Sɔ̃ɔsiru 2

1Yen biru ma sa gɔsira sa da ka gbaburun swaa nim wɔ̃ku ge ba mɔ̀ Naa yarin bera gia nge mɛ Yinni Gusunɔ u gerua. Ma sa sirena Seirin guunɔ n ka tɛ. 2Yinni Gusunɔ u man sɔ̃ɔwa u nɛɛ, 3wee sa sirena guunun bera mi gia n ka tɛ. Su maa doo sɔ̃ɔ yɛ̃san nɔm geu gia. 4U nɛɛ, n bɛɛ wooda yeni wɛ̃ n nɛɛ, i seewo i Seirin tem bɛwa mi bɛɛn mɛro bisibu Esaun bibun bweseru ba wãa. Ba ko n bɛɛn bɛrum mɔ, adama i n tii sɛ, 5i ku ra bu wɔri. Domi u ǹ bɛɛ ben tem wɛ̃ɛmɔ baa mɛ̀n nɔɔ i ko i naasu sɔndi. Esaun bibun bwesera u Seirin guunun beran tem mɛ wɛ̃ ba n mɔ. 6Dĩa ni i ko i di ka sere maa nim mɛ i ko i nɔ, i ko i ye kpuro dwewa ben mi. 7Domi Gusunɔ bɛsɛn Yinni u bɛsɛn sɔma kpuro domaru kua ma u sun kɔ̃su sanam mɛ sa gbabu baka te bukianamɔ. U wãa ka bɛsɛ sere n ka kua gisɔ wɔ̃ɔ weeru. Sa ǹ gãanu bie. 8Ma sa Seirin tem bɛwa mi bɛsɛn mɛro bisibu Esaun bibun bwesera wãa. Sa ǹ maa tem tɛɛran swaa mwɛ ye ya dɔɔ Elatiɔ ka Ɛsioni Gebɛɛɔ. Ma sa gɔsira sa Mɔabun gbaburun swaa mwa. 9Yinni Gusunɔ u man sɔ̃ɔwa u nɛɛ, su ku Mɔabuba nɔɔ kuuri, su ku bu tabu wɔri, domi u ǹ sun gãanu nɔmu sɔndiammɛ ben temɔ. Lɔtun bibun bwesera u Arin tem mɛ wɛ̃ ba n mɔ. 10Yellu, Emibara ba wãa Arin tem mɛ sɔɔ. Ba sãawa bwese te ta dam mɔ. Ba dabi ba maa gunu nge Anakin bibun bweseru. 11Gabu ba tamaa ba sãawa Refaba nge mɛ Anakiba ba sãa, adama Mɔabuba ba ra bu sokuwa Emiba. 12Nge mɛya maa Horiba ba raa wãa Seirin temɔ yellu. Ma Esaun bibun bweseru ba bu kpeerasia ma ba sina mi, nge mɛ bɛɛ Isireliba i kua tem mɛ Yinni Gusunɔ u bɛɛ wɛ̃ sɔɔ. 13Yen biru, Yinni Gusunɔ u wooda wɛ̃ u nɛɛ, su seewo su swaa wɔri kpa su Serɛdin daaru tɔbura. Ma sa tu tɔbura. 14Saa mìn di sa seewa Kadɛsi Baanɛan di sere sa ka Serɛdin daaru tɔbura, n kuawa wɔ̃ɔ tɛna ka nɔɔba ita. Be ba raa sãa tabu kowobu sa ka seema ba ǹ maa wãa nge mɛ Yinni Gusunɔ u raa gerua ka bɔ̃ri. 15Win tiiwa u bu nɔma doke u kpeerasia. 16Sanam mɛ tabu kowo be kpuro ba gu ba kpa, 17sanam mɛ sɔɔra Yinni Gusunɔ u man sɔ̃ɔwa u nɛɛ, 18tɛ̃, su Mɔabun tem nɔɔ bura yeru saro kpa su Arin tem bukiana, 19su na Amɔniban mi. Adama su ku bu nɔɔ kuuri, su ku maa ka bu tabu ko. Domi u ǹ sun gãanu wɛ̃ɛmɔ ben tem mɛ sɔɔ. Ba sãawa Lɔtun bibun bweseru. Bera u maa tem mɛ wɛ̃ ba n mɔ. 20Tem mɛ, mu raa sãawa Refaban tem. Domi yellu Refabara ba raa wãa mi, be, be Amɔniba ba ra soku Sansumiba. 21Bwese te, ta dam mɔ ma ba dabi. Ba gunuwa nge Anakiba. Adama Yinni Gusunɔ u bu Amɔniba nɔma bɛria, ba bu gira ma ba sina mi. 22Nge mɛya Yinni Gusunɔ u Esaun bibun bweseru kua be ba wãa Seiriɔ. U dera ba Horiba gira ma ba bu kpeerasia ba sina ben temɔ sere ka gisɔ. 23Kafitorigibu ba na saa ben tem di ba Afi be ba wãa baru kpaanɔ n ka girari Gasaɔ kpeerasia ma ba sina ben wusɔ. 24Yen biru, Yinni Gusunɔ u nɛɛ, su seewo su swaa wɔri kpa su Aanɔɔn daaru tɔbura. Wee u koo sun Sihoni Amɔre, Hɛsibonin sina boko nɔmu bɛria ka win tem. U nɛɛ, su doo su nùn wɔri kpa su ka nùn tabu ko. 25Saa gisɔn di u koo de nandabu bu n wãa handunian bwesenu kpuro sɔɔ bɛsɛn sɔ̃. Bà n bɛsɛn damu nua, kpa bu diiri bɛrum sɔ̃. 26Saa Kedemɔtin di, na sɔmɔbu gɔra Sihoni, sina bokon mi, kpa bu nùn bɔri yɛndun gari sɔ̃ bu nɛɛ, 27u de su win tem bukiana. Swaa doowa sa ko n swĩi, sa ǹ gam gɛramɔ. 28Sa ko nùn dĩa ni sa ko di ka nim mɛ sa ko nɔn gobi kɔsia. U gesi de su win tem bukiana. 29Esaun bibun bweseru be ba wãa Seiriɔ ka Mɔabuba be ba wãa Arin temɔ ba wura sa ben tem bukiana. U maa de su win tem bukiana su ka Yuudɛni tɔbura kpa su du tem mɛ Gusunɔ bɛsɛn Yinni u sun wɛ̃ sɔɔ. 30Adama Sihoni, Hɛsibonin sina boko u yina su sara ka win temɔ. Domi Gusunɔ bɛsɛn Yinni u win gɔ̃ru bɔbiasia u sun nùn nɔmu sɔndia nge mɛ i waamɔ gisɔ. 31Ma Yinni Gusunɔ u man sɔ̃ɔwa u nɛɛ, n mɛɛrio u sun Sihoni ka win tem nɔmu bɛria. Su nùn wɔrio su tem mɛ mwa. 32Ma Sihoni ka win tabu kowobu ba na ba sun tabu wɔri Yahasiɔ. 33Ma Gusunɔ bɛsɛn Yinni u sun nùn nɔmu bɛria. Ma sa nùn kamia wi ka win bibu ka win tabu kowobu kpuro. 34Sa win wusu kpuro mwɛɛra sa kam koosia mam mam, ma sa tɔn durɔbu ka tɔn kurɔbu ka bibu kpuro kpeerasia, baa tɔn turo kun tiare. 35Ma sa ben yaa sabenu ka ben arumani ye sa gura ben wuu si sɔɔ tii koosi. 36Saa Aroɛɛn di ye ya wãa Aanɔɔn daarun goorɔ ka wuu ge ga wãa wɔwaɔ n ka da sere Galadiɔ, wuu gaga kun kpĩa gu sun ma. Gusunɔ bɛsɛn Yinni u sun si kpuro nɔmu bɛriawa. 37Adama sa ǹ Amɔniban tem babe ka tem mɛ mu wãa Yabɔkun daarun goorɔ ka wuu si su wãa guunɔ ka sere mi Gusunɔ bɛsɛn Yinni u sun yinari su wɔri.

will be added

X\