Samuɛli II 13

1Yeniban biru, ye ya koora wee. Abusalɔmu, Dafidin bii, u sesu mɔ wi ba sokumɔ Tamaa. Kurɔ burɔn tiiwa u sãa. Yera ben tundo turosi wi ba mɔ̀ Amɔɔ u nùn kĩa too, 2sere kĩi te, ta dera u ǹ maa yɛ̃ ye u mɔ̀. Ma u tii kua barɔ. Adama Tamaa u ǹ gina durɔ yɛ̃, ya maa sɛ̃ Amɔɔ u ka nùn kpuna. 3N deema Amɔɔ u bɔrɔ goo mɔ wi ba sokumɔ Yonadabu. U sãawa Dafidin mɔɔ Saman bii. U maa bwisi mɔ too. 4Ma u Amɔɔ bikia u nɛɛ, mban sɔ̃na a wooramɔ a dɔɔ, wunɛ wi a sãa sina bokon bii. A man sɔ̃ɔwɔ ye n nun mɔ̀. Ma Amɔɔ u nùn sɔ̃ɔwa u nɛɛ, nɛn sesu Tamaawa na kĩ, Abusalɔmun mɛro turosi. 5Ma Yonadabu u nùn sɔ̃ɔwa u nɛɛ, a doo a kpuna kpa a nɛɛ, a barɔwa. Wunɛn tundo, ù n na wunɛn mi, kpa a nùn sɔ̃ a nɛɛ, u de wunɛn sesu Tamaa u na wunɛn mi, u nun dĩanu kua a n waamɔ, kpa a nu mwa win nɔman di a sere di. 6Ma Amɔɔ u da u kpuna u tii bararu mani. Yera sina boko Dafidi u nùn beram na. Ma Amɔɔ u nùn sɔ̃ɔwa u nɛɛ, na nun kanamɔ, a de nɛn sesu Tamaa u na u man kiranu yiru kua na n waamɔ, kpa n nu mwa win nɔman di n di. 7Ma Dafidi u sɔmɔ gɔra Tamaan mi, u nùn sɔ̃ u nɛɛ, u doo u win sesu Amɔɔ deema win dirɔ u nùn dĩanu kua. 8Yera Tamaa u da u Amɔɔ deema diru mi u kpĩ, ma u som sua u bura u kira ni kua Amɔɔn nɔni biru. 9Yen biru u kira weke te sua ma u kira ni gɔsie gbɛ̃ɛru garu sɔɔ. Adama Amɔɔ u yina u di. U nɛɛ, bu tɔmbu kpuro yaro win dirun di. Yera be kpuro ba yara min di. 10Saa yera Amɔɔ u Tamaa sɔ̃ɔwa u nɛɛ, a ka kira ni na dii sɔɔwɔ kpa n nu mwa wunɛn nɔmun di, n sere di. Ma Tamaa u kira ni sua u ka nùn daawa dii sɔɔ mi. 11Ye u nùn kira ni wɛ̃ɛmɔ, yera Amɔɔ u nùn gaba u nɛɛ, a de n ka nun kpuna, nɛn sesu. 12Ma Tamaa u nɛɛ, aawo, a ku man sanku. Domi ba ku ra yen bweseru ko bɛsɛ Isireliba sɔɔ. A ku bɛɛrɛ sari kom mɛ ko. 13À n kua mɛ, mana kon we ka seku ten bweseru. Mɛya wunɛn tii kaa ko bɛɛrɛ sari bɛsɛ Isireliba sɔɔ. Yen sɔ̃, a bɛsɛn tundo sina boko sɔ̃ɔwɔ. U ǹ yinamɔ a man sua kurɔ. 14Adama Amɔɔ kun Tamaan gari yi wure. Ma u nùn tilasi kua u ka nùn kpuna. 15Yen biru Amɔɔ u nùn tusa too n kere kĩi te u raa nùn kĩ. Ma u nùn sɔ̃ɔwa u nɛɛ, a seewo a doona. 16Yera Tamaa u nɛɛ, a ku maa kɔ̃sa sosi kɔ̃sa ye a man kua sɔɔ a n man gire. Adama Amɔɔ u ǹ win gari swaa daki. 17Ma u aluwaasi wi u nùn nɔɔrimɔ soka u nɛɛ, a kurɔ wini giro minin di. A de u yari tɔɔwɔ kpa a gambo kɛnɛ a bɛri. 18Ma Amɔɔn aluwaasi wi, u Tamaa yara u gambo ye kɛnua. N deema yabe nɔnigira Tamaa u sebua. Ten bwesera sina bokon bii wɔndia be ba ǹ durɔ yɛ̃ ba ra sebe. 19Ye Tamaa u yara, yera u tii torom wisi wirɔ ma u win yabe nɔnigii te gĩa u ka win nuku sankiranu sɔ̃ɔsi. U wiru nɔma sɔndi u sumɔ ka dam. 20Yera win sesu Abusalɔmu u na u nùn bikia u nɛɛ, Amɔɔ u ka nun kpuna? Ǹ n mɛn na, a seewo, nɛn sesu, a ku gari yi garisi gɔ̃ruɔ too, domi wunɛn sesuwa. Adama ka mɛ, Tamaan nukura sankira too. Ma u da u wãa Abusalɔmun dirɔ. 21Sina boko Dafidi u ye kpuro nua, yera u mɔru kua. Adama u ǹ Amɔɔ gerusi, yèn sɔ̃ u sãa win bii gbiikoo ma u nùn kĩ too. 22Abusalɔmu kun maa Amɔɔ gãanu sɔ̃ɔwa. Adama u nùn tusa yèn sɔ̃ u win sesu tilasi kua u ka kpuna. 23Wɔ̃ɔ yirun biru, sɔ̃ɔ teeru Abusalɔmu u win yãanun sansu bɔɔrimɔ Baali Hasoriɔ Efaraimun tem bɔkuɔ. Ma u win tundo turosibu sina bokon bibu kpuro dim soka. 24U sere bu dim mɛ soku, u da u sina boko deema u nɛɛ, yinni, wee ba nɛn yãanun sansu bɔɔrimɔ, sa yen tɔ̃ɔ bakaru mɔ̀. Na kĩ wunɛ ka wunɛn bwãabu i na i ka sun di. 25Ma sina boko u nùn wisa u nɛɛ, aawo, nɛn bii, bɛsɛn kpuro kun dɔɔ. Domi sɔmunu koo kpɛ̃a. Ma u nɛɛ, a suuru ko, a de a da ka mɛ. Adama sina boko u yina. Domara u nùn kua. 26Yera u sina boko sɔ̃ɔwa u nɛɛ, a de baa nɛn mɔɔ Amɔɔ u na. Ma sina boko u nɛɛ, mban sɔ̃na a kĩ u na wunɛn mi. 27Abusalɔmu u maa sina boko suuru kana, ma u dera Amɔɔ u da ka sere maa win bii be ba tie kpuro. 28Yera Abusalɔmu u win sɔm kowobu sɔ̃ɔwa u nɛɛ, i n laakari sãa sanam mɛ tam mu koo Amɔɔ go. Saa yera kon bɛɛ sɔ̃ n nɛɛ, i nùn soowo i go. I ku bɛrum ko domi nɛna na bɛɛ wooda wɛ̃ɛmɔ. I de i yɔ̃ra i tɔn durɔ kom sɔ̃ɔsi. 29Ma Abusalɔmun sɔm kowo be, ba Amɔɔ kua nge mɛ u gerua. Yera sina bokon bii be ba tie ben baawure u win kɛtɛku yɔɔwa u duka sua. 30Sanam mɛ ba duki yarina mi, yera Dafidi u nua ma ba win bibu kpuro go, baa ben turo kun tie. 31Ma u seewa u win yaberu nɛnua u karana u kpuna temɔ nuku sankiranun sɔ̃. Mɛya maa win bwãaba kua. 32Yonadabu, Dafidin mɔɔ Saman bii, u gerua u nɛɛ, yinni, a ku nɛɛ, ba wunɛn bibu kpuro go. Domi Amɔɔ tɔnawa u gu. Saa dɔma tèn di u ka Tamaa kpuna ka dam mi, yera Abusalɔmu u ka bwisika u nùn go. 33Yen sɔ̃ tɛ̃, a ku gɔ̃ru doke ma wunɛn bibu kpurowa ba gu. Adama a n yɛ̃ ma Amɔɔ tɔnawa u gu. 34Yen biru Abusalɔmu u duka yakura. Gbãrarun kɔnnɔ kɔ̃so u sĩira u wa wee, tɔn wɔru ga wee win biruɔ guurun bera gian di. Ma u da u sina boko sɔ̃ɔwa ye u wa. 35Ma Yonadabu u nùn sɔ̃ɔwa u nɛɛ, yinni, wunɛn biba. Wee ba wee. N ǹ mɛya na nun sɔ̃ɔwa? 36Sere u ka gari yi gere u kpe, yera sina bokon bii be, ba tunuma. Ma ba wuri wɔri. Sina bokon tii ka win bwãabu ba maa swĩ gem gem. 37- 38N deema saa ye sɔɔ, Abusalɔmu u kpikiru woo Talimai, Amihudun biin mi, wi u sãa Gesurin sina boko. Ma u sina mi, n ka kua wɔ̃ɔ ita. Saa ye kpuro sɔɔ, Dafidi u wãa win sina kpaarɔ u win bii Amɔɔn gɔɔ sumɔ. 39Saa ye Dafidin nukura yɛmia, win mɔru ye u ka Abusalɔmu mɔ̀ ya sure.

will be added

X\