Sɔ̃ɔsiru 17

1I ku ra Gusunɔ bɛsɛn Yinni yãkuru kua ka kɛtɛ ǹ kun mɛ ka yãaru ǹ kun mɛ ka boo, yen gaa yà n bararu garu ǹ kun mɛ alebu gaa mɔ, domi ya sãawa sese disigiru win mi. 2- 3Ì n da da i wãa wuu si Gusunɔ bɛsɛn Yinni u bɛɛ wɛ̃ sɔɔ, sɔrɔkudo sɔ̃ɔ teeru wuu sin gagu sɔɔ, tɔn durɔ goo ǹ kun mɛ tɔn kurɔ goo u koo Yinni Gusunɔ tɔnu kam kom kua u da u bũnu yiira u sã, ka mam sɔ̃ɔ ka suru ka kperi kpuro. Yeya ya ko n sãa kɔ̃sa Gusunɔn nɔni sɔɔ domi n ǹ mɛ u bɛɛ yiire i ko. 4Sanam mɛ i nua ba nɛɛ, goo u yen bweseru kua, i ko i yen gari wɛ̃ɛriwa ka laakari. Ì n deema yɛ̃ro u sese disigii te kuawa ka gem bɛɛ Isireliban tem sɔɔ, 5saa ye sɔɔra i ko i ka yɛ̃ro da wuun gbãra kɔnnɔwɔ ǹ n tɔn durɔn na, ǹ n maa tɔn kurɔn na kpa i nùn kpenu kasuku i go. 6I ku ra goo taarɛ wɛ̃ i go ma n kun mɔ tɔmbu yiru ǹ kun mɛ ita ba win seeda di. Tɔn turon seeda dibu kun tura. 7Seedagii beya ba koo gbi bu yɛ̃ro kpenu kasukum tore bu ka go kpa tɔn be ba tie bu sere maa swĩi. Nge mɛya i ko i ka kɔ̃sa ye wuna bɛɛn suunu sɔɔn di. 8Goo ù n tɔnu go ǹ kun mɛ gabu bà n sanna ǹ kun mɛ goo ù n goo mɛɛra kua, ma i kpana i bu siria, i seewo i ka bu da yam mi Gusunɔ bɛsɛn Yinni u koo tii gɔsia sɔɔ. 9I doo yãku kowobu Lefiban mi ka siri kowobun mi kpa bu bɛɛ sɔ̃ nge mɛ i ko i siri bi koosina. 10I ko i kowa dee dee ye ba bɛɛ sɔ̃ɔwa sãa yee ten min di tè Yinni Gusunɔ u tii gɔsia. 11I ko i wooda ka sɔ̃ɔsi ni ba bɛɛ wɛ̃ mi mɛm nɔɔwawa mam mam. I ku ra yen gaa yina. 12Wi u tii sua ma u yina u yãku kowo wi u Gusunɔ bɛsɛn Yinnin sɔmburu mɔ̀ mi ka siri kowon gari swaa daki, ba koo yɛ̃ro gowa. Nge mɛya i ko i ka kɔ̃sa wuna bɛɛ Isireliban suunu sɔɔn di 13kpa tɔnu baawure wi u ye nua u nanda kpa goo u ku maa tii sua. 14Sanam mɛ i dua i wãa tem mɛ Gusunɔ bɛsɛn Yinni u bɛɛ wɛ̃ɛmɔ sɔɔ, ma i gerua i nɛɛ, i kĩ i n sina boko mɔwa nge mɛ bwese ni nu bɛɛ sikerenɛ nu mɔ, 15wi Gusunɔ bɛsɛn Yinni u gɔsa, wiya i ko i swĩi u ko sina boko. U ko n sãawa Isireli. I ku ra de sɔɔ wi i ǹ sãa bwese teeru u ko bɛɛn sina boko. 16Sina boko wi, u ǹ ko u n dumi mɔ dabi dabiru. U ǹ ko u n da maa gabu gɔri Egibitiɔ bu dumi dweema. Domi Yinni Gusunɔ u bɛɛ sɔ̃ɔwa u nɛɛ, u ǹ kĩ i maa wura mi. 17Win kurɔbu ba ǹ ko ba n dabi win gɔ̃ru gu ku raa ka gɛra Gusunɔn min di. U ǹ koo maa tii sii geesu ka wura sweena siki siki. 18Sina boko wi, ù n sina gɔna sina u kpa, u koo de bu nùn wooda yeni yoruawa tireru sɔɔ ye ya ko n wãa yãku kowo Lefiban mi. 19Tire te, ta ko n wãawa win bɔkuɔ kpa u n da tu gari tɔ̃ɔ baatere win wãarun tɔ̃ru kpuro sɔɔ kpa u ka gia nge mɛ u koo Gusunɔ win Yinni nasia, u win woodaba ka win yiirebu mɛm nɔɔwa. 20Kpa u ku tii sua u n tamaa u win Isirelisibu kerewa kpa u ku wooda yen gaa yina kpa wi ka win bibun bweserun bandu tu dakaa da Isireliban suunu sɔɔ.

will be added

X\