Samuɛli II 11

1Wɔ̃ɔ kpɔɔn saa yè sɔɔ sinambu ba ra tabu yari, yera Dafidi u win bwãabu ka win tabu sunɔ Yoabu ka sere maa Isireliba kpuro gɔra bu da bu Amɔniba go. Kpa bu wuu ge ba mɔ̀ Raba mwa. Adama win tii u ǹ de. U sɔ̃ yɛnuɔ Yerusalɛmuɔ. 2Yera yoka gaa u seewa saa win kitarun di u bɔsu win sina dii tɛɛra wɔllɔ. Min diya u kurɔ goo wa u woburumɔ. Kurɔ wi, kurɔ burɔn tiiwa. 3Yera u gɔra bu kurɔ win asansi bikia. Ba nùn sɔ̃ɔwa ba nɛɛ, wiya ba mɔ̀ Bati Seba, Eliamun bii. U sãawa Uri Hɛtin kurɔ. 4Ma Dafidi u sɔmɔbu gɔra bu nùn sokuma. Ye u na, ma u ka nùn mɛnna. Yen biru kurɔ wi, u dɛɛrasiabun wororu kua, ma u wura win yɛnuɔ. 5Ye u deema wee, n kua gura, ma u Dafidi gɔria bu nùn sɔ̃ wee, u gura mɔ. 6Yera Dafidi u gɔra Yoabun mi, u de Uri Hɛti wi, u na. Ma Yoabu u dera Uri u da Dafidin mi saa tabu gberun di. 7Ye u tura, yera Dafidi u nùn bikia u nɛɛ, Yoabu u bwãa do? Win tɔmbu kpuro ba alafia mɔ? Anna maa tabu gia sãa. 8Yen biru u maa nùn sɔ̃ɔwa u nɛɛ, u doo win yɛnuɔ kpa u win kɔ̃ri tea u wɛ̃ra. Yera Uri u seewa u yara sina kpaarun di. Ma Dafidi u nùn kɛ̃nu mɔrisia yɛnuɔ. 9Adama Uri kun de win yɛnuɔ. U da u kpunawa sina kpaa ten kɔnnɔwɔ ka sunɔn kirukuba sannu. 10Ye ba Dafidi sɔ̃ɔwa ma Uri kun de yɛnuɔ, yera Dafidi u nùn bikia u nɛɛ, n ǹ gbaburun diya a wee ro? Mba n kua a ǹ ka de wunɛn yɛnuɔ. 11Ma Uri u Dafidi sɔ̃ɔwa u nɛɛ, Gusunɔn woodan kpakororu ka Isireliba ka Yudaba ba wãa kunu sɔɔ tabu gberɔ, ka sere nɛn yinni Yoabu. Yera kon da nɛn yɛnuɔ n di kpa n nɔ kpa n ka nɛn kurɔ mɛnna? Sere ka wunɛn wãaru, na ǹ kpɛ̃ n yen bweseru ko. 12Ma Dafidi u nùn sɔ̃ɔwa u nɛɛ, ǹ n mɛn na, a kpam kpunɔ mini gisɔ kpa a doona sia. Ma Uri u sina Yerusalɛmuɔ dɔma te. 13Yera Dafidi u nùn dim soka u dera u di u nɔra sere tam mu nùn go. Adama ye n kua wɔ̃kuru u kpam yara u da u kpuna ka sunɔn kirikuba. U ǹ de win yɛnuɔ. 14Sisiru bururu yera Dafidi u Yoabu tireru yorua u Uri wɛ̃ u ka da. 15Ye u yorua tire te sɔɔ wee. U nɛɛ, bu ka Uri doo mi tabu sum kpa bu yarina bu nùn deri, yibɛrɛba bu nùn sɛ̃re bu go. 16Saa yè sɔɔ Yoabu u tire te gara u kpa, yera u Uri sure mi u yɛ̃ yibɛrɛban tabu durɔ damgiba wãa. Domi wiya u wuu gen saria yɛ̃ ba ka gu tarusi. 17Yera wuu gen tabu durɔ be, ba yarima ba tabu wɔrina ka Yoabu, ma Dafidin tɔmbu sɔɔ dabira wɔruka. Mi sɔɔra Uri Hɛti wi, u gu. 18Ma Yoabu u sɔmɔ wuna u ka nùn gɔri Dafidin mi, u nùn taa bin labaari kpuro sɔ̃. 19Yera u sɔmɔ wi sɔ̃ɔwa u nɛɛ, à n sina boko taa bin baaru kpuro saaria a kpa, 20ma a wa u mɔru bɛsira sere u nun sɔ̃ɔwa u nɛɛ, wara raa nɛɛ, i wuu ge susi i gu tabu wɔri. I ǹ yɛ̃ ma gbãraru wɔllun diya ba ra sɛ̃ɛnu tweemɛ? 21Wara u Abimɛlɛki, Gedeonin bii go. I ǹ yaaye ma tɔn kurɔwa u nùn nɛɛrun bia kara gbãraru wɔllun di ma u gu Tebɛsiɔ? Ǹ n mɛn na, mban sɔ̃na i gbãra te susi. Ù n gerua mɛ, u kpa, saa yera kaa nùn sɔ̃ win bɔ̃ɔ Uri, Hɛti wi, u maa gu. 22Sɔmɔ wi, u seewa u doona. Ye u tura Dafidin mi, u nùn ye kpuro saaria ye Yoabu u nùn sɔ̃ɔwa u gere. 23U nɛɛ, ka gem, tɔn be, ba sun dam kere. Ba raa yarima ba sun deema yakasɔ, ma sa bu gira sa ka da sere ben gbãra kɔnnɔwɔ. 24Yera ben tɛn towobu ba wunɛn bwãabu tweema saa gbãra ten wɔllun di. Sina boko, miya wunɛn bwãabun dabira gu. Mi sɔɔra Uri Hɛti win tii u gu. 25Ma Dafidi u sɔmɔ wi sɔ̃ɔwa u nɛɛ, à n wura, a Yoabu sɔ̃ u ku de yeniba yu win nuki sanku. Domi tabu sɔɔ, takobi yà kun gee go, ya koo giɔ go. Ǹ n mɛn na, u hania koowo u tɔn be wɔri u wuu ge mwa. Wunɛn tii à n tura, a nùn dam kɛ̃ɛyɔ. 26Ye Urin kurɔ wi, u nua ma win durɔ u gu yera u win gɔɔ swĩ. 27Saa ye yen baa ya doona, ma Dafidi u sɔmɔ gɔra ba ka kurɔ wi na win yɛnuɔ u nùn sua kurɔ, ma u nùn bii tɔn durɔ marua. Adama ye Dafidi u kua mi, ya ǹ Yinni Gusunɔ dore.

will be added

X\