1 Wee ye Yinni Gusunɔ u dera na wa kãsiru sɔɔ. Tweeya u dera yi kɔwara dabi dabinu sanam mɛ yakasu kparam wee si sina boko u raa bɔɔra win yaa sabenun sɔ̃. 2 Sanam mɛ yi tem min yaka si kpuro di, yera na nɛɛ, Yinni Gusunɔ, a suuru koowo. Amɔna Yakɔbun bweseru ta ko n ka wãa. Domi ta ǹ maa dam mɔ. 3 Ma Yinni Gusunɔ u gɔ̃ru gɔsia kɔ̃sa yen di. U nɛɛ, yeni ya ǹ maa kooramɔ. 4 Wee ye Yinni Gusunɔ u maa dera na wa kãsiru garu sɔɔ. U nɛɛ, u koo tɔmbu sɛɛyasia ka dɔ̃ɔ. Kpa u de dɔ̃ɔ wi, u nim mɛ mu wãa tem sɔɔwɔ gberasia kpa u Isireliban tem kpuro di. 5 Ma na nɛɛ, Yinni Gusunɔ, a ye yɔ̃rasio. Amɔna Yakɔbun bweseru ta ko n ka wãa. Domi ta ǹ dam mɔ. 6 Ma Yinni Gusunɔ u gɔ̃ru gɔsia kɔ̃sa yen di u nɛɛ, yenin tii ya ǹ maa kooramɔ. 7 Wee ye na maa wa kãsiru garu sɔɔ. Na Yinni Gusunɔ wa u yɔ̃ ganaɔ ma u nifoo nɛni. 8 Ma u man bikia u nɛɛ, mba na waamɔ mi. Na nùn wisa na nɛɛ, nifoo. Ma u man sɔ̃ɔwa u nɛɛ, nifoowa kon ka nɛn tɔmbu Isireliba yĩire nge gana. Na ǹ maa bu suuru kuammɛ. 9 Kon ben sikado Isakin bũu turanu kɔsuku, kpa n Isirelin sãa yenu suriri, kpa n Yeroboamun bandu sura ka takobi n tu kpeerasia. 10 Yera Amasia Betɛlin yãku kowo u Yeroboamu Isireliban sina boko gɔria u nɛɛ, wee Amɔsu u nun seesimɔ Isireliban suunu sɔɔ. Win gari yi u maa gerua mi, yi tɔmbu kpuro burisina. 11 Domi u nɛɛ, wunɛ Yeroboamu, ba koo nun gowa tabu sɔɔ ka takobi. Kpa bu Isireliba yoru mwɛɛri ben tem di bu ka da mi n toma. 12 Yen biruwa Amasia u na Amɔsun mi, u nùn sɔ̃ɔwa u nɛɛ, Gusunɔn sɔmɔ wunɛ, a doo Yudan tem gia, kpa a n wunɛn gari yi mɔ̀ mi, a ka wa a n dimɔ. 13 Adama a ku maa Gusunɔn gari gere Betɛli mi, domi ya sãawa sina boko ka Isireliba kpuron sãa yeru. 14 Ma Amɔsu u nùn wisa u nɛɛ, na ǹ sãa Gusunɔn sɔmɔ. Na ǹ maa Gusunɔn sɔmɔn bɔ̃ɔ. Nɛ, yãa kparowa. Sikamɔrewa na ra yewe. 15 Yera Yinni Gusunɔ u man gɔsa sanam mɛ na yãanu kparamɔ. U man sɔ̃ɔwa u nɛɛ, n doo n win tɔmbu Isireliba win gari sɔ̃. 16 Tɛ̃, a swaa dakio a Yinni Gusunɔn gari nɔ. Wunɛ Amasia, wunɛ wi a nɛɛ, n ku Isireliba Gusunɔn gari sɔ̃. 17 Wee ye Yinni Gusunɔ u gerua. U nɛɛ, wunɛn kurɔ u koo sakararu ko wuu sɔɔ, kpa bu wunɛn bibu go tabu sɔɔ, kpa bu wunɛn gberu bɔnu ko, domi wunɛn tii kaa gbi tem tukumɔ mi n toma, mi ba koo ka Isireliba da bu yoru di.
