Sɔ̃ɔsiru 16

1Suru wi ba mɔ̀ Abibu sɔɔ, i ku ra duari i Gɔɔ sararibun tɔ̃ɔ bakaru di Gusunɔ bɛsɛn Yinnin sɔ̃. Domi suru wi sɔɔra u bɛɛ yara Egibitin di wɔ̃kuru. 2Yɛɛ yi i ko i wuna bɛɛn yaa sabenu sɔɔ i ka Gusunɔ bɛsɛn Yinni yãkuru kua Gɔɔ sararibun tɔ̃ɔ baka te sɔɔ, yiya, yãanu ka bonu ka kɛtɛba. I ko i tɔ̃ɔ baka te diwa Yinni Gusunɔn sãa yerɔ te u gɔsa. 3Tɔ̃ɔ baka ten sɔ̃ɔ nɔɔba yiru ye sɔɔ, i ǹ pɛ̃ɛ dimɔ ye ba seeyatia doke. Ye ba ǹ seeyatia dokewa i ko i di yèn sɔ̃ ka duka i yara Egibitin di. Ì n nɔni swãarun pɛ̃ɛ ye dimɔ, nge mɛya bɛɛn wãaru kpuro sɔɔ i ko i ka tɔ̃ɔ baka te yaaya tè sɔɔ i yara Egibitin di. 4Sɔ̃ɔ nɔɔba yiru ye sɔɔ, i ǹ ko i de pɛ̃ɛ seeyatia ya n wãa bɛɛn tem mɛ kpuro sɔɔ. I ǹ maa yaa ye i ka yãkuru kua tɔ̃ɔ gbiikirun yoka yiimɔ sere sisiru bururu. 5I ku ra tɔ̃ɔ baka te di bɛɛn wusu kpuro sɔɔ mi Gusunɔ bɛsɛn Yinni u bɛɛ swĩi, 6ma n kun mɔ wuu ge u gɔsa sɔɔ, mi win sãa yeru ta wãa. I ko i yãkuru kowa yoka sanam mɛ sɔ̃ɔ u dua nge saa ye i yarima Egibitin din saka. 7I ko i yaa sabe te wɔ̃wa kpa i tu tem yam mi Gusunɔ bɛsɛn Yinni u gɔsa mi. Ì n tɔ̃ɔ baka te di i kpa, yen sisiru bururu, kpa i gɔsira i wura bɛɛn wusɔ. 8Sɔ̃ɔ nɔɔba tia sɔɔ, i ko i pɛ̃ɛ diwa ye ba ǹ seeyatia doke. Sɔ̃ɔ nɔɔba yiruse, kpa i mɛnna Gusunɔ bɛsɛn Yinnin sɔ̃. I ǹ ko i sɔmburu garu ko tɔ̃ɔ te sɔɔ. 9Saa yèn di i dĩanu gɛ̃ɛbu torua, i ko i alusuma gariwa yu ka ko nɔɔba yiru. 10Yen biru, kpa i Gusunɔ bɛsɛn Yinni gɛ̃ɛbun tɔ̃ɔ bakaru diiya kpa i maa ka nùn kɛ̃nu naawa ye u domaru kua u bɛɛ wɛ̃ sɔɔ. 11I ko i nuku dobu ko win wuswaaɔ win sãa yee te u gɔsa sɔɔ bɛɛ ka bɛɛn bii tɔn durɔbu ka tɔn kurɔbu ka bɛɛn sɔm kowo tɔn durɔbu ka tɔn kurɔbu ka Lefiba ka sɔbu ka gobekuba ka gɔminibu, be kpuro gesi be ba wãa bɛɛn suunu sɔɔ. 12I wooda be mɛm nɔɔwɔ kpa i ka sɔmburu ko. I yaayo ma i raa sãawa yobu Egibitiɔ. 13Ì n bɛɛn gbean dĩa bimiginu so i kpa, ma i bɛɛn resɛm binu gama i kpa, i ko i Kunun tɔ̃ɔ bakaru diwa sɔ̃ɔ nɔɔba yiru. 14I ko i nuku dobu kowa tɔ̃ɔ baka te sɔɔ, bɛɛ ka bɛɛn bii tɔn durɔbu ka tɔn kurɔbu ka bɛɛn sɔm kowo tɔn durɔbu ka tɔn kurɔbu ka Lefiba ka sɔbu ka gobekuba ka gɔminibu be ba wãa bɛɛn suunu sɔɔ. 15I ko i Gusunɔ bɛsɛn Yinni tɔ̃ɔ baka te diiyawa sɔ̃ɔ nɔɔba yiru sãa yee te u gɔsa sɔɔ. Domi u koo bɛɛn gbean dĩanu ka sɔma ye i mɔ̀ kpuro domaru kua kpa i n wãa nuku dobu sɔɔ mam mam. 16Wɔ̃ɔ baagere, nɔn itawa bɛɛn tɔn durɔbu kpuro ba ko n da de Gusunɔ bɛsɛn Yinnin sãa yerɔ te u gɔsa. Saa yera, pɛ̃ɛ ye ba ǹ seeyatia doken tɔ̃ɔ bakarun saa ka gɛ̃ɛbun tɔ̃ɔ bakarun saa ka kunun tɔ̃ɔ bakarun saa. Adama bu ku da mi ka nɔm dira. 17Ben baawure u koo ka kɛ̃ru dawa mɛ̀n nɔru u koo kpĩ ye Gusunɔ bɛsɛn Yinni u domaru kua u nùn wɛ̃ sɔɔ. 18I ko i bɛɛn bwese kɛri sɔɔ siri kowobu ka wirugibu swĩiwa bɛɛn wusu kpuro sɔɔ si Gusunɔ bɛsɛn Yinni u bɛɛ wɛ̃. Kpa ba n da tɔmbu siri gem sɔɔ. 19I ku ra siri ka murafitiru, i ku ra goo gem wɛ̃ win bɛɛrɛn sɔ̃. I ku ra maa nɔm biran kɛ̃ru mwa domi ta ra laakarigibun nɔni wɔ̃kewa kpa tu gemgibun gere gɔsia. 20I ko i gem swĩiwa mam mam kpa i wa i n wãa, kpa i tem mɛ mwa mɛ Gusunɔ bɛsɛn Yinni u bɛɛ wɛ̃ɛmɔ. 21I ku ra bũu dãru garu gira yãku yerun bɔkuɔ te i ko i Gusunɔ bɛsɛn Yinni bania. 22I ku ra maa kperu garu gira ta n sãa bũu, domi Gusunɔ bɛsɛn Yinni u ye kpuro tusa.

will be added

X\