Daniɛli 9

1Saa ye Darusi, Asuresin bii, Mɛdin bweseru u bandu dii Babilonin temɔ, 2win bandun wɔ̃ɔ gbiikuu sɔɔ, Daniɛli u tirenu mɛɛrimɔ ma u girari mi Yinni Gusunɔ u win sɔmɔ Yeremi sɔ̃ɔwa u nɛɛ, wɔ̃ɔ wata ka wɔkura Yerusalɛmu ya ko n sãa bansu. 3Ma u nɔɔ bɔkua u saaki deewa u tii torom wisi nuku sankiranun sɔ̃. Ma u kanaru koosi Yinni Gusunɔn mi gia, 4u win tɔmbun toranu tuuba mɔ̀. U nɛɛ, Yinni Gusunɔ, a kpã ma sa nun nasie. A ra wunɛn nɔɔ mwɛɛru yibie kpa a wunɛgibu kĩru sɔ̃ɔsi be ba nun kĩ ba wunɛn woodaba mɛm nɔɔwammɛ. 5Sa tora, sa daa kɔ̃sa kua, sa sãa nuku kɔ̃surugibu, sa wunɛn gari yina, sa maa wunɛn woodaba sara. 6Sa ǹ wunɛn sɔmɔbu swaa daki sanam mɛ ba bɛsɛn sinambu ka bɛsɛn wirugibu ka bɛsɛn baababa ka bɛsɛn tɔmbu kpuro wunɛn gari sɔ̃ɔwa. 7Yinni Gusunɔ, a sãawa gemgii. Bɛsɛra sa tora. Ma sa wãa sekuru sɔɔ gisɔ bɛsɛ Yudaba ka be ba wãa Yerusalɛmuɔ ka Isireliba kpuro be a yarinasia tontondeɔ ka turukuɔ yèn sɔ̃ sa ǹ nun mɛm nɔɔwɛ. 8Yinni, wee sa sekuru sɔɔwa bɛsɛ ka bɛsɛn sinambu ka bɛsɛn wirugibu ka bɛsɛn baababa. Domi sa nun torari. 9Gusunɔ bɛsɛn Yinni, a sun suuru kuo wunɛn wɔnwɔndun saabu baa mɛ sa wunɛn gari yina. 10Sa ǹ maa wunɛn gere swaa daki su sere nɛɛ, sa ko wunɛn woodaba swĩi ye wunɛn sɔmɔbu ba sun nɔɔsia. 11Mɛya bɛsɛ Isireliba kpuro sa wunɛn woodaba sara, sa ǹ wunɛn gere swaa daki. Sa tora. Yen sɔ̃na bɔ̃ri yi a dera wunɛn sɔm kowo Mɔwisi u yorua woodan tireru sɔɔ yi sun di. 12Nge mɛya a dera wunɛn gari yi koora yi a nɛɛ, kaa bɛsɛ ka bɛsɛn wirugibu kua. A dera Yerusalɛmu ya nɔni swãaru wa tèn bweseru ba ǹ waare gam. 13Wahala ye kpuro, ya sun deema nge mɛ Mɔwisi u yorua woodan tireru sɔɔ. Ka mɛ, sa ǹ bɛsɛn daa kɔ̃sa deri su wunɛn gem swĩi kpa su wunɛn kĩi geeru kasu. 14Gusunɔ bɛsɛn Yinni, wahala ye a nɛɛ, sa ko wa, yera ya sun deema. Ye a kua kpuro ya sãawa dee dee. Bɛsɛra sa ǹ nun mɛm nɔɔwɛ. 15Gusunɔ bɛsɛn Yinni, ye a sun yarama Egibitin tem di, wunɛn dam mu sɔ̃ɔsira. A yĩsiru yara te ta wãa sere ka gisɔ. Adama bɛsɛ, sa durum ka daa kɔ̃sa kua gem gem. 16Tɛ̃ Yinni, na nun kanamɔ wunɛn durom sɔ̃, a de wunɛn mɔru yu doona wunɛn wuu Yerusalɛmun min di, ge ga wãa wunɛn guu te a gɔsan wɔllɔ. Domi be ba sun sikerenɛ ba Yerusalɛmu ka bɛsɛ wunɛn tɔmbu gɛma bɛsɛn toranu ka bɛsɛn baababan daa kɔ̃san sɔ̃. 17Gusunɔ, a nɛn nɔɔ swaa dakio kpa a nɛn kanaru nɔ. A wunɛn sãa yee te ta bansu sãa mi mɛɛrio wunɛn yĩsirun sɔ̃. 18Gusunɔ nɛn Yinni, a swaa dakio a nɔ. A nɔni seeyo a wuu ge ba ka wunɛn yĩsiru sokumɔ mɛɛri nge mɛ ga bansu kua. Sa yɛ̃ ma bɛsɛn dɛɛrara kun tura su ka nun gãanu ganu kana. Adama wunɛn wɔnwɔn bakarun sɔ̃na sa nun yeni kanamɔ. 19Yinni, a bɛsɛn kanaru nɔɔwɔ kpa a sun suuru kua. A bɛsɛn gere swaa dakio kpa a ko ye sa bikia. A ku de n tɛ wunɛn yĩsirun sɔ̃. Domi wuna a wuu ge ka tɔn be kpuro mɔ. 20- 21Sanam mɛ Daniɛli u kana te mɔ̀ u gari gerumɔ u ǹ kpa, u wi ka win tɔmbun toranu tuuba mɔ̀, ma u Gusunɔ win Yinni kanamɔ win sãa yee dɛɛra ten sɔ̃, yera durɔ wi, Gabiriɛ wi u raa wa win kãsi gbiikiru sɔɔ, u nùn yɔ̃ɔsima ka dam u sura win bɔkuɔ saa yè sɔɔ ba ra yokan yãkuru ko. 22U ka nùn gari kua u nɛɛ, na nawa wunɛn mi, n ka nun kãsi te tubusia. 23Saa yèn di a wunɛn kanaru torua, Gusunɔ u tu mwa. Yen sɔ̃na na nun win gari sɔ̃ɔbu na, domi Gusunɔ u nun kĩ. Ǹ n mɛn na, a swaa dakio n nun kãsi te tubusia. 24Saa nɔɔba yirun nɔn wata ka wɔkura Gusunɔ u himba kua yu doona u sere wunɛn tɔmbu ka wunɛn wuu dɛɛrɔ yakia toranu ka kɔ̃sa kpuron di. Yen biru, u koo bu ben toranu suuru kua kpa u bu gem wɛ̃ sere ka baadommaɔ. Gusunɔn sɔmɔbun gari ka kãsinun baa ya koo doona kpa tɔn dɛɛro goo u ko sunɔ. 25Ǹ n mɛn na, a bwisikuo kpa a tubu. Saa mìn di ba wooda wɛ̃ bu Yerusalɛmu sɔmɛ bu bani, sere wirugii wi Gusunɔ u gɔsa u ka na, ya koo kowa saa nɔɔba yirun nɔn nɔɔba yiru. Yen biru, ba koo yen swɛɛ sɔmɛ ka yen gbãraru saa nɔɔba yirun non wata ka yiru sɔɔ. Saa ye, ya ko n sãawa wahalan saa. 26Saa nɔɔba yirun nɔn wata ka yiru ye, yà n doona, ba koo wirugii wi Gusunɔ u gɔsa go. Goo sari wi u koo ka nùn yina. Kpa sunɔ kpao ka win tabu kowobu bu wuu ge, ka sãa yee te wisire bu kɔsuku kpa ba n asɔrɔ mɔ̀ sere Gusunɔ u ra ka nùn kpeerasia nge mɛ u yi. 27Wirugii wi, u ko n ka tɔn dabiru nɔɔ tia sãa sere saa nɔɔba yiru. Saa ita ka bɔnun biru, u koo de yãkunu ka abɔnu nu kpe kpa u gãa kɔ̃sunu ko sãa yerɔ nìn bweseru goo kun koore sere kam koo bi Yinni Gusunɔ u yi win sɔ̃ bu ka nùn deema.

will be added

X\