1 Wee ye Yinni Gusunɔ u maa man sɔ̃ɔsi kãsi teni sɔɔ. Na dãa marum wa bireru sɔɔ mɛ mu ye. 2 Ma Yinni Gusunɔ u nɛɛ, mba na waamɔ mi. Na nùn wisa na nɛɛ, dãa maruma na wa mɛ mu ye. Yera u maa man sɔ̃ɔwa u nɛɛ, saa ya tura u ka win tɔmbu Isireliba sɛɛyasia. U ǹ maa bu suuru kuammɛ. 3 U maa nɛɛ, yen tɔ̃ɔ te, sina kpaarun womusu koo gɔsia nuku sankiranun womusu. Kpa tɔn dabinun gonu nu n tɛrie baama. Kpa yam mu n maari sɔ̃ɔ sɔ̃ɔ. 4 Yinni Gusunɔ u nɛɛ, i swaa dakio bɛɛ be i sãarobu dam dɔremɔ. Ma i bwɛ̃ɛbwɛ̃ɛbu kam koosiamɔ. 5 I mɔ̀, domma suru kpaon tɔ̃ɔ bakara koo kpe. Kpa su wa su bɛsɛn alikama dɔra. Domma tɔ̃ɔ wɛ̃rarugira koo kpe, kpa su wa su bɛsɛn biranu wukia. Sa ko sakaku kawa, kpa su yen gobi sosi. Sa ko kilo gɔsia su ka tɔmbu gbɛni. Kpa su doo sĩinu dɔra. 6 Sa ko wɔnwɔndobu dwe ka gobi, kpa su sãarobu ka baranun gobi kɔsina. 7 Nɛ, Yinni Gusunɔ, na bɔ̃rua ka nɛn tiin yĩsiru na nɛɛ, na ǹ bɛɛ Isireliba kɔ̃sa ye i kua duarimɔ. 8 Bɛɛn tem mu koo yĩiri, kpa bɛɛ nɛn tɔmbu i n gɔɔ wooru sɔ̃. Tem mɛ kpuro mu koo kuke kpa mu sure nge Egibitin daarun nim. 9 Yen tɔ̃ɔ te, nɛ, Yinni Gusunɔ kon de sɔ̃ɔ u du sɔ̃ɔ sɔɔ gbãara kpa yam mu tĩra. 10 Kon bɛɛn tɔ̃ɔ bakanu gɔsia nuku sankiranu, kpa bɛɛn womusu su n sãa weeweenu. Kpa bɛɛn baawure u saakiba doke u n wii pɔɔru pote nuku sankiranun sɔ̃. Kon de tɔmbu ba n nuki sankire tem mɛ sɔɔ nge be ba ben bii teereru bie. Tɔ̃ɔ te, ta ko n sãawa nɔni swãarugiru. 11 Wee ye nɛ, Yinni Gusunɔ na gerua. Na nɛɛ, kon de gɔ̃ɔru tu du tem mɛ sɔɔ. N ǹ mɔ dĩanun gɔ̃ɔru, n ǹ maa mɔ nim nɔru. Adama nɛn garin gɔ̃ɔru ka yin nim nɔruwa i ko i n mɔ. 12 I ko i n yarinɛwa saa sɔ̃ɔ yɛ̃san nɔm dwaru gian di n ka da sɔ̃ɔ duu yerɔ, saa maa sɔ̃ɔ yɛ̃san nɔm geu gian di n ka da sɔ̃ɔ yari yerɔ, i n bɔsu baama, i n kasu i nɛn gari nɔ. Adama i ǹ wasi i yi nɔ. 13 Saa ye sɔɔ, bɛɛn wɔndia burɔbu ka bɛɛn aluwaasiba ba koo gbi nim nɔrun saabu. 14 Be ba bɔ̃rumɔ ka Samarigibun bũnun yĩsiru ba mɔ̀, ka bũu wi u wãa Danuɔn wãaru, ǹ kun mɛ ka sãa te ba mɔ̀ Beri Sebaɔ, be kpurowa kon de bu wɔruku, kpa bu kpana bu se.
