Amɔsu 2

1Nɛ, Yinni Gusunɔ na nɛɛ, Mɔabuban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba Edɔmun sina bokon kukunu dɔ̃ɔ mɛni nu kua torom. 2Yen sɔ̃, kon de bu Mɔabuban tem dɔ̃ɔ mɛni kpa u ben wuu Keriɔtun dii geenu di mam mam. Kpa Mɔabu be, bu kam ko tabu gberɔ, sanam mɛ tabu swĩa ba kɔbi soomɔ, ba kuuki mɔ̀. 3Kon ben sina boko ka win tabu sinambu kpuro kpeerasia. Nɛ, Yinni Gusunɔwa na yeni gerua. 4Nɛ, Yinni Gusunɔ na nɛɛ, Yudaban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba nɛn woodaba yina. Ba ǹ ye mɛm nɔɔwɛ. Ma ba bũnun weesu swĩi, ni ben baababa ba raa swĩi. Ma nu dera ba gɛra nɛn swaan di. 5Yen sɔ̃, kon de bu ben tem dɔ̃ɔ mɛni. Kpa u ben wuu Yerusalɛmun dii geenu di mam mam. 6Nɛ, Yinni Gusunɔ na nɛɛ, bɛɛ Isireliba, bɛɛn toranu nu kpɛ̃a. Yen sɔ̃, na ǹ nɛn himba gɔsiamɔ. Domi i gemgibu dɔra i ka bɛɛn dibu wa i mwa. Ma i ka sãarobu baranun gobi kɔsinamɔ. 7I ra n kĩwa i wɔnwɔndobu taare kpa ba n wiru tua sãa nuku sankiranun sɔ̃. Kpa i n bwɛ̃ɛbwɛ̃ɛbu dam dɔremɔ. Bii ka baa ba ka kurɔ turo mɛnnamɔ. Nge mɛya i ka nɛ, Yinni Gusunɔn yĩsi dɛɛraru sankumɔ. 8I ra n kpĩ kpĩ bɛɛn bũnun nuunɔ yãnu wɔllɔ ni i tɔruba mwa, kpa i n tam nɔrumɔ mɛ i yokuma. 9Ka mɛ, na Amɔreba kam koosia mam mam bɛɛn sɔ̃, be, be ba gunu nge dãa ye ba mɔ̀ sɛduru. Ma ba dam mɔ nge dãa damgia. 10Mɛya na bɛɛ yarama Egibitin tem di. Ma na bɛɛ kpara gbaburɔ wɔ̃ɔ weeru n ka bɛɛ Amɔre ben tem wɛ̃. 11Na sɔmɔbu seeya bɛɛn bibu sɔɔ. Ma na gabu gɔsa nɛn sɔ̃ bɛɛn aluwaasiba sɔɔ, ma ba man tii wɛ̃ ba bɔ̃rua bu ku tam nɔ. Bɛɛ Isireliba geema? Nge weesa. Nɛ, Yinni Gusunɔwa na yeni bikiamɔ. 12I dera be na gɔsa mi, ba tam nɔra. Ma i nɛn sɔmɔbu wooda wɛ̃ i nɛɛ, bu ku maa tɔmbu nɛn gari sɔ̃. 13Wee tɛ̃, kon bɛɛ munku muku muku nge mɛ naa kɛkɛ ye ya dĩanu sɔɔwa ya ra tem kɔsuku. 14Yen dɔma te, wasi kasanugiba kun maa kpɛ̃ bu duka su. Damgiba kun maa kpɛ̃ bu ben dam dendi bu ka gãanu ko. Mɛya tabu durɔ damgiba kun maa kpɛ̃ bu ben wãaru wɔra. 15Tɛn towoba kun maa kpɛ̃ bu ka tii yina. Be ba maa naasu sãu, ba ǹ kisiramɔ. Mɛya maasɔba kun maa kpɛ̃ bu we ben dumin dukin saabu. 16Be ba sãa tabu durɔ damgibu be sɔɔ dɔma te, ba koo ben tabu yãnu kɔ̃wa bu duki su nɔm dira. Nɛ, Yinni Gusunɔwa na yeni gerua.

will be added

X\