Sɔ̃ɔsiru 29

1- 2Mɔwisi u Isireliba kpuro mɛnna u bu sɔ̃ɔwa u nɛɛ, bɛɛn tii i wa sɔm maamaakigii ni Yinni Gusunɔ u kua, ka nɔni swãa ni u Egibitin sunɔ ka win sɔm kowobu kpuro kpɛ̃ɛ ben tem mɛ kpuro sɔɔ. 3Adama sere ka tɛ̃ u ǹ dere i tubu ye bɛɛn nɔni wa ka ye bɛɛn swasu nua. 4U bɛɛ kpara gbaburɔ wɔ̃ɔ weeru ma bɛɛn yãa ni i doke nu ǹ gɛ̃ɛkire, bɛɛn baranu kun maa diire nu sere kpe. 5U ǹ dere i pɛ̃ɛ di. I ǹ maa tam nɔrure. Win tiiwa u bɛɛ nɔɔri i ka tubu ma wiya u sãa Gusunɔ bɛɛn Yinni. 6Sanam mɛ sa tunuma mini, Sihoni, Hɛsibonin sunɔ ka Ogu, Basanin sunɔ ba yarima ba sun tabu wɔri ma sa ka bu tabu kua sa kamia. 7Sa ben tem mwa sa Rubɛnin bwese kɛra ka Gadin bwese kɛra ka Manasen bwese kɛran sukum wɛ̃. 8Yen sɔ̃, i de i wooda yen gari mɛm nɔɔwa kpa ye i mɔ̀ kpuro yu bɛɛ wɛ̃ra. 9- 10Mɔwisi u maa nɛɛ, wee gisɔ i na Gusunɔ bɛsɛn Yinnin wuswaaɔ ka bɛɛn bwese kɛrin wirugibu ka yin guro gurobu ka yin tabu sinambu, bɛɛ Isireliba kpuro gesi ka bɛɛn kurɔbu ka bibu ka sere tɔn tukobu be ba wãa bɛɛn suunu sɔɔ ka bɛɛn sɔm kowobu be ba ra bɛɛ dãa kasue ka be ba nim takirimɔ. 11Bɛɛ kpurowa i mɛnna i ka Yinni Gusunɔ arukawani bɔke. Tɛ̃, u bɛɛ kanamɔ i ye wuro ka bɔ̃ri, 12kpa i n sãa win tɔmbu kpa wi, u n maa sãa bɛɛn Yinni nge mɛ u bɛɛn sikadoba Aburahamu ka Isaki ka Yakɔbu nɔɔ mwɛɛru kua ma u bɛɛn tii sɔ̃ɔwa mɛ. 13N ǹ mɔ bɛɛ tɔna u ka arukawani ye bɔkua ka bɔ̃ri, 14ka be ba mɛnnɛ win wuswaaɔ mini kpurowa ka mam be ba kun wãa minin tii kpuro. 15Bɛɛn tii i yɛ̃ nge mɛ sa raa ka wãa Egibitiɔ ka nge mɛ sa sina bwese tukunun suunu sɔɔ nìn tem sa sasira. 16I ben bũu kamgii ni wa ni ba kua ka dãa ka kpenu ka sii geesu ka sere maa wura. 17Yen sɔ̃, bɛɛn suunu sɔɔ, goo ǹ kun mɛ yɛnu gagu ǹ kun mɛ bwese kɛra gaa yu ku raa Gusunɔ bɛsɛn Yinni biru kisi kpa yu da yu bwese tuku nin bũnu sã. Bɛɛn suunu sɔɔ, goo u ku raa gɔsira u ko nge dãa ye ya dɛ̃ɛ mɔ. 18Wi u arukawani yen gari nua ye ba bɔkua ka bɔ̃ri mi, u ku tii sua win gɔ̃ruɔ u nɛɛ, u koo bɔri yɛndu wa baa ù n win tiin kĩru mɔ̀, kpa u de goo u wɔri bũu sãaru sɔɔ. 19Yinni Gusunɔ kun nùn suuru kuammɛ. Win mɔru ka win nisinu koo wɔriwa yɛ̃ro sɔɔ. Bɔ̃ri yi ba yorua tire te sɔɔ, yi koo nùn diwa kpa Yinni Gusunɔ u de bu win yĩsiru duari handunia sɔɔ. 20U koo yɛ̃ro wunawa Isireliban bwese kɛrin suunu sɔɔn di nge mɛ bɔ̃ri yi, yi gerumɔ woodan tire te sɔɔ. 21Sɔ̃ɔ teeru bii be ba koo ra marura ka sɔɔ be ba koo ra na saa tontonden di, ba koo wa asɔrɔ ye ya bɛɛn wuu kua ka nge mɛ Yinni Gusunɔ u bɛɛn tem mɛ kam koosia 22ka sɔ̃ɔ bisu ka bɔru sere ba ǹ kpɛ̃ bu gãanu duure, gãanu kun mam kpɛ̃ nu kpi mɛ sɔɔ baa yakasu su ǹ seemɔ mi. Ba mu kpeerasiawa nge Sodomu ka Gomɔra ka Adima ka Seboimu, wuu si Yinni Gusunɔ u kpeerasia ka win mɔru baka. 23Saa yera bwese ni, nu koo bikia nu nɛɛ, mban sɔ̃na Yinni Gusunɔ u tem mɛ kua mɛsum. Mban sɔ̃na u mu kpeerasia ka win mɔru baka. 24Kpa bu bu wisi bu nɛɛ, mɛn tɔmbu ba arukawani ye kusiawa ye wi, Gusunɔ ben sikadoban Yinni u ka bu bɔkua sanam mɛ u bu yarama Egibitin di. 25Ma ba bũnu sãaru wɔri ni ba ǹ daa yɛ̃ ni Yinni Gusunɔ u bu yinari. 26Yen sɔ̃na u mɔru kua u bu bɔ̃ri yi yi wãa tire te sɔɔ sure. 27Ma u win tɔmbu gira u yara tem min di ka win dam bakam ba da ba wãa tem tukumɔ mi ba bu waamɔ gisɔ. 28Ye ya berua, Yinni Gusunɔ turowa u ye yɛ̃. Adama bɛsɛgia ye u sun sɔ̃ɔsi bɛsɛ ka bɛsɛn bibun bweseru kpa su win wooda ye mɛm nɔɔwa.

will be added

X\