Daniɛli 3

1Sina boko Nɛbukanɛsaa u bwãaroku wuraguu kua. Gen gunum mu sãa gɔm soonu wata. Gen yasum maa sãa gɔm soonu nɔɔba tia. Ba gu yɔ̃rasia batuma gaa sɔɔ ye ba mɔ̀ Dura, Babilonin tem bera mi. 2Yera sina boko u dera ba tem mɛn sinambu kpuro mɛnna ka mɛn beri berikan wirugibu ka mɛn bwisi kɛ̃ɔbu ka mɛn siri kowobu ka be ba ra mɛn arumaniba bere ka sere maa mɛn wirugii be ba tie bu ka bwãaroku gen sãaru tore. 3Ma tɔn be kpuro ba mɛnna. Ben baawure u yɔ̃ra bwãaroku gen wuswaaɔ bu ka gen sãaru tore. 4Saa yera sina bokon barɔ u kpara u nɛɛ, bɛɛ bwesenu kpuro i swaa dakio i nɔ ye sina boko u bɛɛ yiiremɔ. 5Ma i nua ba kɔba so ka guunu ka mɔrɔkunu ka baranu ka gãasu ka bara bwese ni nu tie, i ko i yiirawa i bwãaroku wuraguu ge sã ge sina boko u kua mi. 6Wi u kun yiire u gu sãwa ba koo nùn kpɛ̃ɛwa mii mii dɔ̃ɔ boko wi ba sɔ̃ruan suunu sɔɔ. 7Yen sɔ̃na saa ye tɔn be, ba nua ba kɔbi yi ka guu ni so ka mɔrɔku ni, ka bara ni, ka gãa si, ba yiira ba bwãaroku wuraguu ge sãwa. 8Yen dɔma te, Babilonigibu gabu ba seewa ba da ba Yuuba dɔmɛ sina bokon mi. 9Ba nùn sɔ̃ɔwa ba nɛɛ, sina boko, wunɛn hunde yu dakaa da! 10Wunɛ sina boko, wuna a wooda wɛ̃ a nɛɛ, baawure wi u nua ba kɔbi so ka guunu ka mɔrɔkunu ka baranu ka gãasu ka bara bwese ni nu tie, u yiiro u bwãaroku ge sã. 11Mɛya a maa nɛɛ, wi u kun yiire u gu sãwa bu nùn kpɛ̃ɛyɔ dɔ̃ɔ boko wi ba sɔ̃rua sɔɔ. 12Adama wee Sadaki ka Mɛsaki ka Abɛnɛgo, Yuu be a kua Babilonin tem beran wirugibu mi, ba ǹ wunɛn wooda ye garisi gãanu. Ba ku ra wunɛn bũnu sã. Mɛya ba ǹ maa yiire ba wunɛn bwãaroku ge sãwa. 13Ye sina boko u gari yi nua, yera win mɔru ya seewa u nɛɛ, bu doo bu Sadaki ka Mɛsaki ka Abɛnɛgo mwaama. Ma ba da ba bu mwaama ba ka na wi, sina bokon mi. 14Ma sina boko Nɛbukanɛsaa u bu bikia u nɛɛ, ka gem, i yinawa i nɛn bũnu ka nɛn bwãaroku wuraguu ge na kua mi sã? 15Tɛ̃, i doo i n sɔɔru sãa. Ì n kpam nua ba kɔba so ka guunu ka mɔrɔkunu ka baranu ka gãasu ka bara bwese ni nu tie, i yiiro kpa i bwãaroku ge sã. Ì n yina, ba koo bɛɛ kpɛ̃ɛwa mii mii dɔ̃ɔ boko wi ba sɔ̃rua sɔɔ kpa n wa ǹ n bũu weren na u koo bɛɛ wɔra saa nɛn nɔmun di. 16Sadaki ka Mɛsaki ka Abɛnɛgo ba nùn wisa ba nɛɛ, yinni, sa ǹ ka tii yinamɔ. 17À n sun kpɛ̃ɛ dɔ̃ɔ boko wi sɔɔ, Gusunɔ wi sa sãamɔ u koo kpĩ u sun yara dɔ̃ɔ win min di kpa u sun wɔra wunɛn nɔman di. 18Baa ǹ n mɛren na, a n yɛ̃ ma sa ǹ wunɛn bũnu sãamɔ. Mɛya sa ǹ maa wunɛn bwãaroku ge yiirammɛ. 19Ye u ben gari yi nua, yera u ka bu mɔru kua. Ma u gerua u nɛɛ, bu dɔ̃ɔ win kpãaru sosio gem gem. 20Ma u durɔ gbebunu gɔsa win tabu kowobu sɔɔ be ba dam bo u nɛɛ, bu Sadaki ka Mɛsaki ka Abɛnɛgo bɔkuo bu kpɛ̃ɛ dɔ̃ɔ boko wi sɔɔ. 21Yera ba tɔn be mwa ba bɔkua, ma ba bu kpɛ̃ɛ dɔ̃ɔ boko wi sɔɔ ka ben yãa ni ba doke sannu. Niya ben yabenu ka ben sokoto ka sere maa ben furɔsu. 22Ma ba dɔ̃ɔ win kpãaru sosi nge mɛ sina bokon wooda damgia ye, ya gerua. Yera dɔ̃ɔ win yam susura tabu durɔ be go be ba Sadaki ka Mɛsaki ka Abɛnɛgo kpɛ̃ɛbu da mi. 23Ma Sadaki ka Mɛsaki ka Abɛnɛgo ba wɔri dɔ̃ɔ boko wi sɔɔ nge mɛ ba ka bu bɔkua. 24Yera sina boko Nɛbukanɛsaa u nanda ma u seewa fia u be ba ra nùn bwisi kɛ̃ bikia u nɛɛ, n ǹ tɔmbu itawa sa bɔkua sa kpɛ̃ɛ dɔ̃ɔ boko wi sɔɔ? Ba nùn wisa ba nɛɛ, oo, mɛya. 25Ma u bu wisa u nɛɛ, wee tɔmbu nnɛwa na waamɔ ba sĩimɔ dɔ̃ɔ boko win suunu sɔɔ. Ba ǹ dɔ̃ɔ mwaare. Be kpuro ba maa kusiarewa ma ben nnɛse u ka wɔllun tɔnu weenɛ. 26Saa ye sɔɔra Nɛbukanɛsaa u susi dɔ̃ɔ boko win bɔkuɔ u nɛɛ, Sadaki, Mɛsaki, Abɛnɛgo, bɛɛ Wɔrukoon sɔm kowobu, i yarima i na mini. Ma ba yara dɔ̃ɔ boko win min di. 27Yera wirugii be sina boko u raa soka ba mɛnna mi, be kpuro ba wa ma dɔ̃ɔ kun dam mɔ durɔ be sɔɔ. Mɛya baa ben seri tia ya ǹ dɔ̃ɔ mwaare. Ben yãa ni ba sebua nu ǹ dɔ̃ɔ numiɛ. 28Ma Nɛbukanɛsaa u nɔɔgiru sua u nɛɛ, i Gusunɔ siaro wi u sãa Sadaki ka Mɛsaki ka Abɛnɛgon Yinni. Domi wiya u win gɔrado gɔrima u ka win bwãa be ba nùn naanɛ kua mi faaba ko. Ba nɛ sina bokon wooda yina, ba ǹ ben wasin wahala garisi gãanu. Ba yina bu bũu goo sã ma n kun mɔ Gusunɔ. 29Tɛ̃ wooda ye na wɛ̃ɛmɔ wee, tɔnu baawure baa ǹ n bwese teren na u sãa, ma u Gusunɔ, Sadaki ka Mɛsaki ka Abɛnɛgon Yinni gari kam gerusi, na kon de bu yɛ̃ro bɔtiriwa, kpa win yɛnu gu ko bansu. Domi goo maa sari wi u koo kpĩ u tɔnu faaba ko nge mɛ. 30Yeniban biru, sina boko Nɛbukanɛsaa u Sadaki ka Mɛsaki ka Abɛnɛgo aye bakanu wɛ̃ Babilonin tem bera mi. 31Sina boko Nɛbukanɛsaa u bwese ni nu wãa handunia sɔɔ kpuro tɔbura u nɛɛ, Gusunɔ u de i n alafia mɔ. 32N man wɛ̃re n ka bɛɛ sɔ̃ yĩrenu ka maamaaki be Wɔrukoo u man sɔ̃ɔsi. 33Win yĩre ni, nu kpã. Maamaaki ye, win sinara. Win banda kun kpeemɔ. U ko n sãawa sunɔ sere ka baadommaɔ.

will be added

X\