Amɔsu 3

1I swaa dakio i nɔ ye nɛ, Yinni Gusunɔ na gerumɔ, bɛɛ Isireliba kpuron sɔ̃, bɛɛ be na yarama Egibitin di. 2Handunian bwesenu kpuro sɔɔ, bɛɛ tɔnawa na gɔsa. Yen sɔ̃na kon bɛɛ sɛɛyasia bɛɛn durum ye i kua kpuron sɔ̃. 3Tɔmbu yiru ba koo swaa wɔri sannu ba kun gina nɔɔsinɛ? 4Gbee sunɔ ga ra gbãre yakasɔ ga kun yaa mwɛ ro? Gbee sunɔ buu ga ra kukiri gen kpin yerun di ga kun yaa wa ga dimɔ? 5Gunɔ ga koo taa mwaara temɔ ba kun ye bɛri? Taa ya koo se wɔllɔ gãanu kun ye kɛsie? 6Ba ra tabun kɔba so wuuɔ wuugibu ba kun nande? Kɛ̃siru garu ta ra koore wuuɔ n kun nɛn min di? 7Aawo, na ku ra gãanu ganu ko na kun yè nɛn sɔmɔ sɔ̃ɔwa. 8Gbee sunɔ gà n gbãra, wara ku ra nande. Nɛ, Yinni Gusunɔ nà n gari gerua, nɛn sɔmɔ wara kun yi kparamɔ. 9I Asidɔdu ka Egibitin tem sina kpaanugibu nɔɔgiru sueyo i nɛɛ, bu mɛnnama Samarin guunɔ, kpa bu wa daa bɛrɛtɛkɛ ka dam dɔrenaa ye ya wãa ben suunu sɔɔ. 10Ba ku ra kã bu gea ko. Ma ba arumani guramɔ ka dam ka taki, ba taasimɔ ben sina kpaanɔ. 11Yen sɔ̃na kon de yibɛrɛba bu na bu tem mɛ tarusi, bu ben dam kpeerasia. Kpa bu ben sina kpaanu kɔsuku. Nɛ, Yinni Gusunɔwa na yeni gerua. 12Wee ye na maa gerua. Na nɛɛ, nge mɛ yãa kparo u ra win sabenun sukum wɔre gbee sunɔn nɔɔn di, nge mɛya kon bɛɛ Isireliba wɔra bɛɛ be i na i sɔ̃ Samariɔ kpin yee buranu sɔɔ. 13I swaa dakio i nɔ kpa i Yakɔbun bweseru kirɔ ko i bu sɔ̃ ye nɛ Gusunɔ wɔllu ka tem Yinni na gerua. 14Na nɛɛ, sanam mɛ sɔɔ, kon Isireliba sɛɛyasia ben durum sɔ̃. Kon Betɛlin yãku turanu kɔsuku, kpa nin kãanu nu bɔɔkira nu wɔruku. 15Kon bɛɛn dia mi i ra n wãa yam susurun saa ka puran saa kɔsuku. Kpa n bɛɛn sina kpaanu kam koosia ni, ni ba buraru koosi ka suunu donnu, ka sere dii gee ni nu tie. Nɛ, Yinni Gusunɔwa na yeni gerua.

will be added

X\