Sɔ̃ɔsiru 15

1I ko i n da be ba bɛɛn dibu nɛni karewa wɔ̃ɔ nɔɔba yiru ka wɔ̃ɔ nɔɔba yiru. 2Wee nge mɛ i ko i ka wooda ye sɔmburu koosina. Sanam mɛ ba dibu karabun gari kpara Yinni Gusunɔn sɔ̃, n weenɛwa be ba ben winsim gobi bɔkura bu yɛ̃robu dii bi kara, kpa bu ku maa bu gãanu bikia. 3I ko i kpĩ i sɔbu baasi bu ka bɛɛ bɛɛn dibu kɔsia, adama i ko i bɛɛn mɛro bisibu karawa. 4- 5Ì n gesi Gusunɔ bɛsɛn Yinnin nɔɔ nua, i win woodaba mɛm nɔɔwa mam mam be na bɛɛ wɛ̃ɛmɔ gisɔ, u koo bɛɛ domaru kua tem mɛ u koo bɛɛ wɛ̃ sɔɔ kpa sãaro u kun wãa bɛɛ sɔɔ. 6U koo bɛɛ domaru kua nge mɛ u bɛɛ nɔɔ mwɛɛru kua. I ko i bwese tuku dabinu gobi bɔkura, adama bɛɛ, i ǹ ko i n gobi bɔkurabun bukata mɔ. I ko i bwese tuku dabinu kera, adama nu ǹ kpɛ̃ nu bɛɛ kera. 7Ka mɛ, bɛɛn goo ù n sãa sãaro tem mɛ Gusunɔ bɛɛn Yinni u koo bɛɛ wɛ̃n wuu gagu sɔɔ, i ku ra gɔbia i yina i nùn gobi bɔkura. 8I ko i nùn bɔkurawa ka nuku tia yìn bukata u mɔ. 9I laakari ko, kpa i ku ra nuku kɔ̃su bwisikunu ko i nɛɛ, wɔ̃ɔ nɔɔba yiruse wee ya turuku kooma yè sɔɔ ba ra dibugibu kare, kpa i sɛ̃sia i yina i nùn bɔkura. Ì n kua mɛ, u koo Yinni Gusunɔ nɔɔgiru sue bɛɛn sɔ̃, kpa i yen taarɛn are sɔbe. 10I nùn bɔkuro ka nuku tia. Ì n kua mɛ, Gusunɔ bɛsɛn Yinni u koo bɛɛn sɔma kpuro domaru kua ye i mɔ̀. 11Sãarobu ba ko n wãawa tem mɛ sɔɔ saa kpuro. Yen sɔ̃na na bɛɛ wooda yeni wɛ̃ na nɛɛ, i de i n sãa nuku tiagibu bɛɛn mɛro bisi be ba sãa sãarobu ka wɔnwɔndobu sɔɔ. 12Bɛɛn Heberusi goo, tɔn durɔ ǹ kun mɛ tɔn kurɔ ù n tii bɛɛ dɔre, u koo bɛɛ sɔmburu kuawa wɔ̃ɔ nɔɔba tia. Wɔ̃ɔ nɔɔba yiruse i ko i nùn karawa u doona. 13Ì n nùn karamɔ, i ku de u doona nɔm dira. 14I ko i nùn kɛ̃ru wɛ̃wa bɛɛn yaa sabenu sɔɔ ka bɛɛn alikama sɔɔ ka tam sɔɔ, kpuro sɔɔ gesi ye Gusunɔ bɛsɛn Yinni u koo bɛɛ domaru kua. 15I yaayo ma i raa yoru di Egibitiɔ, ma Gusunɔ bɛsɛn Yinni u bɛɛ yakia. Yen sɔ̃na na bɛɛ wooda yeni wɛ̃ɛmɔ gisɔ. 16Bɛɛn yoo goo ù n nɛɛ, u ǹ yariɔ bɛɛn min di yèn sɔ̃ u bɛɛ ka bɛɛn yɛnugibu kĩ, u maa dobu nɔɔmɔ bɛɛn mi, 17saa ye sɔɔ, u koo gambo gballiwa kpa i sɔkura sua i ka win swaa yaba kpa u ko bɛɛn yoo sere ka baadommaɔ. Nge mɛya i ko i maa yoo tɔn kurɔn tii kua. 18I ku ra de n bɛɛ sɛ̃sie i ka yoo kara u doona bɛɛn min di yèn sɔ̃ sɔmbu te u bɛɛ kua wɔ̃ɔ nɔɔba tia sɔɔ ta bɛɛ sɔm kowo wi i kɔsiamɔn aren nɔn yiru wɛ̃, kpa Gusunɔ bɛɛn Yinni u bɛɛ domaru kua ye i mɔ̀ kpuro sɔɔ. 19I ko i bɛɛn nɛɛ ka bɛɛn yãanu ka bɛɛn bonun bii gbiikii dwanu Gusunɔ bɛsɛn Yinni yiiyewa. I ku ra ka bɛɛn nɛɛn bii gbiikinu sɔmburu ko, i ku ra maa bɛɛn yãanun bii gbiikinun sansu bɔɔri. 20I ko i n da nin yaa temwa bɛɛ ka bɛɛn yɛnugibu wɔ̃ɔ baagere Gusunɔ bɛsɛn Yinnin sãa yerɔ te u gɔsa. 21Yaa sabe nin garu tà n naasu barɔ ǹ kun mɛ tà n wɔ̃ko sãa ǹ kun mɛ tà n alebu gaa mɔ, i ku ra ka tu Gusunɔ bɛɛn Yinni yãkuru kua. 22I ko i ten yaa temwa yɛnuɔ. Wi u dɛɛre ka wi u ǹ dɛɛre, be kpurowa ba koo ye tem nge mɛ ba ra nɛmu ka gina tem. 23Adama i ku ra yen yɛm di. I ko i mu yariwa temɔ nge nim.

will be added

X\