Sɔ̃ɔsiru 18

1Yãku kowo Lefiba ka be ba tie Lefin bweseru sɔɔ kpuro ba ǹ tem wasi nge Isireli be ba tie. Yãku ni ba Yinni Gusunɔ kua ka gãa ni ba ka nùn naawa, yera ya ko n sãa ben dĩanu. 2Ba ǹ tem wasi mu n sãa ben tubi nge Isireli be ba tie. Adama Yinni Gusunɔgia ya ko n sãa ben tubi nge mɛ u bu sɔ̃ɔwa. 3Yãku yaan mi bɛɛ Isireliba i ko yãku kowobu wɛ̃ ì n yãkuru kua ka kɛtɛ ǹ kun mɛ ka yãaru ǹ kun mɛ ka boo, miya yen nɔm faram ka yen baa saburosu ka yen bɔsɔnu. 4Kpa i maa bu bɛɛn dĩa ni i gbia i gã wɛ̃. Niya, alikama ka dãa bii ni ba ra ka tam ko ka ni ba ra ka gum ko ka sere bɛɛn yãanun san si i gbia i bɔɔra. 5Domi bɛɛn bwese kɛri kpuro sɔɔ, Lefin bwese kɛra Gusunɔ bɛsɛn Yinni u gɔsa bu ka sɔmburu ko win sãa yerɔ be, ka ben bibun bweseru sere ka baadommaɔ. 6Lefi goo ù n kĩ u yari Isirelin wuu gagun di mi u wãa u ka da mi Yinni Gusunɔn sãa yera wãa, 7u koo kpĩ u win sɔmburu ko mi, Gusunɔ win Yinnin wuswaaɔ nge mɛ win mɛro bisibu Lefi be u deema mi ba mɔ̀. 8Ba koo nùn dim wɛ̃wa mu n ka begim nɛ baa mɛ u ye u raa mɔ dɔra. 9Ì n tura tem mɛ sɔɔ, mɛ Gusunɔ bɛsɛn Yinni u bɛɛ wɛ̃, i ku ra mɛn tɔmbun sãaru saari te Yinni Gusunɔ u tusa. 10I ku ra de bɛɛ sɔɔ, goo u ka win bii yãkuru garu ko. I ku maa de goo u n sɔroru mɔ̀ bɛɛn suunu sɔɔ, 11ǹ kun mɛ u n gɔribu sokumɔ ǹ kun mɛ u n dobo doboba mɔ̀. 12Domi yeni kpurowa Yinni Gusunɔ u tusa. Yen sɔ̃na u koo tem min tɔn be kpuro gira bɛɛn wuswaan di, 13kpa bɛɛ i n sãa Gusunɔ bɛsɛn Yinnigibu mam mam. 14Domi bwese te i ko i gira mi, ba ra sɔroru kowa kpa bu kperin saria mɛɛri bu ka bikiaru ko. Adama Gusunɔ bɛsɛn Yinni u ǹ bɛɛ ye wurarimɔ. 15U koo bɛɛ win sɔmɔ goo seeya bɛɛn bweseru sɔɔn di nge nɛ, Mɔwisi. Wiya i ko i swaa daki. 16Domi yera i Yinni Gusunɔ bikia sanam mɛ i mɛnna Horɛbun guurɔ. I nɛɛ, i ǹ maa kĩ i Yinni Gusunɔn tiin nɔɔ nɔ ǹ kun mɛ i win dɔ̃ɔ boko wi wa. Domi i ǹ kĩ u bɛɛ go. 17Ma Yinni Gusunɔ u man sɔ̃ɔwa u nɛɛ, bɛɛn bikia bi, bu wã. 18U nɛɛ, u koo bɛɛ win sɔmɔ goo seeya bɛɛgibun suunu sɔɔn di nge nɛ, kpa u win gari doke win nɔɔ sɔɔ. Kpa sɔmɔ wi, u bɛɛ sɔ̃ kpuro ye u nùn yiire. 19Bɛɛn goo ù n yina u gari yi swaa daki yi sɔmɔ wi, u koo gere ka Gusunɔn yĩsiru, u koo yɛ̃ro sɛɛyasiawa. 20Adama sɔmɔ wi, ù n gari gɛɛ sosi ka Yinni Gusunɔn yĩsiru ye u ǹ nùn yiire u gere ǹ kun mɛ ù n gari gerua ka bũnun yĩsiru, ba koo nùn gowa. 21Sɔrɔkudo i ko i tii bikia i nɛɛ, amɔna sa ko n ka yɛ̃ gari yi Yinni Gusunɔ kun gerua. 22Gusunɔn sɔmɔ goo ù n gari gerua ka Yinni Gusunɔn yĩsiru, ma yi ǹ koore mɛ, yiya yi ǹ sãa Yinni Gusunɔn gere. Sɔmɔ wiya u win gari seka. I ku win bɛrum ko.

will be added

X\