Sɔ̃ɔsiru 12

1Woodaba ka yiirebu wee ye i ko i mɛm nɔɔwa i ka sɔmburu ko bɛɛn wãarun tɔ̃ru kpuro sɔɔ tem mɛ sɔɔ, mɛ Gusunɔ bɛsɛn baababan Yinni u bɛɛ wɛ̃ɛmɔ. 2I ko i bwese ni i ko i gira min bũnun sãa yenu kpuro kɔsukuwa mam mam guunɔ ka gungunɔ ka dãa kubenɔ. 3I ko i ben yãku yenu suririwa, kpa i ben bũu turanu kɔsuku. I ko i ben bwãarokunu bɔɔkuwa i dɔ̃ɔ mɛni kpa bu ku maa nin yĩsinu yaaya yam mi kpuro sɔɔ. 4I ku bwese tuku nin komanu saari ì n Gusunɔ bɛsɛn Yinni sãamɔ. 5Yam mi u koo gɔsi u win wãa yeru ko, miya bɛɛ kpuro i ko i da i nùn sã kpa u bɛɛ win tii sɔ̃ɔsi mi. 6Miya i ko i n da ka bɛɛn yãku dɔ̃ɔ mwaararuginu de ka siarabun yãkunu ka bɛɛn ye i mɔ kpuron wɔkuru baateren wɔllɔn tia tia ka bɛɛn gbean dĩa gbiikinu ka kɛ̃nu ka maa kɛ̃ɛ ni i kua i ka bɛɛn nɔɔ mwɛɛnu yibia ka sere maa bɛɛn yaa sabenun bii gbiikinu. 7Gusunɔ bɛɛn Yinnin sãa yeru miya i ko i yãku diiranun sukum di sannu bɛɛ ka bɛɛn yɛnugibu kpa i n nuku dobu yiba yèn sɔ̃ u bɛɛ domaru kua ye i kua kpuro sɔɔ. 8Saa ye, i ǹ ko i maa Yinni Gusunɔ sã nge mɛ sa mɔ̀ mini gisɔ mi baawure u mɔ̀ ye u kĩ. 9Geema, i ǹ gina tura tem mɛ sɔɔ, mɛ Gusunɔ bɛsɛn Yinni u koo bɛɛ wɛ̃ kpa i n ka wãaru dimɔ bɔri yɛndu sɔɔ. 10Adama i ko i Yuudɛni tɔbura kpa i sina tem mɛ sɔɔ mɛ u bɛɛ wɛ̃ɛmɔ mi. U koo bɛɛ wɛ̃rabu wɛ̃ sanam mɛ u koo bɛɛ wɔra bɛɛn yibɛrɛba kpuron nɔman di be ba bɛɛ sikerenɛ kpa i sina mi ka bɔri yɛndu. 11Miya Gusunɔ bɛsɛn Yinni u koo win wãa yeru gɔsi mi u koo bɛɛ win tii sɔ̃ɔsi. Miya i ko i n da ka bɛɛn yãku dɔ̃ɔ mwaararuginu de ka siarabun yãkunu ka bɛɛn ye i mɔ kpuron wɔkuru baateren wɔllɔn tia tia ka bɛɛn gbean dĩa gbiikinu ka kɛ̃nu ka sere maa kɛ̃ɛ ni i kua i ka bɛɛn nɔɔ mwɛɛnu yibia nge mɛ na raa bɛɛ sɔ̃ɔwa. 12Gusunɔ bɛsɛn Yinnin sãa yeru miya i ko i nuku dobu ko bɛɛ ka bɛɛn bii tɔn durɔbu ka tɔn kurɔbu ka bɛɛn sɔm kowo tɔn durɔbu ka tɔn kurɔbu ka Lefi be ba wãa bɛɛn suunu sɔɔ yèn sɔ̃ ba ǹ ben tiin tem mɔ. 13I n tii sɛ kpa i ku ra yãku dɔ̃ɔ mwaararuginu ko yãku turanu kpuron mi, ni i ko i wa. 14Adama i ko i nu kowa yam mi Yinni Gusunɔ u koo gɔsi bɛɛn bwese kɛri tian temɔ kpa i ko mi kpuro ye na bɛɛ yiiremɔ. 15Arumani ye Gusunɔ bɛsɛn Yinni u koo bɛɛ wɛ̃ sɔɔ, mi i wãa, i ko i kpĩ i yaa go i tem saa ye i kĩ. Be ba dɛɛre ka be ba kun dɛɛre, be kpuro ba koo kpĩ bu ye tem nge mɛ ba ra nɛmu ka gina tem. 16Yen yɛm tɔnawa i ǹ dimɔ. I ko i mu yariwa temɔ nge nim. 17I ku ra wɔkuru baateren wɔllɔn tia tia di bɛɛn yɛnuɔ, ye i wuna alikama sɔɔ ka dãa binu sɔɔ ni ba ra ka tam ko ka ni ba ra ka gum ko. I ku maa bɛɛn nɛɛ ka bɛɛn yãanu ka bɛɛn bonun bii gbiikinu di bɛɛn yɛnusɔ ka kɛ̃nu ka kɛ̃ɛ ni i kua i ka bɛɛn nɔɔ mwɛɛnu yibia ka sere maa bɛɛn gbean dĩa gbiikinu. 18Adama i ko i ye diwa sãa yerɔ te Gusunɔ bɛsɛn Yinni u gɔsa bɛɛ ka bɛɛn bii tɔn durɔbu ka tɔn kurɔbu ka bɛɛn sɔm kowo tɔn durɔbu ka tɔn kurɔbu ka Lefi be ba wãa bɛɛn suunu sɔɔ. Miya i ko i nuku dobu ko arumani ye i ko i n mɔn sɔ̃. 19I n tii sɛ saa kpuro ye i ko i n wãa bɛɛn tem mɛ sɔɔ kpa i ku ra Lefiba biru kisi. 20Sanam mɛ Gusunɔ bɛsɛn Yinni u koo bɛɛn tem yasiasia nge mɛ u bɛɛ nɔɔ mwɛɛru kua, saa ye, yaa yà n bɛɛ binɛ mɔ̀, i ko i kpĩ i ye tem nge mɛ i kĩ. 21Sãa yee te Gusunɔ bɛsɛn Yinni u gɔsa tà n ka bɛɛ toma, i ko i kpĩ i yaa sabenu wuna bɛɛn naa gɔ̃ɔ ka bɛɛn yãa gɔ̃ɔ ka bɛɛn boo gɔ̃ɔ sɔɔn di nge mɛ na bɛɛ yiire, kpa i ye go i tem bɛɛn yɛnusɔ nge mɛ i kĩ. 22Wi u dɛɛre ka wi u kun dɛɛre, bɛɛ kpurowa i ko i ye tem nge mɛ ba ra nɛmu ka gina tem. 23Adama i tii nɛnuɔ kpa i ku ra yaa yen yɛm di domi yɛm mɛya mu sãa yen wãaru. N ǹ maa weenɛ i yaa ye mɛnna i di ka yen wãaru sannu. 24I ko i mu yariwa temɔ nge nim. 25Ì n kua mɛ, i ko i bɔri yɛndu wa bɛɛ ka bɛɛn bibun bweseru domi i kua ye ya koo Yinni Gusunɔ wɛ̃re. 26Adama ye i Yinni Gusunɔ yiiya ka kɛ̃ɛ ni i kua i ka bɛɛn nɔɔ mwɛɛnu yibia, i ko ka ye kpuro dawa win sãa yerɔ te u gɔsa. 27Ì n yãku dɔ̃ɔ mwaararuginu mɔ̀, yaa ka yen yɛm sanna i ko i mɛnna i yi Gusunɔ bɛsɛn Yinnin yãku yeru wɔllɔ. Ì n maa siarabun yãkunu mɔ̀, i ko i yen yɛm yariwa yãku yeru wɔllɔ kpa i yen yaa tem. 28I sɔ̃ɔsi ni kpuro swaa dakio, i nu mɛm nɔɔwa ni na bɛɛ wɛ̃ mi, kpa i wa i n bɔri yɛndu mɔ sere ka baadommaɔ bɛɛ ka bɛɛn bibun bweseru, kpa i n mɔ̀ ye ya wã ya Gusunɔ bɛsɛn Yinni doremɔ. 29Gusunɔ bɛsɛn Yinni u koo bwese ni kpeerasia ni i ko i gira mi. Sanam mɛ i nu gira i sina nin temɔ, 30i n tii sɛ kpa i ku ra de nu bɛɛ yina mwa i nin kookoosu saari. I ku ra kasu i gia nge mɛ nu ra ka nin bũnu sã, kpa i gere i nɛɛ, i ko i kowa nge mɛ. 31I ku ra bu saari ì n Gusunɔ bɛsɛn Yinni sãamɔ, domi bà n sãaru mɔ̀, gãa disigina ba ra n mɔ̀ ni Gusunɔ u tusa. Ba ra mam ben bũnu yãku dɔ̃ɔ mwaararuginu kuewa ka ben bii tɔn durɔbu ka tɔn kurɔbu.

will be added

X\