Samuɛli II 16

1Saa ye Dafidi u saram wee, u guu ten wii kpiiru deri kese, yera Siba, Mɛfibosɛtin sɔm kowo u kurama Dafidin wuswaaɔ ka kɛtɛkunu yiru ni u pɛ̃ɛ goobu (200) sɔbi ka resɛm swaanu wunɔbu (100) ka maa dãa binu ganun swaanu wunɔbu ka sere tam mɛ ba doke gɔnan bɔɔ bakaru sɔɔ. 2Ma sina boko u Siba bikia u nɛɛ, mba yeniba. Ma Siba u nùn wisa u nɛɛ, yinni, kɛtɛku nini, nu sãawa ni wunɛn yɛnugibu ba koo sɔni. Pɛ̃ɛ yeni ka dãa bii nini, ya sãawa ye wunɛn tabu kowobu ba koo di. Be ba maa wasira gbaburɔ, tam mɛniwa ba koo nɔ, kpa bu dam wa. 3Sina boko u kpam bikia u nɛɛ, Mɛfibosɛti wunɛn yinnin debubu maa ni? Ma Siba u nɛɛ, u wãa Yerusalɛmuɔ. Domi u nɛɛ, gisɔra Isireliba ba koo nùn win debun bandu wesia. 4Sina boko u nùn sɔ̃ɔwa u nɛɛ, tɛ̃, ye Mɛfibosɛti u raa mɔ, ya kua wunɛgia. Ma Siba u kpuna u nùn bɛɛrɛ wɛ̃ u nɛɛ, na siara, yinni, ye a ka man durom mɛni kua. 5- 6Ye sina boko Dafidi u tunuma Bahurimuɔ, yera Sɔɔlun dusi goo wi ba mɔ̀ Simɛi, Geran bii, u yarima wuu gen min di, u kpenu sua u Dafidi ka win sina asakpɔbu kasukumɔ, baa mɛ Dafidin tabu durɔbu ka win tɔmbu ba wãa win nɔm geuɔ ka win nɔm dwarɔ. Ma u nùn wɔmmɔ, 7u mɔ̀, a doonɔ, a doonɔ, tɔn gowo wunɛ, kam wunɛ. 8Gusunɔ u nun mɔru kɔsie, ma u ban te sua u wunɛn bii Abusalɔmu nɔmu bɛria yèn sɔ̃ a Sɔɔlun yɛnugibu go ma a bandu di win ayerɔ. Wee tɛ̃, a wɔnwɔndu soore, mɛya n maa ka nun wã, domi wunɛ tɔn gowowa. 9Yera Abisai, Seruyan bii, u sina boko sɔ̃ɔwa u nɛɛ, yinni, mban sɔ̃na bɔ̃ɔ goo teni ta ka nun wɔmmɔ mɛ. A de n da n nùn wiru bura. 10Ma Dafidi u nɛɛ, ya ǹ bɛɛ wa, bɛɛ Seruyan bibu. Durɔ wi, ù n man wɔmmɔ yèn sɔ̃ Yinni Gusunɔ u nɛɛ u ko mɛ, wara koo nùn yinari. 11Ma u Abisai ka win bwãabu kpuro sɔ̃ɔwa u nɛɛ, wee, nɛn tiin bii wi na mara, u kĩ u man go. Kaa sere gere Bɛnyamɛɛ wini? Ǹ n mɛn na, i de u man wɔmɛ, Yinni Gusunɔ ù n nùn sɔ̃ɔwa mɛ. 12Sɔrɔkudo Yinni Gusunɔ u koo nɛn wɔnwɔndu wa kpa u kɔ̃sa ye gɔsia gea. 13Ye Dafidi u seewa u win swaa wɔri u doonɔ ka win tɔmbu, yera Simɛi u sĩimɔ guu ten yɛ̃saɔ u bu bɛwe u bu kpenu kasukumɔ, u bu yanim wisimɔ, u Dafidi wɔnsimɔ. 14Ye sina boko ka win tɔn be, ba tura Yuudɛnin daarɔ, ba wasira gem gem. Ma ba wɛ̃ra mi. 15Abusalɔmu u tunuma Yerusalɛmuɔ ka Isireliba dabinu. Ahitofɛli u maa wãa ka be. 16Sanam mɛ Usai Aakigii, Dafidin bɔrɔ u tunuma Abusalɔmun mi, yera u gerua u nɛɛ, sina boko, wunɛn hunde yu dakaa da. 17Ma Abusalɔmu u nùn sɔ̃ɔwa u nɛɛ, mba n kua a ǹ ka wãa wunɛn bɔrɔ Dafidin wuurɔ. Nge mɛya a ka nùn kĩru sɔ̃ɔsimɔ? 18Usai u nùn wisa u nɛɛ, n ǹ mɛn baa. Domi wi Yinni Gusunɔ ka tɔn beni ka Isireliba kpuro ba gɔsa, wigiiwa na sãa. Wiya na kon maa ka yɔ̃ra. 19Yen biru n ǹ wuna win bii? Nge mɛ na raa wunɛn tundo sãwa, nge mɛya kon maa nun sã. 20Yera Abusalɔmu u Ahitofɛli sɔ̃ɔwa u nɛɛ, i wesianɔ sannu kpa i gere ye sa ko ko. 21Ma Ahitofɛli u Abusalɔmu sɔ̃ɔwa u nɛɛ, a doo a ka wunɛn tundon kurɔ be ba sina kpaaru kɔ̃su mi kpuna. Saa ye sɔɔra Isireliba kpuro ba koo gia ma a ka wunɛn tundo wi karanawa mam mam. Kpa be ba ka nun wãa kpuro bu ka nun yɔ̃ra dim dim. 22Ma ba Abusalɔmu kuru gira dii tɛɛra wɔllɔ, ma u ka win tundon kurɔ be mɛnna Isireli ben nɔni biru. 23N deema saa ye sɔɔ, ba ra n Ahitofɛlin gari garisiwa nge Gusunɔn tiin gere. Mɛya Abusalɔmu ka Dafidin tii ba ra n yi garisi.

will be added

X\