Samuɛli II 17

1Yen biru Ahitofɛli u Abusalɔmu sɔ̃ɔwa u nɛɛ, a de n tɔmbu nɔrɔbun suba wɔkura yiru (12.000) gɔsi kpa n Dafidi naa swĩi wɔ̃ku te. 2Saa ye sɔɔ, u ko n wasire, u ǹ ko n maa dam gam mɔ, kpa n nùn nare. Win tɔmbu bà n yarina ba nùn deri wi turo, kpa n nùn sɛ̃re n go. 3Mɛsuma kon ko Isireliba kpuro bu ka wurama wunɛn mi. Domi wi a kasu mi, sà n nùn nɔma tura, be kpuro ba koo wurama wunɛn mi, kpa ba n wãa bɔri yɛndu sɔɔ. 4Ma gari yi, yi Abusalɔmu ka Isireliban guro gurobu kpuro dore. 5Adama Abusalɔmu u nɛɛ, bu Usai Aakigii sokuma kpa bu maa nɔ ye win tii koo gere. 6Ye Usai u tunuma Abusalɔmun mi, ma Abusalɔmu u nùn sɔ̃ɔwa u nɛɛ, amɛniwa Ahitofɛli u gerua. Ya nun wɛ̃re su ko mɛ? Nge amɔna a wa. 7Usai u nɛɛ, Ahitofɛlin bwisi yi u nun kɛ̃mɔ mini gisɔ, yi ǹ bwisi gee. 8Wunɛn tii, a wunɛn tundo ka win tɔmbu yɛ̃ ma ba sãawa tabu durɔbu. Ba kɔ̃ruawa nge gbeeku yaa gɔba ye ba binu mwaari. Yen biru a yɛ̃ ma wunɛn tundo wi, u sãawa tabun saria yɛ̃ro. U ǹ wuramɔ u kpuna ka tɔn be sannu. 9Wee à n da tɛ̃, u kukua kpee wɔru gagu sɔɔ, ǹ kun mɛ yam gam. Win tɔmbu bà n gbia ba sun wɔri, ma ba bɛsɛn gabu go, wi u ye nua, u koo nɛɛ, wee, ba Abusalɔmun tɔmbu go go. 10Saa ye sɔɔ, bɛsɛn suunu sɔɔ, baa goo ù n sãa tabu durɔ, ma u wɔrugɔru mɔ nge gbee sunɔ, yɛ̃ro koo bɛrum duura. Domi Isireliba kpuro ba yɛ̃ ma wunɛn tundo u sãa tabu durɔ. Mɛya u maa tabu kowo damgibu mɔ. 11Bwisi yi na mɔ kon nun kɛ̃ wee. A de Isireliba kpuro be ba wãa Danun di sere ka Beri Sebaɔ bu mɛnna ba n dabi nge yani sɛɛri nim wɔ̃kun goorɔ kpa wunɛn tii a n bu gbiiye i ka taa bi da. 12Kpa su bu wɔri subaru sɔɔ mi ba gesi wãa su bu wukiri mam mam nge mɛ dirum mu ra yakasu wukiri. Sà n kua mɛ, ben goo kun kisiramɔ baa sunɔn tii. 13Bà n dua wuu gagu sɔɔ ba kukua, Isireliba kpuro ba koo wuu ge wɔri bu gen gani wɛ̃ɛ sɔ̃re bu gawa bu suriri kpa bu gen kpenu gura bu da bu sure wɔwa sɔɔ. Baa gen kpee teera kun tiaramɔ. 14Ma Abusalɔmu ka win tɔmbu ba nɛɛ, Usai Aakigiin bwisi yi, yi Ahitofɛligii kere. N deema Yinni Gusunɔwa u kĩ u Ahitofɛlin bwisi gee yi sĩiya kpa kɔ̃sa yu Abusalɔmu deema. 15Yera Usai u da u Sadɔku ka Abiataa yãku kowo be sɔ̃ɔwa u nɛɛ, mɛni ka mɛniwa Ahitofɛli u Abusalɔmu ka Isireliban guro gurobu bwisi kã. Ma nɛ, na maa bu sɔ̃ɔwa mɛni ka mɛni. 16Yen sɔ̃, a goo gɔrio tɛ̃ Dafidin mi, u nùn sɔ̃ u ku raa kpuna daa ten tɔbura yerɔ gbaburu mi, wɔ̃ku te. U tɔburo u doona ka win tɔmbu kpa bu ku raa bu nɔma turi bu go. 17N deema saa ye sɔɔ, Yonatam ka Akimasi ba wãa Eni Rogɛliɔ domi ba ǹ kãkɔ bu du wuuɔ goo u bu wa. Yen sɔ̃na ba ra wɔndia goo gɔri ben mi, u bu sɔ̃ kpuro ye ya kooramɔ, kpa be maa bu da bu Dafidi sina boko sɔ̃. 18Adama sɔ̃ɔ teeru, aluwaasi goo u bu wa ma u da u Abusalɔmu sɔ̃ɔwa. Yen sɔ̃na ba seewa fuuku fuuku, ba yakura ba da durɔ goon yɛnuɔ Bahurimuɔ. N deema durɔ wi, u dɔkɔ mɔ win yɛnu yaaraɔ. Ma ba dua ye sɔɔ ba kukua. 19Yera durɔ win kurɔ u bekuru garu sua u ka dɔkɔ ye wukiri ma u dobi yi ba sura tɛria ten wɔllɔ kpa bu ku ka gia ma ba wãa mi. 20Ye Abusalɔmun bwãaba da yɛnu mi, yera ba kurɔ wi bikia ba nɛɛ, mana Akimasi ka Yonatam ba wãa. Ma kurɔ wi, u bu wisa u nɛɛ, ba daa piibu geni tɔbura ba doona. Ba bu kasu kasu ba ǹ wa. Ma ba gɔsira Yerusalɛmuɔ. 21Ye ba doona ba kpa, yera Yonatam ka Akimasi ba yarima dɔkɔ yen min di, ba da ba Dafidi gari yi sɔ̃ɔwa ba nɛɛ, u seewo fuuku ka win tɔmbu bu daa te tɔbura bu doona. Domi amɛniwa Ahitofɛli u Abusalɔmu bwisi kã win sɔ̃. 22Ye Dafidi u gari yi nua, ma u seewa ka win tɔmbu u Yuudɛnin daa te tɔbura. Be kpurowa ba doona yam mu sere sãra. 23Ye Ahitofɛli u wa ba ǹ ka win gari sɔmburu kue, yera u win kɛtɛku gaari bɔkua u sĩa win wuuɔ, u da win tiin yɛnuɔ u win yɛnugibu saaria kpuro mɛ ba koo koosina. Yen biru u win tii soora doke u gu. Ma ba nùn sikua win baaban sikirɔ. 24Ye Dafidi u tura Mahanaimuɔ, saa yera, Abusalɔmu u Yuudɛnin daaru tɔburama, wi ka win tɔmbu kpuro. 25U Amasa kua win tabu sunɔ Yoabun ayerɔ. Amasan tundon yĩsira Yitira, Isireli. Win mɛrowa Abigali, Nakasin bii. Wi ka Seruya, Yoabun mɛro ba sãawa mɔɔ ka wɔnɔ. 26Abusalɔmu ka win tɔmbu ba ben sansani girawa Galadin temɔ. 27Saa yè sɔɔ Dafidi u wãa Mahanaimuɔ, yera Sobi, Nakasin bii, wi u sãa Amɔniban bweseru saa Raban di, ka Makiri Amiɛlin bii saa Lodebaan di, ka Baasilai, Galadigii, saa Rogɛlimun di, 28ba ka Dafidi kpin yenu naawa ka gbɛ̃ɛ basilaba, ka wekenu, ka maa dĩanu. Niya alikama ka ɔɔsu, ka som, ka gbere wɔ̃ɔranu ka swii ka dãsi ka sɔ̃ki yi ba sɔnwa, 29ka tim, ka naa bogum ka yãa yaa, ka gasanu. Domi ba nɛɛ, gɔ̃ɔru ka nim nɔru ka wasiraru, ya ko n tɔn be wahala koomɛ gbaburun di.

will be added

X\