Samuɛli II 2

1Yeniba kpuron biru ye ya koora wee. Dafidi u Yinni Gusunɔ bikia u nɛɛ, n doo n Yudan wuu gagu mwa? Ma Yinni Gusunɔ u nɛɛ, oo, a doo. Ma u nɛɛ, gen geren miya kon da. Yinni Gusunɔ u nùn wisa u nɛɛ, a doo Heboroniɔ. 2Ma Dafidi u da mi ka win kurɔbu yiru beni, Akinɔamu Yisirɛɛligii ka Abigali Nabalin gɔmini. 3Ma u dera win bwãa be ba wãa ka wi, be ka ben tɔmbu ba da ba wãa Heboroniɔ ka yen baru kpaanɔ. 4Yudaba ba na Dafidin mi, ba nùn gum tãre wirɔ u ka ko ben sunɔ. Ma ba nùn sɔ̃ɔwa ba nɛɛ, Yabɛsi Galadigibu ba Sɔɔlun goru sikua. 5Yera Dafidi u bu sɔmɔbu gɔria u nɛɛ, i bu sɔ̃ɔwɔ i nɛɛ, Yinni Gusunɔ u koo be bu domaru kua yèn sɔ̃ ba ben yinni Sɔɔlu gea kua, ba win goru sikua. 6Tɛ̃, Yinni Gusunɔ u be bu durom kuo. Kpa u bu bɔrɔkiniru sɔ̃ɔsi. Nɛn tii kon maa bu durom kua ben ye ba kua min sɔ̃. 7Ǹ n mɛn na, bu be yɔ̃ro dim dim kpa bu ko tabu durɔ wɔrugɔba domi ben yinni Sɔɔlu u gu. Adama ba n yɛ̃ ma Yudaba ba man gum tãre wirɔ n ka ko ben sunɔ. 8Yera Abinɛɛ, Nɛrin bii wi u sãa Sɔɔlun tabu kowobun wirugii, u Sɔɔlun bii Isi Bosɛti sua u ka da Mahanaimuɔ. 9Miya u nùn kua Isireliba kpuron sunɔ be ba wãa Galadiɔ ka Asuriɔ ka Yisirɛɛliɔ ka Efaraimun temɔ ka sere maa Bɛnyamɛɛn temɔ. 10Isi Bosɛti wi, u mɔwa wɔ̃ɔ weeru sanam mɛ u bandu di Isireliba sɔɔ. Adama Dafidiwa Yudaba ba ka yɔ̃ra. 11Ma u kua ben sunɔ wɔ̃ɔ nɔɔba yiru ka suru nɔɔba tia Heboroniɔ. 12Abinɛɛ, Nɛrin bii ka Isi Bosɛtin tabu kowobu ba yara saa Mahanaimun di ba da Gabaoniɔ. 13Yera Yoabu Seruyan bii, Dafidin tabu sunɔ ka win tabu kowobu ba maa da Gabaoni mi. Ma ba yinna daa burerɔ ka Isi Bosɛtin tabu kowo be, ka Abinɛɛ wi. Ma daa te, ta bu buranɛ. Dafidi ka wigibu ba wãa guru gee. Ma Isi Bosɛtigibu ba maa wãa guru giɔ. 14Abinɛɛ u Yoabu sɔ̃ɔwa u nɛɛ, a de wunɛn aluwaasi beni bu seema bu gabirina ka nɛgibu bɛsɛn wuswaaɔ, ben baawure ka win saro. Kpa su wa wi u kere. Ma Yoabu u nɛɛ, oo, na wura. 15Yera ba seewa ba da ba yinna ben baawure ka win saro Isi Bosɛtin bera gia be ba sãa Bɛnyamɛɛn bweseru, tɔmbu wɔkura yiruwa ba yarima. Dafidin tɔmbu sɔɔ maa, tɔmbu wɔkura yiru. 16Yera aluwaasi be, ba gabirina. Ben baawure u win yibɛrɛn wiru nɛni, ma ba takobi sɔkirina yɛ̃saɔ ba wɔruka sannu sannu ba gbisuka. Yera ba yam mi yĩsiru kã, takobin gberu. 17Yen dɔma te, taa bi, bu swĩa. Ma Dafidin tɔmbu ba Abinɛɛ ka wigibu kamia. 18Dafidin tabu kowo be sɔɔ, Seruyan bibu itawa ba wãa mi. Beya Yoabu ka Abisai ka Asaɛli. Asaɛli u duka mɔwa wi, nge nɛm taakɔ. 19Yera u dɔma te Abinɛɛ naa gira, u ǹ wure u nùn deri baa fiiko. 20Ma Abinɛɛ u sĩira u Asaɛli bikia u nɛɛ, Asaɛli, wuna mi? Ma u wisa u nɛɛ, oo, nɛna mi. 21Yera Abinɛɛ u nɛɛ, a man derio n doona, a ku man swĩi. A nɛn aluwaasiban turo mɛɛrio a mwa kpa a win yãnu wɔra a ka doona. Adama Asaɛli u yina u nùn deri. 22Abinɛɛ u kpam nùn sɔ̃ɔwa u nɛɛ, a dɛsiro nɛn bɔkun di. Domi nà n nun so na go, amɔna nɛ ka wunɛn mɔɔ Yoabu sa ko n mɛɛrinɛ. 23Adama Asaɛli u yina u nùn deri. Yera Abinɛɛ u ka nùn yaasan koru sɔka nukurɔ ma ya yara win biruɔ. Ma u wɔruma yande u gu. Wi u tunuma mi Asaɛlin goo te, ta kpĩ, u ra gina yɔ̃rewa. 24Ma Yoabu ka Abisai ba Abinɛɛ naa gira. Ye sɔ̃ɔ u duɔ yera ba tura Aman gungurɔ te ta wãa Giasin deedeeru Gabaonin swaaɔ mi gãanu ku ra kpin bera gia. 25Bɛnyamɛɛgibu ba mɛnna ba ka Abinɛɛ yɔ̃ra. Ma ba da ba yɔɔwa guuru garun wɔllɔ. 26Yera Abinɛɛ u Yoabu soka u nùn sɔ̃ɔwa u nɛɛ, saa yerà kaa wunɛgibu sɔ̃ bu ku maa ben mɛro bisibu naa swĩi. Kaa de sa n tabu mɔ̀wa sere ka tɛ̃? A ǹ yɛ̃ ma bin wii goberu, nisina ta koo ma? 27Yoabu u nùn wisa u nɛɛ, ka Yinni Gusunɔn wãaru, à kun daa yeni gerua, sere sia burura nɛn tɔmba koo raa tabu yɔ̃ra. 28Ma u kɔba so. Yera tɔn be kpuro ba tabu yɔ̃ra ba Isireliba deri. 29Abinɛɛ ka wigibu ba sĩawa wɔ̃ku giriru Yuudɛnin wɔwaɔ, ma ba Yuudɛni tɔbura ba Bitoroni bukiana ma ba tura Mahanaimuɔ. 30Ma Yoabu u Abinɛɛ deri u doona. Yera win tii u gɔsirama u win tabu kowobu mɛnna u gara. Ma u deema Dafidin tɔn be sɔɔ, tɔmbu yɛndu tia sariwa ba go, ka sere maa Asaɛli. 31Adama Dafidin tɔmbu ba Bɛnyamɛɛba ka Abinɛɛn tabu kowobu gabu gowa tɔmbu gooba wunɔbu ka wata (360). 32Ma ba da ba Asaɛlin goru sua ba sikua win tundon sikirɔ Bɛtelehɛmuɔ. Yoabu ka win tɔmbu ba dɔma te sĩawa wɔ̃ku giriru. Sanam mɛ ba Heboroni duɔ, yera yam mu n sãramɔ.

will be added

X\