Sɔ̃ɔsiru 13

1I ko i wooda be kpuro mɛm nɔɔwawa be na bɛɛ wɛ̃ mi. I ku ra gãanu ganu sosi, i ku ra maa gãanu ganu kawa be sɔɔ. 2Bɛɛn suunu sɔɔ, Gusunɔn sɔmɔ goo ǹ kun mɛ yam wao goo ù n bɛɛ maamaakin gari sɔ̃ɔwa, 3ma ye yɛ̃ro u bɛɛ sɔ̃ɔwa mi, ya koora, ma u bɛɛ sɔ̃ɔwa u nɛɛ, i da i bũnu sã ni i ǹ daa yɛ̃, 4i ku ra win gari nɔ. Domi Gusunɔ bɛsɛn Yinniwa u bɛɛn laakari mɛɛrimɔ u ka wa ì n nùn kĩn na ka bɛɛn gɔ̃ru kpuro ka bɛɛn bwɛ̃ra kpuro. 5Gusunɔ bɛsɛn Yinni turowa i ko i kasu kpa i nùn nasia. I win woodaba nɔni dokeo, i nùn mɛm nɔɔwa, kpa i nùn sã kpa i n ka nùn maninɛ. 6I ko sɔmɔ wi, ǹ kun mɛ yam wao wi gowa wi u bɛɛ bɔriamɔ i ka Gusunɔ bɛsɛn Yinni deri wi u sun yarama Egibitin di mi sa yoru di. I ko yɛ̃ro gowa yèn sɔ̃ u kĩ u bɛɛ gɛrasia Gusunɔ bɛsɛn Yinnin swaan di, ye u sun sɔ̃ɔwa su swĩi. Nge mɛya i ko i ka kɔ̃sa kpeerasia bɛɛn suunu sɔɔn di. 7- 8Bwese tukunu nu ko n bɛɛ sikerenɛ, ganu nu n wãa turuku kpa ganu nu n wãa n toma handunian goonu nnɛ kpuro sɔɔ, nu n bũnu sãamɔ ni bɛɛ ka bɛɛn baababa i ǹ daa yɛ̃. Sɔrɔkudo bɛɛn mɔɔ ǹ kun mɛ bɛɛn wɔnɔ ǹ kun mɛ bɛɛn bii tɔn durɔ ǹ kun mɛ tɔn kurɔ ǹ kun mɛ bɛɛn kurɔ ǹ kun mɛ bɛɛn bɔrɔ kĩnasi goo u koo bɛɛ kɔkiri asiri sɔɔ u nɛɛ, i da i bũu ni sã. 9I ku ra yɛ̃ro swaa daki i win gari gem mwa. I ku ra maa win wɔnwɔndu ko i sere nùn biru wukiri. 10Adama i ko i nùn gowa. Wunɛ wi u kɔkura, wuna kaa gbi a nùn kpenu kasukum tore a ka go, tɔn be ba tie bu sere nun swĩi. 11I ko i nùn kpenu kasuku i gowa yèn sɔ̃ u kasu u bɛɛ gɛrasia Gusunɔ bɛsɛn Yinnin swaan di wi u sun yarama Egibitin di mi sa yoru di. 12Mɛya n ko n sãa kpa bɛɛ Isireliba kpuro i nɔ, kpa i bɛrum soora i ku maa ka kɔ̃sa yen bweseru ko bɛɛn suunu sɔɔ. 13- 14Sɔrɔkudo wuu si Gusunɔ u bɛɛ wɛ̃n teu sɔɔ, tɔn kɔ̃sobu gabu ba koo wuugibu kɔkiri bu nɛɛ, bu da bu bũnu sã ni, ni i ǹ daa yɛ̃. Ì n nua mɛ, 15i ko i gari yin kaso kowa i yi wɛ̃ɛri kpa i yi bikikia ka laakari i wa bà n kɔ̃sa ye kuan na ka gem. 16Bà n ye kuan na, saa yera i ko wuu gen tɔmbu kpuro go ka ben yaa sabenu kpa i wuu gen tii kpeerasia ka ye ya wãa ge sɔɔ. 17I ko i wuu gen arumani kpuro mɛnnawa gen yaaraɔ mi ba ra mɛnnɛ, kpa i wuu ge ka arumani ye kpuro dɔ̃ɔ mɛni muku muku. Ya ko n sãawa nge yãku dɔ̃ɔ mwaararugiru te i Gusunɔ bɛɛn Yinni kua. Wuu ge, ga ko n sãawa bansu sere ka baadommaɔ. Ba ǹ maa su seeyamɔ. 18- 19I ku ra maa tii gãanu yiiya arumani ye sɔɔ. Ya ko n sãawa Gusunɔ bɛsɛn Yinnigia, kpa win mɔru yu wa yu sure. Ì n win nɔɔ nua ma i win woodaba kpuro mɛm nɔɔwa be na bɛɛ wɛ̃ɛmɔ gisɔ, kpa i n mɔ̀ ye ya wã win nɔni sɔɔ, u koo bɛɛ wɔnwɔndu ka durom kua, kpa i dabia nge mɛ u bɛsɛn baababa yen nɔɔ mwɛɛru kua ka bɔ̃ri.

will be added

X\