Samuɛli II 23

1Dafidi, Isain bii, wi Gusunɔ Yakɔbun Yinni u gɔsa u wɔlle sua, win womusa Isireliba ba ra n kĩ bu nɔ. Win gari dãaki wee. U nɛɛ, 2Gusunɔn Hunde u gari kua saa nɛn nɔɔn di. Win gariya yi wãa nɛn yara sɔɔ. 3Gusunɔ, Isireliban Yinni wi u ra bu kɔ̃su, u man sɔ̃ɔwa u nɛɛ, sunɔ wi u tɔmbu kparamɔ gem swaa sɔɔ, ma win tii u Gusunɔ nasie, 4u sãawa nge sɔ̃ɔ yanan yam bururam guru wiru sari. Sɔ̃ɔ yana yera ya ra de yaka bekusu su balli, gura yà n na ya kpa. 5Nge mɛya nɛn bweseru ta sãa Gusunɔn wuswaaɔ. Domi u ka man arukawani bɔkua ye ya ǹ nɔru mɔ. U ye kpuron kpunaa yi. Goo kun maa kpɛ̃ u ye kɔsi. Saa kpuro u ra man nasara wɛ̃. Ye na kĩ kpuro u ra man kuewa. 6Adama be ba Gusunɔ gɛma ba sãawa nge sãki yi ba ra bure bu kɔ̃. Ba ku ra yi babe ka nɔm dira. 7Wi u kĩ u yi baba, sisu ka yaasan bura u koo ka yi sɔ̃re, kpa u yi dɔ̃ɔ mɛni yam tem mi sɔɔ. 8Dafidin tabu durɔbun yĩsa wee. Ben ita ba yĩsiru yara. Yosɛbu Basebɛti, Takemɔnigii, u sãawa ben turo. Wiya u tɔmbu nɛnɛ (800) go ka yaasa nɔn teerun tabu sɔɔ. 9Yirusen yĩsira Eleasaa, Dodon bii, Akosin sikadobu. Sanam mɛ Filisitiba ba yara bu ka Isireliba tabu ko, wi ka Dafidiwa ba yɔ̃ra ba bu mara. N deema saa ye, Isireliba ba wãa guunɔ. 10Yen dɔma te, Eleasaa wi, u Filisitiba gowa sere win nɔma mɔnya u kpana u takobi yɔ̃su. Ma Yinni Gusunɔ u nùn nasara baka wɛ̃. Yen biru Isireliba ba na ba nùn deema bu ka Filisiti ben yãnu gura. 11Ben itasen yĩsira Sama, Agen bii, Hararigii. Saa ye sɔɔ, Filisitiba ba maa mɛnna Lekiɔ bu ka Isireliba tabu wɔri. N deema gberu gara wãa mi, tè sɔɔ ba dãsi duura. Ye Isireliba ba duki mɔ̀ Filisiti ben sɔ̃, 12yera Sama u yɔ̃ra mi, u ka tu yina. Ma u ka Filisitiba tabu kua u bu go. Gusunɔ u nùn nasara baka wɛ̃ dɔma te. 13Gɛ̃ɛbun saa sɔɔ, Dafidin tabu sinambu tɛna sɔɔ ben ita ba da ba nùn deema Adulamun kpee wɔruɔ sanam mɛ Filisitiban tabu kowobun wuuru garu ta na ta ten sansani gira Refaban wɔwaɔ. 14Saa ye sɔɔ, Dafidi u wãa kpee wɔru ge sɔɔ. Ma Filisitiban sansani ya maa gire Bɛtelehɛmuɔ. 15Ma Dafidi u Bɛtelehɛmun bɛkɛ kua u nɛɛ, wara u koo ka man Bɛtelehɛmun gbãra kɔnnɔn dɔkɔn nim naawa n nɔ. 16Yera win tabu durɔbu ita be, ba da ba Filisitiban sansani ye wɔri ka dam ba Dafidi nim mɛ takama. Adama u ǹ mu nɔra. U ka mu yãkuru kuawa, u Yinni Gusunɔ yaria. 17U nɛɛ, Gusunɔ u man gbara bu nɛɛ, nɛna na nim mɛ nɔra. Domi mɛn sɔ̃na tɔn beni ba ben wãaru kari bɔrie. Nim mɛ, mu sãawa nge ben yɛm mɛ mu koo raa yari. Yen sɔ̃na u yina u mu nɔ. Yeniba kpurowa Dafidin tabu durɔbu ita be, ba kua. 18Abisai Seruyan bii, Yoabun wɔnɔ, wiya u sãa tɔmbu tɛna yen wirugii. Tɔmbu gooba wunɔbuwa (300) u go ka win yaasa. Ma u yĩsiru yara tɔmbu tɛna yen suunu sɔɔ. 19Ba nùn bɛɛrɛ wɛ̃ too. Adama u ǹ tabu durɔ gbiikobu ita be tura. 20Bɛnaya, Kabisɛɛligii, Yehoyadan bii, u sãawa tabu durɔ wɔrugɔ. Ma u yĩsiru yara nasara dabi ni u wan sɔ̃. Wiya u Mɔabun tɔmbu yiru gabu go be ba sɛ̃ nge gbee sinansu. Wiya u maa dua dɔkɔ kpiriru sɔɔ u gbee sunɔ kãasi mi, u go puran saa sɔɔ. 21Ma u Egibitin tabu durɔ damgii goo go. Saa yè sɔɔ u nùn wɔrim dɔɔ, bokura u nɛni. Ye u tura mi, ma u durɔ win yaasa ye u nɛni wɔra u ka nùn sɔka u go. 22Yeniwa Bɛnaya Yehoyadan bii u kua. Ma u maa yĩsiru yara Dafidin tabu durɔbu tɛna ye sɔɔ. 23U bɛɛrɛ baka wa be sɔɔ, adama ya ǹ tabu durɔ gbiikobu ita begia tura. Ma Dafidi u nùn kua win kɔ̃sobun wirugii. 24Dafidin tabu durɔbu tɛna yen gabun yĩsa wee. Asaɛli, Yoabun wɔnɔ, ka Ɛlikanani, Dodon bii, Bɛtelehɛmugii, 25ka Sama, ka Elika, Harodugibu, 26ka Helɛsi, Pelɛti ka Ira Ikɛsin bii, Tekoagii, 27ka Abiesɛɛ, Anatɔtugii, ka Mɛbunai, Husagii, 28ka Saamɔɔ, Akoasigii, ka Maharai, Nɛtofagii, 29ka Helɛbu, Baanan bii, wi u maa sãa Nɛtofagii, ka Itai, Ribain bii, Gibeagii. Gibea ye, ya wãa Bɛnyamɛɛn temɔ. 30Ka Bɛnaya, Piratonigii, ka Hidai, Nakale Gaasigii, 31ka Abi Aliboni, Arabagii, ka Asimafɛti, Baakumugii, 32ka Eliaba, Saabonigii, ka Bɛnɛ Yasɛni, ka Yonatam, 33ka Sama, Hararigii, ka Akiamu, Saraan bii, Hararigii, 34ka Elifelɛti, Akasibain bii. Akasibain tundo u sãa Maakagii. Ka Eliamu, Ahitofɛlin bii, Gilogii, 35ka Hɛsirai, Kaamɛligii, ka Paarai, Arabugii, 36ka Yigeali, Natanin bii, Sobagii, ka Bani, Gadigii, 37ka Selɛki, wi u sãa Amɔnin bweseru, ka Naharai, Beerɔtugii wi u ra Yoabu, Seruyan biin tabu yãnu sɔbe, 38ka Ira, ka Garɛbu, Yetɛɛgibu, 39ka Uri, Hɛti. Dafidin tabu durɔ damgibu ba sãawa tɔnu tɛna ka nɔɔba yiru.

will be added

X\