1 Bɛɛsasaan bandun wɔ̃ɔ itase sɔɔ, nɛ Daniɛli na kãsiru wa te na raa wa baasi. 2 Sanam mɛ na kãsi te mɛɛra n man sãare na wãa wuu bɔkɔ ge ba mɔ̀ Susiɔ Elamun temɔ. Ma n sãare na wãa daa te ba mɔ̀ Ulain bɔkuɔ. 3 Ye na nɔni seeya na mɛɛra, yera na yãa kinɛru wa ta kɔbu bakanu yiru mɔ ta yɔ̃ daa ten dee deeru. Kɔbu teeru ta teeru dɛ̃ɛbu kere. Te ta dɛ̃ɛbu bo mi, tera ta kpia dãkuru. 4 Yera yãa kinɛ te, ta ten kɔbi soomɔ sɔ̃ɔ duu yeru gia ka sɔ̃ɔ yɛ̃san nɔm geu gia ka sɔ̃ɔ yɛ̃san nɔm dwaru gia. Yaa gaa sari ye ya koo ka tu gabirina. Goo maa sari wi u koo ten yibɛrɛ wɔra ten nɔman di. Ta mɔ̀wa ye ta kĩ. Ma ta kpɛ̃amɔ ta dam mɔ̀. 5 Sanam mɛ na laakari mɔ̀, yera na mɛɛra ma na boo wa ga yarima saa sɔ̃ɔ duu yeru gian di ka duki baka ga tem bɔsu ma n sãare ga ǹ tem dɛke. Boo ge, ga kɔba nanumgia mɔ gen nɔnin baa sɔɔ. 6 Ma ga tura sere yãa kinɛ ten mi, te na raa wa ka kɔbi yiru mi, ta yɔ̃ daa ten dee deeru. Ma ga yãa kinɛ te gure ka gen dam kpuro. 7 Na gu wa ga yãa te susi ka mɔru ga tu so ga kɔbi bɔɔka. Yãa te, ta kpana tu ka tii yina. Ma ga tu sura temɔ ga yasisimɔ. Goo sari wi u tu wɔra gen nɔman di. 8 Ma boo ge, ga kpɛ̃a. Ye ga kpɛ̃a ga kpa, yera kɔba baka ye, ya bɔɔra. Kɔba yen ayerɔwa kɔbi nnɛ nanumgii yi kpia. Ma yi mɛɛra handunian goonu nnɛ kpuro sɔɔ, yen baayere goo teeru gia. 9 Saa kɔbi yin tian di, kɔbu piibu gaga yara ga kpɛ̃a sɔ̃ɔ yɛ̃san nɔm dwaru gia ka sɔ̃ɔ yari yeru gia ka sere tem mɛ mu gea bo gia. 10 Ma ga seewa ga wɔllun tabu kowobu girari ma ga ben sukum ka kperi surura temɔ ga taaka. 11 Ma ga maa seewa ga tabu kowo ben guro guro seesi. Ma ga bururu baateren yãku te ba ra nùn kue yɔ̃rasia. Ma ga win sãa yeru kɔsuka. 12 Ga wɔllun tabu kowobu ka baadomman yãkunu nɔma doke ga kamia toranun sɔ̃. Ma ga gem kasa kua temɔ. Ye ga bwisika gu ko kpuro, ya gu koorawa. 13 Ma na tɔn dɛɛro goon gari nua. Yen biruwa tɔn dɛɛro goo u gbiikoo wi bikia u nɛɛ, sere saa yerà ba ko n baadomman yãku ten kobu yɔ̃rasie. Sere saa yerà kam kobu ko n wãa gem sarirun sɔ̃. Sere saa yerà sãa yee te, ta ko n disi duure mɛsum. Sere saa yerà ba ko n wɔllun tabu kowo be taakumɔ. 14 Ma gbiikoo wi, u wisa u nɛɛ, sere tɔ̃nu nɔrɔbun suba yiru ka gooba wunɔbun (2.300) baa yà n doona. Yen biruwa yãku yee te, ta koo wurama ta n dɛɛre nge yellu. 15 Sanam mɛ nɛ Daniɛli na kãsi te waamɔ, ma na kasu tu man yeeri, yera na gãanu wa nu ka tɔnu weenɛ nu yɔ̃ nɛn wuswaaɔ. 16 Ma na maa goon nɔɔ nua daa te ba mɔ̀ Ulain suunun di. U nɔɔgiru sua u nɛɛ, Gabiriɛ, a durɔ wini kãsi te tubusio. 17 Ma u man susima. Ye u man turuku kooma, yera bɛrum man mwa. Ma na wɔruma temɔ. U man sɔ̃ɔwa u nɛɛ, tɔnun bii, a de yi nun yeeri. Kãsi te, ta wãawa sanam dãakim sɔ̃. 18 Sanam mɛ u ka man gari mɔ̀, yera biti baka man mwa. Ma na siriru tem girari. U man baba u seeya u yɔ̃rasia mi na raa wãa. 19 Yen biru, u maa man sɔ̃ɔwa u nɛɛ, wee kon nun sɔ̃ ye ya koo na Yinni Gusunɔn mɔrun tɔ̃ru sɔɔ sanam dãakim sɔɔ. 20 Yãa kinɛ te a wa ta kɔbi yiru mɔ mi, ta sãawa Mɛdiba ka Pɛɛsiban sinambu. 21 Boo ge, ga sãawa Gɛrɛsin sunɔ. Kɔba baka ye ya bɔɔkira mi, ya sãawa sunɔ gbiikoo. 22 Kɔba nnɛ ye ya kpia baka ye ya bɔɔkiran min di, ya sãawa sinambu nnɛ gabu be ba koo yari sunɔ gbiikoo win min di. Adama ba ǹ dam wasi nge wi. 23 Sinambu nnɛ yen bandu tà n kpa, ma ba durumgibu kpeerasia, sunɔ goo u koo yari u tii sua kpa u n tɔmbu nɔni wɔ̃kubu yɛ̃. 24 Win dam mu koo nuuru ko n ǹ mɔ ka win tiin dam. U koo gãa dabinu kam koosia ye ya ǹ ka nɔɔ gerurɔ. Win ye u mɔ̀ kpuro ya koo nùn koora. U koo bwese damginu go ka maa Gusunɔn tɔmbu. 25 U koo tii sua win dukian sɔ̃ ka win bwisin sɔ̃. U koo tɔn dabinu go be ba wãa bɔri yɛndu sɔɔ. U koo mam sina boko seesi. Adama u koo kɔsikira goo u kun nùn babe. 26 Kãsi te a wa tɔ̃nu nɔrɔbun suba yiru ka gooba wunɔbun (2.300) sɔ̃, ta sãawa gem. A ye nɛnuɔ asiri sɔɔ. Domi ya wãawa sanam dãakim sɔ̃. 27 Ma nɛ Daniɛli na kua sɔ̃ɔ dabiru na barɔ. Na ǹ dam mɔ. Yen biruwa na seewa na nɛn sɔmburu mɔ̀ te sina boko u man wɛ̃. Ma na wãa nandabu sɔɔ kãsi ten sɔ̃. Domi ta ǹ man yeeri.
