Sɔ̃ɔsiru 27

1Mɔwisi ka Isireliban guro gurobu ba tɔmbu sɔ̃ɔwa ba nɛɛ, i wooda be kpuro mɛm nɔɔwɔ be Mɔwisi u bɛɛ saaria mi gisɔ. 2Tɔ̃ɔ tè sɔɔ i da i Yuudɛnin daaru tɔbura, i dua tem mɛ Gusunɔ bɛsɛn Yinni u bɛɛ wɛ̃ sɔɔ, i de i kpee bakanu gurama i sɔnna i tãwaru koosi, 3kpa i wooda yenin gari kpuro yore ni sɔɔ dɔma te. Nge mɛya i ko i ka tem mɛ du mɛ mu tim ka bom yiba mɛ Gusunɔ bɛsɛn baababan Yinni u bɛɛ nɔɔ mwɛɛru kua. 4Ì n Yuudɛni ye tɔbura i kpa, yera i ko i sere kpee nìn wooda na bɛɛ wɛ̃ gisɔ gurama i sɔnna Ebalin guurɔ kpa i nu tãwaru koosi. 5Miya i ko i Gusunɔ bɛsɛn Yinni yãku yeru kua ka kpee ni i ǹ ka sisu dãke. 6Kpee ni ba ǹ dãke tɔnawa i ko i ka nùn yãku yee te bania. Miya i ko i nùn yãku dɔ̃ɔ mwaararuginu 7ka siarabun yãkunu kua, kpa i sina mi i di ka nuku dobu Gusunɔ bɛsɛn Yinnin wuswaaɔ. 8Kpa i woodan gari yi yore kpee ni sɔɔ mɛ baawure u koo kpĩ u ka yi gari sãa sãa. 9Ma Mɔwisi ka yãku kowobu Lefiba ba Isireliba kpuro sɔ̃ɔwa ba nɛɛ, i mario i nɔ, gisɔra i kua Gusunɔ bɛsɛn Yinnin tɔmbu. 10Yen sɔ̃, i de i nùn mɛm nɔɔwa kpa i win yiirebu ka win woodaba swĩi ye na bɛɛ saaria mi gisɔ. 11Mɔwisi u dɔma te tɔn be sɔ̃ɔwa u nɛɛ, 12ì n Yuudɛnin daaru tɔbura i kpa, bwese nini, Simɛɔba ka Lefiba ka Bɛnyamɛɛba ka Yudaba ka Isakariba ka Yosɛfuba ba koo da bu yɔ̃rawa Garisimun guurɔ kpa bu tɔmbu domaru kua, 13kpa maa bwese nini, Rubɛniba ka Gadiba ka Asɛɛba ka Sabuloniba ka Danuba ka Nɛfitaliba bu da bu yɔ̃ra Ebalin guurɔ kpa bu bɔ̃rin gari gere. 14Guuru miya Lefiba ba koo gbãra tãa tãa bu Isireliba kpuro sɔ̃ bu nɛɛ, 15bɔ̃rurowa wi u dãa dãka ǹ kun mɛ u sisu yania u wisi u ka tii bwãaroku gagu kua u sã gbɛnum, domi Yinni Gusunɔ u yabu yen bweseru tusa ye ba ka nɔma kua ba sãamɔ. Kpa tɔmbu kpuro bu nɛɛ, ami! 16Kpa Lefiba bu nɛɛ, bɔ̃rurowa wi u kun win tundo ǹ kun mɛ win mɛro bɛɛrɛ doke. Kpa tɔmbu kpuro bu nɛɛ, ami! 17Kpa Lefiba bu nɛɛ, bɔ̃rurowa wi u win winsim tem nɔɔ bura yeru sare. Kpa tɔmbu kpuro bu nɛɛ, ami! 18Kpa Lefiba bu nɛɛ, bɔ̃rurowa wi u wɔ̃ko swaa sɔ̃ɔsi kankam. Kpa tɔmbu kpuro bu nɛɛ, ami! 19Kpa Lefiba bu nɛɛ, bɔ̃rurowa wi u sɔɔ ǹ kun mɛ gobeku ǹ kun mɛ gɔmini win gem bira siri yerɔ. Kpa tɔmbu kpuro bu nɛɛ, ami! 20Kpa Lefiba bu nɛɛ, bɔ̃rurowa wi u win tundon kurɔ kĩa, domi u win tundon kpin yeru disi dokewa mi. Kpa tɔmbu kpuro bu nɛɛ, ami! 21Kpa Lefiba bu nɛɛ, bɔ̃rurowa wi u ka yaa saberu kpuna. Kpa tɔmbu kpuro bu nɛɛ, ami! 22Kpa Lefiba bu nɛɛ, bɔ̃rurowa wi u ka win sesu mɛro turosi ǹ kun mɛ tundo turosi kpuna. Kpa tɔmbu kpuro bu nɛɛ, ami! 23Kpa Lefiba bu nɛɛ, bɔ̃rurowa wi u ka win kurɔn mɛro kpuna. Kpa tɔmbu kpuro bu nɛɛ, ami! 24Kpa Lefiba bu nɛɛ, bɔ̃rurowa wi u win tɔnusi so u go bɔkuɔ gbɛnum. Kpa tɔmbu kpuro bu nɛɛ, ami! 25Kpa Lefiba bu nɛɛ, bɔ̃rurowa wi u nɔm biran gobi mwa u ka taarɛ sarirugii go. Kpa tɔmbu kpuro bu nɛɛ, ami! 26Kpa Lefiba bu nɛɛ, bɔ̃rurowa wi u yina u woodan gari yini mɛm nɔɔwa. Kpa tɔmbu kpuro bu nɛɛ, ami!

will be added

X\