Sɔ̃ɔsiru 23

1Durɔ goo u ku raa maa win baaban kurɔ kĩa. Ù n kua mɛ, u win baaba sekuru dokewa mi. 2Wìn tĩa bii ba kɔsuka ǹ kun mɛ wìn tɔn durɔru ba bura, u ǹ kpɛ̃ u ka Yinni Gusunɔn tɔmbu mɛnna. 3Be ba ǹ weenɛ bu suana ma ba ka suana, ben bibu ba ǹ kpɛ̃ bu ka Yinni Gusunɔn tɔmbu mɛnna sere ka ben bibun bibun bweserun nɔn wɔkurɔ. 4Mɛya Amɔniban goo ǹ kun mɛ Mɔabuban goo u ǹ kpɛ̃ u ka Yinni Gusunɔn tɔmbu mɛnna sere ka ben bibun bibun bweserun nɔn wɔkurɔ. 5Domi ba ǹ ka sun nim ka dĩanu sennɔ kue saa ye sa yarima Egibitin di. Ba da ba Balamu, Beorin bii, Petorigii wi u na Mɛsopotamin di gobi kãwa u ka na u sun bɔ̃rusi. 6Adama Gusunɔ bɛsɛn Yinni u ǹ Balamu win gere swaa daki. U bɔ̃ri yi gɔsiawa domaru domi u sun kĩ. 7I ku ra ben alafia kasu ǹ kun mɛ ben gea sere ka baadommaɔ bɛɛn wãarun tɔ̃ru kpuro sɔɔ. 8I ku ra ko i Edɔmu goo tusi, domi ba sãawa bɛsɛn wɔnɔbu. I ku ra maa Egibitigii goo tusi domi sa sɔru di ben temɔ. 9Ben bibu ba ko n da ka Yinni Gusunɔn tɔmbu mɛnnɛwa sere ka ben sikadominɔ. 10Ì n yara i ka yibɛrɛba tabu wɔri, saa ye sɔɔra i ko i tii laakari ko ka gãa disiginu kpuro. 11Tɔn durɔ goo ù n wãa bɛɛ sɔɔ, ma u dosa sere u tii wa dosu ge sɔɔ, i ka nùn yario sansanin di gina. 12Adama sɔ̃ɔ ù n kɛlla, u koo woburewa. Yen biru, sɔ̃ɔ ù n dua kpa u wurama sansaniɔ. 13I de i n gam mɔ sansanin biruɔ mi i ko i n da dii bera ko, 14kpa i n gãanu nɛni ni i ko ka wɔru gbe i ka bɛɛn dii bera ye sike. 15Domi Gusunɔ bɛsɛn Yinni u wãa bɛɛn sansani ye sɔɔ u sĩimɔ sĩimɔ u ka bɛɛ kɔ̃su kpa u bɛɛ bɛɛn yibɛrɛba nɔmu bɛria. Yen sɔ̃, n weenɛwa bɛɛn sansani ya n dɛɛre kpa u ku bɔrɔnu ganu wa bɛɛn suunu sɔɔ ni nu koo de u bɛɛ biru kisi. 16I ku yoo wi u win yinni duka suuri mwa i wesia win yinnin mi. 17I de u n wãa mi u kĩ bɛɛn suunu sɔɔ wuu ge u koo gɔsi sɔɔ. I ku nùn dam dɔre. 18I ku de durɔ dama woronu ǹ kun mɛ kurɔ dama woronu nu n wãa bɛɛn sãaru sɔɔ. 19I ku ra ka durɔ dama gobi ǹ kun mɛ kurɔ dama gobi gɛɛ na Yinni Gusunɔn sãa yerɔ i ka ye i Gusunɔ nɔɔ mwɛɛru kua kɔsia. Domi Gusunɔ bɛsɛn Yinni u yen bweseru tusa. 20Bɛɛn Isirelisibu bà n gãanu bɔkura, i ku bu nim dokea, ǹ n gobin na, ǹ n maa dĩanun na ǹ kun mɛ gãanu ganu. 21Sɔɔwa i ko i yen bweseru kua, adama i ku ra bɛɛn Isirelisibu kua mɛ, kpa Gusunɔ bɛsɛn Yinni u bɛɛ domaru kua tem mɛ sɔɔ mɛ i ko i du mi, i n mɔ. 22Ì n Gusunɔ nɔɔ mwɛɛru garu kua, i ku tɛ i ka tu yibia domi u koo bɛɛ tu bikia kpa i n taarɛ mɔ. 23Adama ì kun nɔɔ mwɛɛru garu kue, i ǹ ko i n taarɛ mɔ. 24Nɔɔ mwɛɛ te i yara bɛɛn nɔɔn di, i ko i tu yibiawa domi i tu kuawa ka bɛɛn tiin nɔɔ, n ǹ ka tilasi. 25Ì n dua goon dãa gbaarɔ, i yen binu dio nge mɛ i kĩ, adama i ku ra nin ganu doke birerɔ i ka doona. 26Ì n maa dua goon alikama gbaarɔ, i ko i kpĩ i alikama wɔka ka nɔma adama i ku ye kɔmbɔ doke.

will be added

X\