1 Bɔ̃ruroba bɛɛ be i wãa Siɔniɔ bɔri yɛndu sɔɔ, ka bɛɛ be i sɔ̃ Samarin guurɔ ka toro sindu. Ma i tamaa i sãa bwese te ta kpãaru bon wirugibu. Ma Isireliba ba somiru mara bɛɛn min di. 2 I doo Kalinɛɔ i wa. Min di, kpa i da Hamatiɔ wuu bɔkɔ gen mi. Kpa i sara i da Gatiɔ Filisitiban temɔ. Ben wuu si, su bɛɛ Isireliba ka Yudaban wusu gea tura? Ben tem mɛ, mu bɛɛn tem kpãaru tura? 3 Wee i ǹ kĩ wahalan tɔ̃ru tu bɛɛ naawa. Ma i sere tii daa kɔ̃sa gawemɔ. Ma ya bandu dii bɛɛn suunu sɔɔ. 4 Ma i kpĩ sau kpin yee buranu sɔɔ, nì ba buraru kua ka suunu donnu. I tii yãa kpɛmminu ka naa kpɛmi yi yi gum mɔ gɔsiammɛ gɔ̃sun di i temmɔ. 5 I mɔrɔkunu soomɔ i womusu mɔ̀ bwisikunu sariru sɔɔ. Ma i tamaa i nin soberu yɛ̃wa nge Dafidi. 6 I tam nɔrumɔ ka nɔri bɛkɛ. I tii gum turaregim sawamɔ. Ma i ǹ nuki sankire yèn sɔ̃ bɛɛn bweseru ta koo kam ko. 7 Yen sɔ̃na ba koo gbi bu bɛɛ yoru mwɛɛri bu ka doona kpa bɛɛn nuku dobun kuuki ka bɛɛn tɔ̃ɔ baka dim mu kpe. 8 Gusunɔ wɔllu ka tem Yinni u bɔ̃rua ka win tiin wãaru u nɛɛ, u ǹ bɛɛ Isireliban tii suabu kĩ. U maa bɛɛn sina kpaanu tusa. U koo de bu Samari mwa ka ye ya wãa ye sɔɔ kpuro. 9 Tɔmbu wɔkuru bà n tie yɛnu gagu sɔɔ, ba koo gbiwa. 10 Goo ù n win tɔnun goru sua yɛnun di u ka yara u dɔɔ u dɔ̃ɔ mɛni, u koo wi u wãa yɛnu sɔɔwɔ bikia u nɛɛ, goo maa tie u wãa ka wunɛ? Kpa yɛ̃ro u nùn wisi u nɛɛ, goo sari. Kpa wini u nɛɛ, a mario. N ǹ weenɛ su Gusunɔn yĩsiru sia saa yeni sɔɔ kpa u sun sĩirema. 11 Domi Yinni Gusunɔ u wooda yeni wɛ̃ u nɛɛ, u koo yɛnusu kpuro kɔsukuwa, bakasu ka piiminu. 12 Ba ra dumi yakie kpee saara wɔllɔ? Ba ra ka nɛɛ wuku mi? Adama wee bɛɛ i gem gɔsia dɛ̃ɛ. Ma i gea gɔsia gãa sosuranu. 13 Bɛɛ i nuku dobu mɔ̀ kam sɔɔ, ma i gerumɔ i mɔ̀, bɛɛn tiin dama i ka nasara wa. 14 Yen sɔ̃na Gusunɔ wɔllu ka tem Yinni u nɛɛ, u koo de bwese tukuru garu tu bɛɛ seesi. Kpa tu bɛɛ dam dɔre saa Hamatin duu yerun di sere n ka da nim toraɔ ye ya wãa gbaburun bera gia mi gãanu ku ra kpi.
