1 Womu geniwa Dafidi u Yinni Gusunɔ kua sanam mɛ u nùn wɔra saa win yibɛrɛban nɔman di, n mam nɛɛre Sɔɔlu. 2 U nɛɛ, Yinni Gusunɔ, wuna a sãa nɛn dam. Wuna na kĩ. 3 A sãawa nge kpee baa yè sɔɔ kon kuke. A sãawa nɛn kuku yee naanɛgiru. Wuna a sãa nɛn Yinni wi u man yakia. Wuna a sãa nɛn tɛrɛru. Wunɛn dama mu man wɔra. Wuna a sãa nɛn kari. 4 I Yinni Gusunɔ siaro. Nà n nùn nɔɔgiru sue na faaba kana, u ra man wɔrewa nɛn yibɛrɛban nɔman di. 5 Gɔɔ raa man bɔkua, u ka man doonɔ nge nim tori baka. 6 Gɔribun wãa yera man tɛ̃kua. Gɔɔ man taa bɛrie. 7 Ma na nɔɔgiru sua nɛn nuku sankiraru sɔɔ, na Yinni Gusunɔ soka. Ma u nɛn nɔɔ nua saa win wãa yerun di. Mɛya maa nɛn weeweenu wɔri win swaa sɔɔ. 8 Tem mu yĩira, ma guunu diira, yèn sɔ̃ Yinni Gusunɔ u mɔru bɛsira. 9 Ma win mɔru seewa nge wiisu, ma ya yabura nge dɔ̃ɔ yara, ma ya yarimɔ win nɔɔn di nge dɔ̃ɔ buri. 10 U dera wɔlla ka tem dɛbɛ dɛbɛ kua. Ma u sarama u guru wii bakaru taakumɔ. 11 U wɔllun kɔ̃so sɔni nge duma. Ma u bɛllimɔ woo sɔɔ. 12 U kukua yam wɔ̃kuru sɔɔ, ma guru wii sinumginu nùn wukiri. 13 Win wuswaaɔ yam bururam mu wãa. Min diya gura nɛmɔ ka guru kpenu ka dɔ̃ɔ buri. 14 Win nɔɔ ga nɔɔra wɔllun di nge guru gbãsukubu. Ma guru kpenu nɛmɔ ka dɔ̃ɔ buri. 15 U nɛn yibɛrɛba yarinasia ka guru kpenu ni nu sãa nge sɛ̃ɛnu. U bu gira baama ka guru maakinu. 16 U wɛ̃ru wura, yibɛrɛba ba nanda. Ma guru woo bɔkɔ ga daanu gberasia. Ma dunian kpɛɛkpɛɛku ga sɔ̃ɔsira. 17 Ma u win nɔmu dɛmiama wɔllun di u man nɛnua u yara nim bwee bakarun di. 18 U man wɔra yibɛrɛban nɔman di. Yibɛrɛ be, ba man dam kere. Yibɛrɛ be, ba man tusa. 19 Yibɛrɛ be, ba man wɔriwa nɔni swãarun saa sɔɔ. Adama Yinni Gusunɔ u kua nɛn tãsi yeru. 20 U man wɔra ben nɔman di, na n ka tii mɔ, domi u man kĩ. 21 U man domaru kua yèn sɔ̃ na dɛɛre. U man domaru kua yèn sɔ̃ na gem swĩi. 22 Na win wooda mɛm nɔɔwa. Na ǹ nùn seesi. 23 Na win wooda kpuro swĩi. Na ǹ win gere yinɛ. 24 Na nɛn tii nɛnua, kpa n ku ra ka durum ko. Na sãawa dee dee win wuswaaɔ. 25 Yen sɔ̃na u man kɔsia nge mɛ nɛn daa gea nɛ. U man kɔsia nge mɛ nɛn gɔ̃ru ga dɛɛram nɛ. 26 Sà n sãa naanɛgibu, kaa n sun sãawɛwa naanɛgii. Sà n sãa gemgibu, kaa n sun sãawɛwa gemgii. 27 Sà n sãa dɛɛrobu, kaa n sun sãawɛwa dɛɛro. Sà n maa sãa keetagibu, kaa n sun sãawɛwa keetagii. 28 Yinni Gusunɔ, wunɛn tiiwa a ra tɔn be ba tii kawe faaba ko, kpa a be ba tii sue kawa. 29 Yinni Gusunɔ, a sãawa nɛn fitila. A ra man yam bururasie. 30 A ra man dam kɛ̃ n ka kpĩ n yibɛrɛ be ba tabu yãnu mɔ wɔri, kpa n yɔ̃ n ben gbãraru sure. 31 Ye Yinni Gusunɔ u mɔ̀, ya ra n dɛndewa. Bwisi geeya u ra tɔnu kɛ̃. U sãawa be ba nùn naanɛ sãan tɛrɛru. 32 Gusunɔ turowa u wãa. Wi turowa u sãa bɛsɛn Yinni. Wi turowa u koo sun kɔ̃su. 33 Wiya u sãa nɛn kuku yee damgiru. Wiya u ra man swaa gea sure, 34 kpa u de nɛn naasu su n sãu nge nɛmu, na n ka yɔ̃ dim dim guuru wɔllɔ. 35 Wiya u ra man tabu sɔ̃ɔsi. Wiya u ra man dam kɛ̃, n ka tɛndu gawa te ta bɔ. 36 Yinni Gusunɔ, wuna a ra man faaba ko nge tɛrɛru. Wuna a ra man bere ka wunɛn dam bakam. Wunɛn durom saabuwa na ka kua damgii. 37 Nà n duka mɔ̀, a ra de na n sãu. Nà n duka mɔ̀, na ku ra maa sokure. 38 Nà n nɛn yibɛrɛba naa gire, wuna a ra de n bu naamwɛ. Wuna a ra de na kun gɔsiramɛ, ma n kun mɔ na bu kpeerasia. 39 Na ra bu suririwa temɔ n kɔsuku kpa bu kpana bu se. 40 Yinni, wuna a ra man dam kɛ̃ n ka tabu ko. Wuna a ra man nasara wɛ̃ nɛn yibɛrɛban wɔllɔ. 41 Wuna a ra de nɛn yibɛrɛba bu man biru kisi. Wuna a ra de n be ba man tusa kpeerasia. 42 Na ra bu munkuwa kpa bu ko nge tua. Na ra bu taakuwa kpa bu ko nge pɔtɔkɔ. Yinni Gusunɔ, bà n nɔɔgiru sua ba faaba kana, a ku bu faaba ko. Bà n somiru kana, a ku bu wisi. 44 Yinni Gusunɔ, wuna a man wɔra be ba man seesin nɔman di. Wuna a man kua bwese tukunun wirugii. Wuna a dera ba man yoru diiyammɛ. 45 Bà n yande nɛn gari nua, ba ra n man mɛm nɔɔwammɛwa. Bà n man wa, ba ra n man sãamɔwa. Bà n man wa, ba ra nandewa. 46 Bà n man wa, ba ra yarimɛwa ben kuku yerun di ba n diirumɔ. 47 Yinni Gusunɔ u wãa. I nùn siaro. Wiya u sãa nge kperu mi na ra kuke. I nùn bɛɛrɛ wɛ̃ɛyɔ. Wiya u man faaba kua. 48 Wiya u ra man mɔru kɔsie nɛn yibɛrɛban mi. Wiya u ra de bwesenu nu man yiira. 49 Wiya u ra de n kisira yibɛrɛban nɔman di. Yinni, a man wɔlle sua ben wuswaaɔ. Wuna a man faaba kua tɔn kɔ̃sobun nɔman di. 50 Yen sɔ̃na kon womusu ko ka wunɛn yĩsiru. Wuna kon siara bwesenun suunu sɔɔ. 51 Yinni Gusunɔ, a man gɔsa a kua sunɔ. Wuna a man nasara baka wɛ̃. Na yɛ̃ ma kaa n man durom sɔ̃ɔsimɔ, nɛ ka nɛn bweseru sere ka baadommaɔ.
