Samuɛli II 21

1Dafidin bandun waati, gɔ̃ɔra dua tem mɛ sɔɔ, ta kua wɔ̃ɔ ita. Ma Dafidi u Yinni Gusunɔ bikia u nɛɛ, mban sɔ̃na gɔ̃ɔ te, ta wãa mɛ. Ma Yinni Gusunɔ u nùn sɔ̃ɔwa u nɛɛ, gɔ̃ɔ te, ta wãawa yèn sɔ̃ Sɔɔlun yɛnugibu ba yɛm yari, ba Gabaonigibu go. 2N deema Gabaonigii be, ba ǹ sãa Isireliba. Ba sãawa Amɔreban bweseru. Adama Isireliba ba ka bu arukawani bɔkua ba nɛɛ, ba ǹ bu goomɔ. Ka mɛ, Sɔɔlu u kasu u bu kpeerasia Isireliba ka Yudaban kĩrun sɔ̃. Yera Dafidi u bu soka u nɛɛ, 3mba kon kpĩ n bɛɛ kua. Mba kon ko n ka kɔ̃sa ye ba bɛɛ kua min durum wɔka kpa i wa i sun domaru kua, bɛsɛ be sa sãa Gusunɔn tɔmbu. 4Ma Gabaonigii be, ba nùn wisa ba nɛɛ, bɛsɛ ka Sɔɔlun yɛnugibun sannɔ ge, ga ǹ kpeemɔ ka wura ǹ kun mɛ ka sii geesu. Mɛya n ǹ maa bɛsɛn sɔmunu su ka nɛɛ, bu goo go Isireliɔ. Ma sina boko Dafidi u bu sɔ̃ɔwa u nɛɛ, ǹ n mɛn na, i man sɔ̃ɔwɔ ye i kĩ. Kon bɛɛ ye kua. 5Ma ba sina boko wisa ba nɛɛ, nge mɛ Sɔɔlu u kasu u bɛsɛn bweseru kpeerasia Isireliban suunu sɔɔn di, 6nge mɛya a maa sun win bweseru sɔɔ tɔn durɔbu nɔɔba yiru yaro a sun bu nɔmu bɛria, kpa su ka bu da su sãarusia Yinni Gusunɔn wuswaaɔ Gibeaɔ, wi, Sɔɔlu wi Yinni Gusunɔ u raa gɔsan tiin wuuɔ. Ma sina boko u bu wisa u nɛɛ, kon bɛɛ bu nɔmu bɛria. 7Adama u ǹ dere bu ka Mɛfibosɛti, Yonatam bii, Sɔɔlun debubu da, arukawani ye ba bɔkua wi ka Yonatam Yinni Gusunɔn wuswaaɔn sɔ̃. 8Ma u Risipa, Ayan biin bibu yiru mwa be u ka Sɔɔlu mara. Bii bera Aamɔni ka Mɛfibosɛti. Ma u maa Mɛrabu Sɔɔlun biin bii tɔn durɔbu nɔɔbu mwa be u ka Adiriɛli Mɛholagii mara. Adiriɛli wi, u sãawa Baasilain bii. 9Beniwa Dafidi u Gabaonigii be nɔmu bɛria. Ma ba da ba bu bwɛ̃ guuru wɔllɔ Yinni Gusunɔn wuswaaɔ. Ma be kpuro ba gu sɔ̃ɔ tee te. Saa ye, ya sãawa dĩa gbiikinun gɛ̃ɛbun saa. 10Risipa, Ayan bii, u saaki sua u da u tɛria guu ten wɔllɔ, ma u wãa mi saa gɛ̃ɛbun torubun di sere gura ya ka wurama. U win bibun gonu kɔ̃su. Sɔ̃ɔ sɔɔ u ra gunɔsu girewa su ku raa goo ni di. Wɔ̃kuru kpa u gbeeku yɛɛ gira. 11Yera ba da ba ye Dafidi sɔ̃ɔwa. 12Ma u da Yabɛsiɔ Galadin temɔ u Sɔɔlu ka win bii Yonatam kukunu gurama. N deema Yabɛsigii beya ba raa goo ni sua Bɛti Sanin di mi Filisitiba ba raa nu bwɛ̃ sanam mɛ ba Sɔɔlu go Giliboaɔ. 13Ma u Sɔɔlu ka Yonatam kuku ni sua ka sere maa be ba bwɛ̃ miginu. 14Ma ba Sɔɔlu ka Yonatamginu sikua Selaɔ Bɛnyamɛɛn temɔ Kisi, Sɔɔlun tundon sikirɔ. Ye ba ye kpuro kua mam mam nge mɛ sina boko u gerua, yera Yinni Gusunɔn mɔru ya sure. 15Filisitiba ba ka maa Isireliba tabu seewa, ma Dafidi ka win tabu kowobu ba da ba bu wɔri. Yen dɔma te, Dafidi u wasira gem gem. 16Filisiti goo wi ba mɔ̀ Yisibi Benɔbu, Rafan bweseru sɔɔ u yaasa mɔ ye ba kua ka sii gandu. Yen bunum mu sãawa kilo ita. Durɔ wi, u maa takobi kpaa sɛ̃ke win pɔraɔ. Wiya u gerua ma u koo Dafidi go. 17Ma Abisai Seruyan bii, u na u Dafidi somi u Filisiti wi so u go. Yera Dafidin tabu kowobu ba nùn sɔ̃ɔwa ka bɔ̃ri ba nɛɛ, a ǹ maa ka sun tabu dɔɔ. Domi sa ǹ kĩ bu nun go kpa bandu tu kpe Isireliɔ. 18Yeniban biru tabu maa seewa Isireliba ka Filisitiban suunu sɔɔ Gɔbuɔ. Yera Sibekai, Husagii, u Safu sɛ̃re u go. Safu wi, u maa yarawa Rafan bweserun di. 19Yen biru, tabu maa seewa Gɔbu mi, Isireliba ka Filisitiban suunu sɔɔ. Ma Ɛlikanani, Yaaren bii, Bɛtelehɛmugii, u Goliati Gatigiin wɔnɔ go. Wi ba go mi, win yaasan buru ta sãawa nge weson dɛka. 20Taa binin biru ba maa tabu kua Gatiɔ ka Filisitiba. Durɔ goo wãa Gati mi, wi u yara Rafan bweserun di. Durɔ wi, u gunu too. Niki bii nɔɔba tia tiawa u mɔ nɔmaɔ ka naasɔ, ma ni kpuro nu kua yɛnda nnɛ. 21Yera u Isireliba nɔɔ kuura. Ma Yonatam, Dafidin mɔɔ Saman bii, u da u nùn go. 22Filisitiban tabu kowo Gatigibu nnɛ be, ba yarawa Rafan bweserun di. Ma Dafidi ka wigibu ba bu go.

will be added

X\