Samuɛli II 4

1Saa ye Sɔɔlun bii Isi Bosɛti u nua ma Abinɛɛ u gu Heboroniɔ, yera win gɔma kpuro dwiiya. Ma Isireliba kpuro ba nanda. 2Sɔɔlun bii wi, u tabu sinambu yiru mɔ be ba ra tabu kowobu kpare bu ka wɔraa da. Beya Baana ka Rekabu. Be kpuro ba sãawa Rimɔɔ, Beerɔtugiin bibu Bɛnyamɛɛn bweseru sɔɔ. 3Beerɔtu ye, ya wãawa Bɛnyamɛɛn tem sɔɔ. Adama yen tɔmbu ba duki sua ma ba da ba wãa Gitaimuɔ sere ka gisɔn gisɔ. 4N deema Yonatam, Sɔɔlun bii turo u bii tɔn durɔ mɔ wi ba mɔ̀ Mɛfibosɛti. Bii wi, u kua yɛmɔ. Wɔ̃ɔ nɔɔbuwa u mɔ sanam mɛ Sɔɔlu ka Yonatam ba gu Yisirɛɛliɔ tabu sɔɔ. Ye kurɔ wi u bii wi nɔɔrimɔ u gɔɔ win labaari nua, yera u bii wi sua u ka doonɔ. Ye u duka mɔ̀ ka sɛndaru ma u wɔruma u nùn sura. Min diya bii wi, u kua yɛmɔ. 5Yera sɔ̃ɔ teeru Baana ka Rekabu ba da Isi Bosɛtin dirɔ sɔ̃ɔ sɔɔ mi u do u sɔ̃ɔ sure. 6- 7Ma ba dua sere dii ten sɔɔwɔ nge ba kĩ bu dobi sua. Ye ba tura mi u kpĩ, yera ba nùn woburu sɔka ba go. Ma ba win wiru bura ba ka doona. Ma ba swaa mwa ye ya dɔɔ Yuudɛnin wɔwa gia. Yen dɔma te, wɔ̃ku girira ba sĩa. 8Yera tɔn be, ba ka Isi Bosɛtin wii te da Dafidin mi, Heboroniɔ, ba nɛɛ, wunɛn yibɛrɛ Sɔɔlu wi u kasu u nun hunde wuna, win bii Isi Bosɛtin wiru wee. Yinni Gusunɔwa u Sɔɔlu ka win bweseru mɔru kɔsie gisɔ wunɛn sɔ̃. 9- 11Dafidi u Rekabu ka Baana wisa u nɛɛ, i ǹ yaaye sɔmɔ wi u na u man Sɔɔlun gɔɔ sɔ̃ɔwa, ma u tamaa labaari gea u man nɔɔsiamɔ, adama na dera ba nùn mwa ba go Sikilagiɔ? Na nùn win labaarin are wɛ̃. Kaa sere gere tɔn kɔ̃sobu be ba tɔnu wi u kun gãanu kue kãasi ba go win dirɔ mi u kpĩ? Sere ka Yinni Gusunɔn wãaru wi u man wɔra saa nɔni swãaru kpuron di, kon de bu bɛɛ gowa. 12Ma u win tabu kowobu sɔ̃ɔwa u nɛɛ, bu Rekabu ka Baana mɔɔ bu go. Yera ba ben naasu ka nɔma bɔɔra, yen biru ba bu bwɛ̃ Heboronin daa burerun bɔkuɔ. Ma ba Isi Bosɛtin wii te sua ba sikua Abinɛɛn sikirɔ Heboroni mi.

will be added

X\