Samuɛli II 20

1Saa ye sɔɔ, tɔn kɔ̃so goo wãa Bɛnyamɛɛn bweseru sɔɔ, win yĩsira Seba, Bikirin bii. Yera u kɔba so u nɛɛ, mba n sun mɔɔsinɛ bɛsɛ ka Dafidi Isain bii. Mɛya sa ǹ maa tubi tia dimɔ. Yen sɔ̃, bɛɛ Isireliba, baawure u wuro win yɛnuɔ. 2Yera Isireli be kpuro ba Dafidi deri ba Seba swĩi. Adama Yudaba ba ka Dafidi ben sina boko yɔ̃ra. Ma ba nùn yɔ̃siri saa Yuudɛnin daarun di sere Yerusalɛmuɔ. 3Dafidi u tura win yɛnuɔ Yerusalɛmuɔ. U win kurɔbu wɔku te u raa deri ba yɛnu kɔ̃su sua u doke diru garu sɔɔ u nɔɔrimɔ. Adama u ǹ ka bu kpunare. Diru miya u bu kɛnusi ba wãa nge gɔminibu sere ba ra ka gu. 4Yera sina boko u Amasa sɔ̃ɔwa u nɛɛ, sere n ka ko sɔ̃ɔ ita na kĩ a man Yudaba mɛnna a ka bu na mini. 5Ma Amasa wi, u da u Yuda be kpuro mɛnna. Adama u tɛ n kere sɔ̃ɔ ita ye sina boko u nùn bura. 6Ma Dafidi u Abisai sɔ̃ɔwa u nɛɛ, Seba, Bikirin bii, u koo sun kɔ̃sa kua ya n Abusalɔmugia kere. Yen sɔ̃, a wunɛn yinnin tabu kowobu suo kpa i nùn naa swĩi, u sere kuke wuu ge ga gbãraru mɔ sɔɔ. 7Ma Abisai u seewa ka Yoabun tabu kowobu ka Pelɛtiba ka Keretiba be ba sãa sina bokon kɔ̃sobu, ka sere maa tabu durɔ wɔrugɔba. Beya ba yara Yerusalɛmun di ba Seba, Bikirin bii wi naa gira. 8Sanam mɛ ba tura Gabaonin kpee bakarɔ yera ba ka Amasa yinna. N deema Yoabu u win tabu yãnu sebua ma u win takobin bɛkitia sɛ̃ka pɔraɔ, ma yen tii ya sãare. Ye u Amasa susimɔ, yera takobi ye, ya wɔruma yen kararun di. 9Ma u Amasa sɔ̃ɔwa u nɛɛ, a bwãa do nɛn wɔnɔku? Yen biru u win toburu nɛnua u ka nùn bɔkasi. 10N deema Amasa kun takobi yen laakari sãa ye Yoabu u nɛni. Ma u nùn ye sɔka nɔn teeru nukurɔ u nuki yara. Ma Amasa u wɔruma yande u gu. Yen biru Yoabu ka win wɔnɔ Abisai ba wure ba Seba naa gira. 11Yera Yoabun tabu durɔ turo u yɔ̃ra Amasan goo ten bɔkuɔ u gerumɔ u mɔ̀, wi u Yoabu ka Dafidi kĩ, u Yoabu swĩiyɔ. 12Ma Amasan goo te, ta kpĩ ta yɛm mwɛɛre swaa suunu sɔɔ. Ye tabu durɔ wi, u wa tɔmba yɔ̃ramɔ mi, yera u goo te gawa swaan di u ka da yakasɔ u tu bekuru wukiri. 13Ye u kpa, yera tɔmba sara ba Yoabu swĩi ba ka Seba Bikirin bii wi naa gira. 14Ye Yoabu u dɔɔ Abɛli Bɛti Maakan bera gia, yera u Isireliban bwese kɛri kpuro bukiana. Ma ben tabu durɔ wɔrugɔba ba nùn swĩi. 15Ye ba tunuma Abɛli Bɛti Maakaɔ ba deema Seba u wãa mi, yera ba ye tarusi. Ba yanim takaru kua ta ka wuu gen gbãraru gunum nɛra. Yen biru ba gbãra ten temɔ gba bu ka tu sura. 16Yera wuu min tɔn kurɔ bwisigii goo u nɔɔgiru sua u nɛɛ, i swaa dakio i nɔ. I man Yoabu sokuama n ka nùn gari ko. 17Ma Yoabu u nùn susi. Yera kurɔ wi, u nùn bikia u nɛɛ, wuna Yoabu? Ma u wisa u nɛɛ, oo, nɛna. Kurɔ wi, u maa nɛɛ, a nɛn gari swaa dakio. Ma Yoabu u nɛɛ, a geruma. 18Kurɔ wi, u nɛɛ, yellu ba ra raa nɛɛwa, a bikiaru doo Abɛli Bɛti Maakaɔ kpa n nùn kua nge mɛ a kĩ. 19Bɛsɛn wuu geni, ga sãawa wuu si su bɔri yɛndu mɔn teu ka si su ra Isireliban woodaba mɛm nɔɔwɛn teu, n kere wuu si su tie. Adama wunɛ, a kasu a gu go, ge, ge ga sãa Isireliban wuu marosun teu. Mban sɔ̃na a kasu a Yinni Gusunɔn arumani kpeerasia. 20Ma Yoabu u nùn wisa u nɛɛ, su ku wa mɛ, bu nɛɛ, nɛna na wuu ge kpeerasia na gen dukia gura. 21N ǹ mɛ nɛn bwisikunu. Efaraimu wi ba mɔ̀ Seba, Bikirin biiwa u Dafidi seesi. Wiya sa kasu. Yen sɔ̃, i nùn yarama i sun nɔmu sɔndia, kpa n doona n wuu ge deri. Ma kurɔ wi, u Yoabu sɔ̃ɔwa u nɛɛ, sa ko nun win wiru kasa kuama. 22Ma kurɔ wi, u da u tɔmbu mɛnna ka bwisi ba da Seban mi, ba win wiru bura ba tu Yoabu kasa kuama. Yera Yoabu u kɔba so ma win tabu kowobu ba yarina ba wuu ge deri. Ben baawure u wura win yɛnuɔ. Ma Yoabun tii u gɔsira Yerusalɛmuɔ u da sina bokon mi. 23Saa ye sɔɔ, be ba sãa Dafidi sina bokon sɔm kowobu, ben yĩsa wee. Yoabuwa Dafidi u kua Isireliba kpuron tabu sunɔ. Bɛnaya, Yehoyadan bii, wiya u maa Keretiba ka Pelɛtiba kpare be ba sãa Dafidin tiin kɔ̃sobu. 24Adoramuwa u ra maa tɔmbu wɔ̃ɔ gobi mwaari. Yosafati, Ahiludun biiwa u ra maa tirenu bere. 25Seyawa maa sãa tire yoro. Ma Sadɔku ka Abiataa ba sãa yãku kowobu. 26Ira, Yairigiiwa maa sãa Dafidin sina kpaarun wirugii turo.

will be added

X\