Amɔsu 9

1Amɔsu, u Yinni Gusunɔ wa u yɔ̃ sãa yerun yãku yerɔ. Ma u nùn sɔ̃ɔwa u nɛɛ, u sãa yerun gbereba soowo saa ben wɔllun di kpa tem mu diiri, kpa bu wɔruku bu tɔn be ba wãa mi kpuron winu kɔsuku. Kpa wi, Yinni Gusunɔ u de bu be ba tie go tabu sɔɔ ka takobi. Baa ben goo kun kpɛ̃ u kisira u doona. 2Baa bà n kukua gɔriɔ, win nɔmu ga koo bu yarama. Baa bà n yɔɔwa wɔllɔ, u koo bu sarasiama. 3Bà n da ba kukua guu te ba mɔ̀ Kaamɛlin wii kpiirɔ, u koo bu kasu, kpa u bu mwa. Bà n numa nim wɔ̃kun sɔɔwɔ, u koo de waa baka yu bu dwɛ̃ɛ migum. 4Ben yibɛrɛba bà n maa bu yoru mwɛɛra, u koo de yibɛrɛ be, bu bu go ka takobi. U ko n bu nɔni girariwa, kpa u bu kɔ̃sa kua, n ǹ mɔ gea. 5Ma Amɔsu u nɛɛ, Gusunɔ wɔllu ka tem Yinni u tem baba, ma mu kɔsikira. Ma mɛn tɔmbu kpuro ba gɔɔ wooru sɔ̃. Mɛ kpuro mu kukumɔ, ma mu suremɔ nge Egibitin daa baka te ba mɔ̀ Nilun nim. 6U win wãa yeru bana wɔllɔ, ma u dera wɔlla kua tem girum kpɛɛru. U nim wɔ̃kun nim mɛnna, ma u mu yɛ̃ka tem sɔɔ. Win yĩsira Yinni Gusunɔ. 7Yinni Gusunɔ u maa nɛɛ, bɛɛ Isireliba, i ǹ Etiopigibu kere nɛn nɔni sɔɔ. Geema, na bɛɛ yara Egibitin tem di. Adama na maa Filisitiba yara Kafitorin di. Ma na maa Sirigibu yara Kirin di. 8Wee, nɛ, Yinni Gusunɔ na Isireliban bandu nɔni girari, domi ta tora. Kon tu kpeerasiawa handunia sɔɔ. Adama n ǹ mɔ Isireliba kpurowa kon kpeerasia. Nɛ, Yinni Gusunɔwa na yeni gerua. 9Wee, kon nɛn woodaba wɛ̃, kpa n Isireliba sĩire bwese tukunun suunu sɔɔ nge mɛ ba ra dobi sĩire, baa yen bin teeru ta kun ka wɔra. 10Nɛn tɔn be ba durum mɔ̀, ma ba gerumɔ ba mɔ̀, na ǹ bu nɔni swãaru suremɔ, ba koo be kpuro gowa tabu sɔɔ. 11Tɔ̃ru gara sisi tè sɔɔ kon Dafidin bandu seeya te ta sãa nge yɛnu ge ga bansu kua. Kon tu sɔmɛ, kpa tu se tu wurama nge yellu. 12Kpa bu wa bu Edɔmuban tem ka bwese tuku ni nu raa man sãamɔn tem mwa. Nɛ, Yinni Gusunɔwa kon yeni ko. 13Wee saa ya sisi yè sɔɔ bà n gã, n ǹ tɛɛmɔ bu ka kpam duure. Bà n resɛm duura, n ǹ tɛɛmɔ bu ka ye gama. Baa ka guunu wɔllɔ resɛm ya koo kpiwa ya n tɛrie bu ka tam ko. 14Kon nɛn tɔmbu Isireliba yakia yorun di. Kpa bu wure bu wuu si su raa bansu kua seeya bu sina mi. Ba koo resɛmba duure, kpa bu yen tam nɔ. Ba koo dãa gbaanu ko, kpa bu yen marum di. 15Kon den bu girawa n sire dim dim nge dãa, ba n wãa ben temɔ mɛ na bu wɛ̃ mi. Goo kun maa bu wukamɔ mɛ sɔɔn di. Nɛ, Yinni Gusunɔwa na yeni gerua.

will be added

X\