara u ka bu tem mɛ wɛ̃ mɛ kon wa mi. 29Ma sa sina wɔwa mi, Bɛti Peorin deedeeru.

will be added

X\