Amɔsu 5

1Bɛɛ Isireliba, i swaa dakio i nɔ gɔɔ swĩi yi na mɔ̀ bɛɛn sɔ̃. 2Bɛɛ be i wɔrumɛ temɔ nge wɔndia be ba gu, i ǹ maa seemɔ. Goo sari wi u koo bɛɛ seeya. 3Domi Yinni Gusunɔ u gerua u nɛɛ, bɛɛn wuu ge ga tabu durɔbu nɔrɔbu (1.000) mɔ, bà n tabu da, tɔmbu wunɔbuwa (100) ba koo wurama. Ge ga maa tabu durɔbu wunɔbu mɔ, tɔmbu wɔkura ba koo tia. 4Wee ye Yinni Gusunɔ u maa bɛɛ Isireliba sɔ̃ɔmɔ. U nɛɛ; ì n kĩ i n wãa, wiya i ko kasu. 5I ku maa sãaru da Betɛliɔ ka Giligaliɔ ka Beri Sebaɔ. Domi u koo de bu Giligaligibu yoru mwɛɛri. Kpa bu Betɛligibu kam koosia. 6- 7Bɛɛ be i ra gem gɔsie weesu, kpa i kun mu garisi gãanu, i na wi, Yinni Gusunɔn mi, kpa i wa i n wãa, kpa u ku raa bɛɛ Isireliba wɔri u mwa nge dɔ̃ɔ. Kpa i goo bia Betɛliɔ wi u koo dɔ̃ɔ wi go. 8Yinni Gusunɔwa u kperi bwese bweseka kua, ma u yen baayere yi yen ayerɔ. U ra yam wɔ̃kuru gɔsie yam bururam. Kpa u de sɔ̃ɔ sɔɔ gu tĩra, gu gɔsia wɔ̃kuru. U ra nim wɔ̃kun nim mɛnnɛ, kpa u mu yɛ̃kana tem kpuro sɔɔ. 9Wiya u ra damgibun dam bue. Kpa u de bu ben wusun gbãranu kɔsuku. Ka gem, win yĩsira Yinni Gusunɔ. 10Bɛɛ Isireliba, be ba bɛɛ sirimɔ dee dee, i ra n bu tusa, kpa i n ka wi u gem gerumɔ kɔ̃rua. 11I ra bwɛ̃ɛbwɛ̃ɛbu dam dɔre, i n ben gbean dĩanu mwɛɛrimɔ ka dam. Yen sɔ̃, i ǹ sinamɔ bɛɛn dia sɔɔ ye i bana ka kpee ni i dãka. Mɛya i ǹ maa bɛɛn resɛm ye i duuran bii duronun tam nɔrumɔ. 12Domi u bɛɛn toranu yɛ̃ nu kpã, u maa yɛ̃ ma i durum kua too. I gemgibu nɔni sɔ̃ɔmɔ. I nɔm biran kɛ̃nu mwaamɔ. Ma i yinamɔ bu sãarobu ben gem wɛ̃ siri yerɔ. 13Sanam mɛni, sanam kɔ̃suma. Yen sɔ̃, wi u laakari mɔ, wiya u ko n nɔɔ maari. 14I de i n gea mɔ̀ n kun mɔ kɔ̃sa. Kpa i wa i n wãa. Nge mɛya Gusunɔ wɔllu ka tem Yinni u ko n ka bɛɛ wãa nge mɛ i ra gere. 15I kɔ̃sa tusio kpa i gea kĩa. I de gem mu siribu di siri yerɔ. Sɔrɔkudo Gusunɔ, wɔllu ka tem Yinni u koo bɛɛ Isireliban tɔn be ba tiara wɔnwɔndu kua. 16Yen sɔ̃, Gusunɔ wɔllu ka tem Yinni u gerua u nɛɛ, tɔmba koo gɔɔ wuri ko yam kpuro, kpa ba n sumɔ swɛɛ sɔɔ, ba n mɔ̀, wee, wee! Ba koo gbaa wukobu sokuma bu gɔɔ wooru sina, kpa bu gɔɔ swĩigibu mɛnnama. 17Sanam mɛ u koo bɛɛ wɔrima, ka be ba wãa gberɔ kpuro ba koo gɔɔ swĩwa. Yinni Gusunɔwa u yeni gerua. 18Bɔ̃ruroba bɛɛ be i Yinni Gusunɔn siribun tɔ̃ru mara. Mba i yĩiyɔ i wa tɔ̃ɔ te sɔɔ. I n yɛ̃ ma ta ko n sãawa yam wɔ̃kuru, n ǹ mɔ yam bururam. 19I ko i n sãawa nge tɔnu wi u gbee sunɔ duka suurimɔ, ma u ka yaa gɔba gaa yinna. Ye u dua win dirɔ u gana nɛnua, ma waa ya nùn dɔma. 20Yinni Gusunɔn tɔ̃ɔ te, ta sãawa yam wɔ̃kuru n ǹ mɔ yam bururam. Ta tĩriwa niki niki, yam bururam sari. 21Yinni Gusunɔ u nɛɛ, u bɛɛn tɔ̃ɔ baka ni i ra nùn diiye tusa. U ǹ mam maa kĩ u bɛɛn mɛnnɔsun woo nɔ. 22Ì n nùn yãku dɔ̃ɔ mwaararugiru kua ka maa kɛ̃nu, u ku ra nu mwɛ. Mɛya u ku ra maa bɛɛn siarabun yãkunu mɛɛri ni i ra ko ka yaa sabe ni nu gum mɔ. 23I ka bɛɛn womusun wɔkinu doonɔ win bɔkun di. U ǹ maa kĩ u bɛɛn mɔrɔkunun wurenu nɔ. 24Adama i de gem mu n wãa bɛɛn suunu sɔɔ, mu n kokumɔ nge nim mɛ mu ku ra kpe. 25Bɛɛ Isireliba, i ka kua wɔ̃ɔ weeru gbaburu sɔɔ, i nùn yãkunu ka kɛ̃nu kuare nge mɛ? 26Bũu wi ba mɔ̀ Sakutu wi i garisi bɛɛn sunɔ ka sere kpera ye i sãamɔ i mɔ̀ Kewani, i nin bwãaroku ni i tii kua sɔɔre nge mɛ i sɔɔwa gisɔ? Bɛɛn tii i yɛ̃ ma i ǹ koore mɛ. 27Yen sɔ̃, u koo de bu bɛɛ yoru mwɛɛri bu ka da sere Damasin bera giɔ. Wi, Gusunɔ wɔllu ka tem Yinniwa u yeni gerua.

will be added

X\