Amɔsu 4

1Bɛɛ Samarin tɔn kurɔbu, bɛɛ be i dimɔ i bɔriamɔ nge Basanin naa gbiibi yi yi wãa Samarin guurɔ, i wɔnwɔndobu dam dɔremɔ, i bwɛ̃ɛbwɛ̃ɛbu taki dimɔ, ma i bɛɛn durɔbu sɔ̃ɔmɔ bu ka tam na i nɔ. Tɛ̃, i swaa dakio i nɔ. 2Nɛ, Yinni Gusunɔ na bɔ̃rumɔ ka nɛn tiin yĩsi dɛɛraru na mɔ̀, wee saa ya sisi yè sɔɔ ba koo bɛɛ ka bɛɛn bibun bweseru kɔkɔnu sɔre bu gawa nge swɛ̃ɛ. 3Bɛɛn baawure u koo yari kururun di kpa bu bɛɛ kuba sɔ̃ɔ yɛ̃san nɔm geu gia. Nɛ, Yinni Gusunɔwa na yeni gerua. 4Yinni Gusunɔ u nɛɛ, bɛɛ Isireliba, i doo yãku yee ten mi Betɛliɔ, kpa i n man torarimɔ. I doo Giligaliɔ, kpa i n man torarimɔ nge mɛ̀n nɔɔ i ko kpĩ. I n bɛɛn yãkunu mɔ̀ bururu baatere, kpa i n ka bɛɛn kɛ̃nu naamɔ sɔ̃ɔ ita ka sɔ̃ɔ ita. 5I bɛɛn siarabun yãkunu koowo ka pɛ̃ɛ ye ba seeyatia doke. Kpa i tɔmbu sɔ̃ ma i kɛ̃nu kua ka kĩru. Domi yera bɛɛ Isireliba i kĩru bo. Nɛ, Yinni Gusunɔwa na yeni gerua. 6N wee na dera gɔ̃ɔra dua bɛɛn wuu marosu kpuro sɔɔ. Ma i dĩanu bia bɛɛn yɛnusu kpuro sɔɔ. Adama ka mɛ, i ǹ gɔsiramɛ nɛn mi. Nɛ, Yinni Gusunɔwa na yeni gerua. 7Na yina gura yu nɛ ye n tie suru ita bu ka dĩanu gɛ̃. Na dera gura ya na wusu gasun mi. Ma na ǹ wure yu nɛ gasun mi. Na dera ya na gbenu ganu sɔɔ. Ma na ǹ wure yu nɛ ganun mi. Ma nu gbera. 8Yera bɛɛn wusu gasun tɔmbu ba da wuu gagun mi bu ka nim wa bu nɔ. Adama ben nim nɔru ga ǹ kpa. Ka mɛ, i ǹ gɔsiramɛ nɛn mi. Nɛ, Yinni Gusunɔwa na yeni gerua. 9Na dera bɛɛn dĩanu kusenu kua, ma twee yi na yi bɛɛn gbean dĩanu ka bɛɛn dãa gbaanun wurusu kpuro di. Adama ka mɛ, i ǹ gɔsiramɛ nɛ Gusunɔ bɛɛn Yinnin mi. 10Na maa bɛɛ kɛ̃si kɛ̃si bararu sure nge mɛ na kua Egibitiɔ. Na dera ba bɛɛn aluwaasiba go tabu sɔɔ. Ma ba ben dumi mwɛɛra. Na dera i bɛɛn tɔn be ba gun nuburu nua bɛɛn sansaniɔ. Adama ka mɛ, i ǹ gɔsiramɛ nɛn mi. 11Na bɛɛ sura na kɔsuka nge Sodomu ka Gomɔra ye na kam koosia. Ma i kua nge dãa nɔɔ ge ba wuna dɔ̃ɔn di. Adama ka mɛ, i ǹ gɔsiramɛ nɛ, Yinni Gusunɔn mi. 12Yen sɔ̃na bɛɛ Isireliba kon bɛɛ sɛɛyasia. Ǹ n mɛn na, i n sɔɔru sãa i n ka nɛ Gusunɔ bɛɛn Yinnin siribu mara. 13Domi nɛna na guunu mɔma, ma na woo taka kua. Na ra nɛn bwisikunu tɔnu giasie. Na ra maa yam bururam gɔsie yam wɔ̃kuru, kpa na n sĩimɔ guunu wɔllɔ. Nɛn yĩsira Gusunɔ wɔllu ka tem Yinni.

will be added

X\