Daniɛli 5

1Nɛbukanɛsaan biru, sina boko Bɛɛsasaa u bandu di. Yera sɔ̃ɔ teeru u win sina asakpɔbu nɔrɔbu (1.000) dim soka. Ma ba tam nɔrumɔ wi ka be sannu. 2Ye tam mɛ, mu Bɛɛsasaa nuka, yera u gɔra u nɛɛ, bu win nɔri wuragii ka sii geesugii yarama yi win baaba Nɛbukanɛsaa u gurama saa Gusunɔn sãa yerun di te ta wãa Yerusalɛmuɔ. Kpa wi ka win sina asakpɔbu ka win kurɔbu ka win sinanibu bu ka yi tam nɔ. 3Yera ba ka nɔri wuragii yi na, ba ka yi tam nɔrumɔ wi ka win tɔn be kpuro. 4Tam nɔru bi sɔɔ, ba ben bũnu siaramɔ nìn bwãarokunu ba kua ka wura ka sii geesu ka sii gandu ka sii wɔ̃kusu ka dãa ka kpenu. 5Saa ye sɔɔra sina boko u nɔmu gagu wa ga yarima mi fitilan yam bururam mu sɔ̃ɔsire, ma ga yorumɔ sina kpaarun gana wɔllɔ mi ba soo kpika tɛɛni. 6Yera u nanda, win wuswaa burisina. Win torora kara, u diirimɔ sere win dũu winu soonamɔ. 7Yera u nɔɔgiru sua ka dam u nɛɛ, bu nùn sɔrobu ka Babilonin bwisigibu ka bũu sinambu sokuama. Ye ba na, yera u nɛɛ, wi u kpĩa u yora yeni gara u ye tubusia u koo yɛ̃ro wuran saba dokea kpa u nùn gurumusuru sebusia u nùn win bandun dam sukum wɛ̃ u n ka sãa tɔnu itase win bandu sɔɔ. 8Sina bokon bwisigii be kpuro ba dua mi yora ye, ya wãa. Adama ba kpana bu ye gari bu sere mam nɛɛ, ba koo ye tubusia. 9Ma ya sina boko nanda too sere win wuswaa burisina. Ma win sina asakpɔbun tii ba biti soora. 10Sina bokon mɛro u sunɔ ka win sina asakpɔbun gari yi nua. Yera u dua mi ba mɛnnɛ ba tɔ̃ɔ bakaru dimɔ. U nɛɛ, sina boko, wunɛn hunde yu dakaa da! A ku nanda sere wunɛn wuswaa ya n burisinɛ. 11Domi goo u wãa wunɛn tem mɛ sɔɔ, wi u bũu geebun hunde mɔ. U bwisi ka laakari mɔ nge bũnu. Yen sɔ̃na wunɛn baaba Nɛbukanɛsaan waati sɔɔ, u nùn kua sɔrobu ka dobo dobogibu ka Babilonin bwisigibun wirugii. 12Durɔ win yĩsira Daniɛli. Wiya sina boko Nɛbukanɛsaa u yĩsiru kã Bɛlitasaa. Ba wa ma u bwisi ka yɛ̃ɛ bakaru mɔ, ma u suka ka dosusu ka gãa ni nu sɛ̃n tubusianun kɛ̃ru mɔ. Ǹ n mɛn na, a nùn sokusio, u koo nun yora ye tubusia. 13Yera ba ka Daniɛli da sina bokon wuswaaɔ. Ma sina boko u nùn bikia u nɛɛ, wuna Daniɛli wi? A sãawa Yuu ben turo be nɛn baaba sina boko u mwɛɛrima Yudan tem di? 14Ba man wunɛn gari sɔ̃ɔwa ma bũu geeba ka nun wãa. Yen biru, a bwisi ka laakari gea mɔ a ka tɔnu gãa sɛ̃sɔginu tubusia. 15Wee ba ka man bwisigibu ka sɔrobu naawa bu ka man yora yeni garia kpa bu man yen tubusianu sɔ̃. Adama ba kpana. 16Na maa nua ma a ra tɔmbu gãanu tubusie ni nu bu bitani mɔ̀ kpa a dosu tubusia. Tɛ̃, à n kpĩa a yora yeni gara ma a man yen tubusianu sɔ̃ɔwa, kon nun gurumusuru sebusia kpa n nun wuran saba dokea n nun nɛn bandun dam sukum wɛ̃. Kpa a ko tɔnu itase nɛn bandu sɔɔ. 17Yera Daniɛli u nùn wisa u nɛɛ, yinni, a wunɛn kɛ̃ɛ ni tii yiiyo, ǹ kun mɛ a goo wɛ̃. Adama kon nun yora ye garia kpa n nun yen gari tubusia. 18Ǹ n mɛn na, yinni, a swaa dakio a nɔ. Wɔrukoo u wunɛn tundo Nɛbukanɛsaa bandu wɛ̃ ka bɛɛrɛ ka girima ka yiiko. 19Dam mɛ u nùn wɛ̃n sɔ̃, bwesenu kpuro nu nùn nasie sere nu ra n diirimɔ win wuswaaɔ. Ye u kĩ, yera u ra ka tɔnu ko. U koo kpĩ u nùn go, ǹ kun mɛ u nùn deri, ǹ kun mɛ u nùn wɔlle sua, ǹ kun mɛ u nùn taare. 20Adama saa ye sɔɔ, u tii sua u gɔ̃ru bɔbia, yera Gusunɔ u nùn yara bandun di ma u gina nùn yiiko ye mwaari. 21U nùn wuna tɔmbun suunu sɔɔn di. Ma win bwisikunu gɔsia nge gbeeku yaaginu. U da u wãa ka kɛtɛ gbeekinu sannu ma u yakasu dimɔ nge naa u dirum soore sere u ka wura ma Wɔrukoowa u bannu kpuro nɛni. Wi u kĩwa u ra maa nu wɛ̃. 22Wee, wunɛ maa Bɛɛsasaa, wunɛ wi a sãa win bii, baa mɛ a ye kpuro yɛ̃, a yina a tii kawa. 23Ma a tii sue Yinni Wɔrukoon wuswaaɔ. A dera ba ka win sãa yerun nɔri na i ka tam nɔra wunɛ ka wunɛn sina asakpɔbu ka wunɛn kurɔbu ka wunɛn sinanibu. Ma a seewa a wunɛn bũnu siaramɔ nìn bwãarokunu ba kua ka sii geesu ka wura ka sii gandu ka sii wɔ̃kusu ka dãa ka kpenu, baa mɛ nu ǹ gari nɔɔmɔ, nu ǹ yam waamɔ, nu ǹ maa gãanu yɛ̃. Adama Gusunɔ wi u wunɛn wãaru nɛni, a ǹ nùn bɛɛrɛ wɛ̃. 24Yen sɔ̃na u nɔmu ge gɔrima ge ga yora ye kua. 25Ye ba yorua mi wee, ba gara, ba gara, ba yĩira, ba bɔnu kua. 26Yen tubusianu wee. Ba gara, ya gerumɔwa Gusunɔ u wunɛn bandun sanam gara ma u tu nɔru koosia. 27Ba yĩira, ya gerumɔwa ba wunɛn bunum yĩira ba deema a ǹ bunu. 28Ba bɔnu kua, ya maa gerumɔwa ba wunɛn bandu bɔnu kua. Ma ba tu Mɛdiba ka Pɛɛsiba wɛ̃. 29Yande mi kɔ, Bɛɛsasaa u nɛɛ, bu Daniɛli gurumusuru sebusio kpa bu nùn wuran saba dokea kpa bu kpara ma u kua tɔnu itase win bandu sɔɔ. 30Dɔma ten wɔ̃kura ba Bɛɛsasaa Babilonin sina boko wi go.

will be added

X\