Sɔ̃ɔsiru 26

1Ì n da i dua tem mɛ Gusunɔ bɛsɛn Yinni u koo bɛɛ wɛ̃ sɔɔ, ma i mu mwa, i sina mɛ sɔɔ, 2i de bɛɛn baawure u win gbean dĩa gbiikinu tama ni u duura tem mɛ sɔɔ, u nu doke bireru sɔɔ u ka na Gusunɔ bɛsɛn Yinnin sãa yerɔ, 3kpa u da saa ye sɔɔn yãku kowon mi, u nùn sɔ̃ u nɛɛ, u gerumɔ Gusunɔ win Yinnin wuswaaɔ gisɔ ma u dua tem mɛ sɔɔ, mɛ Yinni Gusunɔ wi, u bɛsɛn baababa nɔɔ mwɛɛru kua u nɛɛ, u koo sun wɛ̃. 4Kpa yãku kowo wi, u yɛ̃ro bire te mwaari u yi Gusunɔ bɛsɛn Yinnin yãku yerun wuswaaɔ. 5Kpa yɛ̃ro u gere Gusunɔn wuswaaɔ u nɛɛ, win sikado u sãawa Aramugii wi u kun wãa yeru mɔ. U da Egibitiɔ u sina mi ka tɔmbu fiiko be ba wãa ka wi. Yen biru, tɔn be, ba dabia ba kua bwese damgiru. 6Adama Egibitigibu ba bu dam dɔre, ba bu nɔni sɔ̃ɔwa, ma ba bu kua yobu. 7Yera ba Gusunɔ bɛsɛn baababan Yinni nɔɔgiru sue, ma u begia nua. U ben nɔni swãaru wa ka dam mɛ ba bu dɔremɔ ka nge mɛ ba bu taare. 8Yen biru, u bu yarama Egibitin di ka win nɔm damguu, ka nanum bakam, ka sɔm maamaakiginu. 9U ka bu tunuma tem mini, mɛ mu tim ka bom yiba, ma u bu mu wɛ̃. 10Yen sɔ̃na tɛ̃, u ka tem mɛ Yinni Gusunɔ u nùn wɛ̃n dĩa gbiikinu na win wuswaaɔ. Kpa yɛ̃ro u yiira u wuswaa tem girari u ka Gusunɔ sã. 11Yen biru, bɛɛ ka Lefiba ka sɔɔ be ba wãa bɛɛn suunu sɔɔ, i ko n nuku dobu mɔ̀ gãa geenu kpuron sɔ̃ ni Gusunɔ bɛsɛn Yinni u bɛɛ ka bɛɛn bibu wɛ̃. 12Wɔ̃ɔ yirun biru, itase, i ko ge sokuwa wɔkuru baateren wɔllɔn tia tian wɛ̃ɛbun wɔ̃ɔ. Ì n bɛɛn dĩanu gã i kpa, i ko nin wɔkuru baateren wɔllɔ tia tia wunawa kpa i Lefiba wɛ̃ ka sɔbu ka gobekuba ka gɔminibu kpa ba n da di bu debu bɛɛn wuu si sɔɔ. 13Saa yera i ko i Gusunɔ bɛsɛn Yinni sɔ̃ i nɛɛ, wɔkuru baateren wɔllɔn tia tia ye ya sãa wigia, wee i wunama bɛɛn yɛnun di i Lefiba wɛ̃ ka sɔbu ka gobekuba ka gɔminibu nge mɛ u bɛɛ yiire i ko. I ǹ yen gaa duari i sere ye deri. 14I ǹ wɔkuru baateren wɔllɔn tia tia yen gaa di sanam mɛ i gɔɔ wooru sɔ̃. I ǹ ye sue sanam mɛ i ǹ dɛɛre. I ǹ maa yen gaa gɔribu wɛ̃. 15U tukama u bɛɛ mɛɛri saa win sin yee dɛɛrarun di te ta wãa wɔllɔ, kpa u bɛɛ win tɔmbu Isireliba domaru sosia ka bɛɛn tem mɛ u bɛɛ wɛ̃, mɛ mu tim ka bom yiba nge mɛ u bɛsɛn baababa nɔɔ mwɛɛru kua. 16Gisɔ, Gusunɔ bɛsɛn Yinni u bɛɛ sɔ̃ɔmɔ u nɛɛ, i win woodaba ka win yiirebu kpuro mɛm nɔɔwɔ. I n tii sɛ kpa i ye kpuro swĩi ka gɔ̃ru tia ka bɛɛn bwɛ̃ra kpuro. 17Gisɔ, i wura ma Gusunɔwa u sãa bɛsɛn Yinni, i maa wura ma i ko i sĩ win swaa sɔɔ, kpa i win woodaba ka win yiirebu kpuro mɛm nɔɔwa. 18Yinni Gusunɔn tii u maa wura gisɔ ma i sãa win tɔn be u gɔsa nɛnɛm win tiin sɔ̃ i ka win yiirebu kpuro swĩi nge mɛ u bɛɛ nɔɔ mwɛɛru kua. 19Mɛya u koo maa bɛɛ wɔlle sua i yĩsiru yari kpa i n bɛɛrɛ mɔ n kere handunian bwesenu kpuro ni u taka kua, kpa i n sãa win tɔn be u tii yiiya nge mɛ u gerua.

will be added

X\