Amɔsu 1

1Amɔsu u sãawa yãa kparo Tekoaɔ. Wiya Yinni Gusunɔ u ka gari kua Isireliban sɔ̃, n kua wɔ̃ɔ yiru tem mu sere yĩira. Saa ye sɔɔ, Osiasiwa u bandu dii Yudaɔ, ma Yeroboamu, Yoasin bii u maa bandu dii Isireliɔ. 2Amɔsu u nɛɛ, Yinni Gusunɔn nɔɔ ga nɔɔramɔ Siɔnin guurɔ Yerusalɛmuɔ. Yakasu maa sari kpara yenɔ, ma guu te ba mɔ̀ Kaamɛli, ten wii kpiira gbera. 3Nɛ, Yinni Gusunɔ na nɛɛ, Damasigibun toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba Galadigibu taaka ba munka. 4Tɛ̃, kon de dɔ̃ɔ u na u sina boko Hasaɛlin yɛnu wɔri, kpa u Bɛni Hadadin sina kpaaru di mam mam. 5Kon ben wuu Damasin gbãrarun gamboba kɔsuku, kpa n Bikati Afɛnin tɔmbu kpeerasia. Kpa n Bɛti Edɛnin sunɔ go. Kpa n de bu Sirigibu yoru mwɛɛri bu ka da Kiriɔ. Nɛ, Yinni Gusunɔwa na yeni gerua. 6Nɛ, Yinni Gusunɔ na nɛɛ, Filisitiban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba Isireli dabi dabinu yoru mwɛɛra ba Edɔmuba nɔmu bɛria. 7Mɛya kon de bu ben wuu Gasa dɔ̃ɔ sɔku, kpa u yen dii geenu di. 8Kon Asidɔdun tɔmbu ka Asikalonin sunɔ kpeerasia. Kon Ekoronigibu wɔri. Kpa Filisiti be ba tie mi kpuro bu kam ko. Nɛ, Yinni Gusunɔwa na yeni gerua. 9Nɛ, Yinni Gusunɔ na nɛɛ, Fenisiban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba Isireli dabi dabinu yoru mwɛɛra ba Edɔmuba nɔmu bɛria. Ba ǹ ben arukawani yibie ye ba raa ka bu bɔkua. 10Yen sɔ̃, kon de bu ben wuu Tiri dɔ̃ɔ sɔku, kpa u yen dii geenu di. 11Nɛ, Yinni Gusunɔ na nɛɛ, Edɔmuban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba ben mɛro bisibu Isireliba naa swĩi ka takobi. Ba ǹ bu wɔnwɔndu kue. Ben mɔru kun maa sure. Ma ba ka bu wɛrɛru sãa dim dim saa kpuro. 12Yen sɔ̃, kon de bu ben wuu Tema dɔ̃ɔ sɔku kpa u Botisiran dii geenu di. 13Nɛ, Yinni Gusunɔ na nɛɛ, Amɔniban toranu nu kpɛ̃a. Yen sɔ̃, na ǹ nɛn himba gɔsiamɔ. Domi ba gurigibun nukunu bɛsuka Galadiɔ, saa ye ba Galadigii ben tem mwaamɔ begim mu ka yasian sɔ̃. 14Yen sɔ̃, kon de bu ben wuu Raba tabu wɔri bu ye dɔ̃ɔ sɔku, kpa u yen dii geenu di mam mam. Saa ye sɔɔ, tabun wurenu koo nɔɔra nge woo bɔkɔ. 15Kpa bu ben sina boko ka win tabu sinambu yoru mwɛɛri. Nɛ, Yinni Gusunɔwa na yeni gerua.

will be added

X\