Sɔ̃ɔsiru 14

1Bɛɛ Isireliba, i sãawa Gusunɔ bɛsɛn Yinnin tɔmbu. Goo ù n gu, i ku ra bɛɛn wasin gam mura. I ku ra maa bɛɛn seri kɔni wuswaa gia. 2Domi i sãawa bwese te Gusunɔ bɛsɛn Yinni u gɔsa nɛnɛm. Handunian bwesenu kpuro sɔɔ, bɛɛya u gɔsa i n ka sãa win tɔmbu. 3I ku ra gãa disiginu di. 4Yɛɛ yi i ko i di, yiya naa ka yãaru ka boo 5ka yaa kpiku ka nɛmu ka kpasa ka kpee boo ka gini bukaru ka kpee bɛra ka gina. 6Yɛɛ yi yi naa kaburosu yiru mɔ ma yi ra tuka ko, yi kpurowa i ko i di. 7Adama i ku ra yaa di ye ya ra tuka ko tɔna ǹ kun mɛ ye ya naa kaburosu yiru mɔ tɔna. Nge mɛya i ku ra yooyoo di ka saataburu ka maa damaa. Yɛɛ yi, yi ra tuka ko adama yi ǹ naa kaburosu yiru yiru mɔ. I ko i yi garisiwa disigii. 8I ku ra kurusɔ di ge, ge ga naa kaburosu yiru yiru mɔ, adama ga ku ra tuka ko. I ko i gu garisiwa disiguu. I ku ra yɛɛ yin gaa di, i ku ra maa yin gaan goru baba. 9Yɛɛ yi yi wãa nim sɔɔ i ko i di yiya, yɛɛ yi yi kɛ̃ɛritii ka kokosu mɔ kpuro. 10Adama yi yi ǹ kɛ̃ɛritii ka kokosu mɔ, i ku ra yi di. I ko i yi garisiwa disigii. 11Gunɔ ge ga dɛɛre kpurowa i ko i di. 12Adama gunɔ si i ǹ dimɔ siya, gunɔ bakeru ka yabereku ka gunɔ bake te ta ra n wãa nim wɔ̃kuɔ 13ka bɔsu sooku ka siro ka ye ya ka gu weenɛ kpuro 14ka gbanamgbaaru ka ye ya ka tu weenɛ kpuro 15ka taataaru ka booro ka kparuko yãatam barebu ka kasa ka ye ya ka ye weenɛ kpuro 16ka booron bweseru baatere 17ka gbamgbayaku ka tionko ka swãa wĩaku 18ka nim kpakpayɛ ka bukaabo ka ye ya ka ye weenɛ kpuro ka kpurabu ka sere kɔ̃ɔ. 19I ko i kɔkɔmii ni nu ra yɔ̃ yɔ̃ garisiwa disiginu. I ku ra nu di. 20Adama ni nu dɛɛre kpurowa i ko i kpĩ i di. 21I ku ra yaa gaa di ye ya ka tii gu. I ye sɔɔ wi u wãa bɛɛn yɛnuɔ kɛ̃ɛyɔ u di ǹ kun mɛ i ye sɔbu gabu dɔre. Domi i sãawa Gusunɔ bɛsɛn Yinnin tɔmbu mam mam. I ku ra maa boo buu yike ka gen mɛron bom. 22Wɔ̃ɔ baagere, bɛɛn gbean dĩanu sɔɔ, wɔkuru baateren wɔllɔ tia tiawa i ko i n da wunɛ, 23kpa i n da ka de Gusunɔ bɛsɛn Yinnin sãa yerɔ te u gɔsa. I ko i tia tia ye wuna bɛɛn alikama sɔɔ ka dãa bii ni ba ra ka tam ko sɔɔ ka ni ba ra ka gum ko sɔɔ, kpa i ye di mi, ka bɛɛn nɛɛ ka bɛɛn yãanu ka bɛɛn bonun bii gbiikinu. Ye kpurowa i ko i n da di mi, kpa i ka gia nge mɛ i ko i n da Gusunɔ bɛɛn Yinni nasie baadomma. 24Sanam mɛ Gusunɔ bɛsɛn Yinni u koo bɛɛ domaru kua ma bɛɛn dĩanu nu koora, sɔrɔkudo i ǹ kpĩa i ka tia tia ye na ye i wuna wɔkuru baateren wɔllɔ yèn sɔ̃ bɛɛn gbabura toma ka win sãa yee te u gɔsa mi. 25Saa ye sɔɔ, i ko i tia tia ye dɔrawa yè i wuna wɔkuru baateren wɔllɔ mi, kpa i yen gobi nɛnuma i ka na Gusunɔ bɛsɛn Yinnin sãa yerɔ te u gɔsa. 26Miya i ko i ka gobi yi nɛɛ dwe ka yãanu ǹ kun mɛ bonu ka tam mɛ mu du ka mɛ mu bɔ ye ya koo ka bɛɛ naawa kpuro gesi kpa i ye di mi, i n ka Gusunɔ bɛɛn Yinni sãamɔ, kpa i n nuku dobu mɔ̀ bɛɛ ka bɛɛn yɛnugibu. 27Saa ye sɔɔ, i ku ra Lefiba duari be ba wãa bɛɛn wusɔ, domi ba ǹ tem mɔ bɛɛn suunu sɔɔ. 28I ko i n da wɔ̃ɔ itase ka wɔ̃ɔ itasen wɔkuru baateren wɔllɔn tia tia yiwa bɛɛn wusɔ, 29kpa ya n sãa Lefibagia be, be ba ǹ tem mɔ bɛɛn suunu sɔɔ ka sɔbugia ka gobekubagia ka gɔminibugia be ba wãa bɛɛn suunu sɔɔ, kpa bu di bu debu kpa Gusunɔ bɛsɛn Yinni u bɛɛ domaru kua bɛɛn sɔma kpuro sɔɔ ye i mɔ̀.

will be added

X\