Sɔ̃ɔsiru 20

1Sanam mɛ i bɛɛn yibɛrɛba tabu wɔri, ì n ben dumi wa ka ben tabu kɛkɛ yi dumi gawe ka sere ben tɔmbu be ba bɛɛ dabiru kere, i ku ben bɛrum ko. Domi Gusunɔ bɛsɛn Yinni u wãa ka bɛɛ wi, wi u bɛɛ yarama Egibitin di. 2I sere tabu tore, yãku kowo u koo nawa bɛɛn wuswaaɔ u nɛɛ, 3i nɔɔwɔ bɛɛ Isireliba. Wee i na gisɔ i ka bɛɛn yibɛrɛba tabu ko. I ku de bɛɛn goon tororu tu kara. I ku bɛrum soora, i ku diiri, i ku maa nanda ben sɔ̃. 4Gusunɔ bɛsɛn Yinni u ka bɛɛ wãa. Wiya u koo bɛɛ nasara wɛ̃. 5Yen biru be ba ra tabu kowobu mwɛɛri, ba koo bikia bu nɛɛ, bɛɛ sɔɔ, wara u yɛnu kpɔɔ bana ma u ǹ gina wure ge sɔɔ. Yɛ̃ro u de u wura yɛnuɔ, kpa u ku gbi taa bi sɔɔ goo u du win yɛnu ge sɔɔ. 6Ba koo maa bikia bu nɛɛ, bɛɛ sɔɔ, wara u dãa gbaanu kua ma u ǹ gina yen are diire. Yɛ̃ron tii u de u gɔsira yɛnuɔ kpa u ku raa gbi taa bi sɔɔ goo u tu tubi di. 7Ba koo maa bikia bu nɛɛ, wara ba kurɔ kã ma u ǹ nùn sue gina. Win tii u wuro yɛnuɔ kpa u ku raa gbi taa bi sɔɔ kpa goo u kurɔ wi sua. 8Kpa bu maa nɛɛ, bɛɛ sɔɔ, wara u wurure. Bu de yɛ̃ro u wura win yɛnuɔ. Kpa u ku raa be ba tie bɛrum tia. 9Bà n gari yi gerua ba kpa, kpa bu bu tabu sinambu kua. 10Sanam mɛ i wuu gagu tabu wɔri, i gina gen tɔmbu bikio bu tii wɛ̃ ka alafia. 11Bà n wura ba bɛɛ ben wuun kɔnnɔ kɛnia i dua, be kpurowa i ko i yoo sɔma koosia. 12Adama bà kun kĩ bu bɛɛ senna ka alafia, ma ba nɛɛ, ba koo ka bɛɛ sannawa, i bu tabu wɔrio. 13Saa yè sɔɔ Gusunɔ bɛsɛn Yinni u bɛɛ bu nɔmu bɛria, saa yera i ko i tɔn durɔ be ba wãa mi kpuro go ka takobi. 14Adama tɔn kurɔbu ka bii piiminu ka yaa sabenu ka arumani ye ya wãa wuu ge sɔɔ kpurowa i ko i gura yu ko bɛɛgia, kpa i ye dendi nge mɛ i kĩ, domi Gusunɔ bɛsɛn Yinniwa u bɛɛ ye wɛ̃. 15Mɛsuma ko i bwese nin wusu kpuro kua ni nu ka bɛɛ toma, nu ǹ wãa tem mɛ i ko i mwa sɔɔ. 16Adama tɔn benin wusu sɔɔ, si Gusunɔ bɛsɛn Yinni u bɛɛ wɛ̃ mi, i n mɔ, i ku ra de sin tɔnu goo u n wãa. 17I de i bu go kpuro mam mam, be ba sãa Hɛtiba ka Amɔreba ka Kananiba ka Feresiba ka Hefiba ka Yebusiba nge mɛ Gusunɔ bɛsɛn Yinni u bɛɛ yiire. 18Kpa bu ku raa bɛɛ ben koma bɔrɔnugii ni tie ni ba ra ben bũnu koosi. Kpa i ku ra ka ni Gusunɔ bɛsɛn Yinni torari. 19Sanam mɛ i wuu gagu wɔri i gu tarusi n ka tɛ i sere gu kamia, i ku ra gen dãa binuginu gbãa suasi. I ko i kpĩ i nin binu di, adama i ku nu kĩi i sura domi dãru ta ǹ sãa tɔnu wi i ko i wɔri i go. 20Dãa te i yɛ̃ ta ǹ sãa diiraru, tera i ko i kpĩ i bura i ka sɛri ko yi i ko i ka gbãraru yɔ sere i ka wuu ge kamia.

will be added

X\