Samuɛli II 1

1Ye Dafidi u Amalɛkiba go u wee, yera u yɔ̃ra Sikilagiɔ sɔ̃ɔ yiru. N deema Sɔɔlu u gu kɔ. 2Sɔ̃ɔ itaseru, yera durɔ goo u yarima saa tabu gberun di mi Sɔɔlu u raa wãa. Durɔ win yabera gɛ̃ɛkire ma win wira tua sãa nuku sankiranun sɔ̃. Saa ye u tunuma Dafidin mi, u yiira kurɛ u wiru tem girari. 3Ma Dafidi u nùn bikia u nɛɛ, man diya a wee. Ma u nɛɛ, saa Isireliban tabun sansanin diya na duka suuma. 4Dafidi u kpam nùn bikia u nɛɛ, amɔna gbera sãa. A suuru koowo a man sɔ̃ɔwɔ nge mɛ n koosina kpuro. Ma durɔ wi, u nɛɛ, tabu Isireliba swĩiyɛ ba duki. Ben dabira maa wɔruka ba gu. Mɛya Sɔɔlun tii ka win bii Yonatam ba gu. 5Ma Dafidi u nɛɛ, amɔna a kua a ka yɛ̃ ma Sɔɔlu ka win bii Yonatam ba gu. 6Ma u nɛɛ, na nɛn wãaru wãawa Giliboan guuru wɔllɔ na ka Sɔɔlu mɛɛra u ka tii win yaasa tãsa. Ma yibɛrɛban tabu kɛkɛ dumigii ka maasɔbu ba nùn sɔndi mam mam ba gire. 7Saa ye u sĩira u mɛɛrima biruɔ u man wa, yera u man soka ma na wura na da win mi. 8Ma u man bikia u nɛɛ, nɛ wara. Na nùn wisa na nɛɛ, nɛ Amalɛkiwa. 9Ma u nɛɛ, n susima win bɔkuɔ kpa n nùn go baa mɛ u dam tie u tirekiramɔ. 10Ma na susi win bɔkuɔ na nùn go. Domi na yɛ̃ ma u ǹ maa seemɔ, mi u wɔra mi. Ma na win sina furɔ pota ka win suma ye u doke nɔmaɔ. Yera na ka nun naawa mini, nɛn yinni. 11Ye Dafidi u nua mɛ, yera u win yaberu nɛnua u karana. Ma be ba wãa ka wi, ben tii ba maa kua mɛ bu ka ben nuku sankiranu sɔ̃ɔsi. 12Ma ba gɔɔ wooru sina ba swĩ ba nɔɔ bɔkua sere sɔ̃ɔ u ka kpa Sɔɔlu ka win bii Yonatam sɔ̃, ka sere maa Isireliban sɔ̃, be, Yinni Gusunɔn tɔn be ba go tabu gberɔ. 13Ma Dafidi u durɔ wi bikia u nɛɛ, wuu man diya a na. U wisa u nɛɛ, nɛn baa u yarimawa saa Amalɛkiban tem di sa ka wãa mini. 14- 16Dafidi kpam nùn bikia u nɛɛ, amɔna a ka kãka a wi Yinni Gusunɔ gɔsa nɔma doke a go. Yen sɔ̃, wunɛn yɛm mu yɔ̃ra wunɛn wiru wɔllɔ. Domi wunɛn tiin nɔɔwa ga seeda di ma a wi Yinni Gusunɔ gɔsa go. Saa yera Dafidi u win aluwaasiban turo soka u nɛɛ, a susio a nùn sɛ̃re a go. Ma aluwaasi wi, u Amalɛki wi sɛ̃re u so u go. 17Ma Dafidi u womu geni kua win gɔɔ swĩi sɔɔ Sɔɔlu ka win bii Yonatam sɔ̃. 18Mɛya u maa yiire bu Yudaban bibu womu ge sɔ̃ɔsi. Tɛnda ga tɔmamɔ. Ma ba ge yorua Yasarin tireru sɔɔ. Womu ge wee. 19Isireli, wunɛn yiikogiba wɔruma, wunɛn damgiba kpuna guuru wɔllɔ. 20I ku de bu labaari ye nɔ Gatiɔ. I ku de bu ye kpara Asikalonin wuuɔ. Kpa Filisiti bango sari ben kurɔbu bu ku yɛ̃ɛri. Kpa ben wɔndiaba bu ku nuku dobu ko. 21Bɛɛ Giliboan guunu, Gusunɔ u ku de gura yu nɛ bɛɛn wɔllɔ. Gusunɔ u ku de kakoru tu wɔruma bɛɛn wii kpiirɔ. Gusunɔ u ku de bɛɛn tem mu dĩa geenu ma. Domi miya ba tabu durɔbu funɛ wĩa. Miya ba ben tɛrɛnu kasi kua. Miya Sɔɔlun tɛrɛra gum tɛɛnibu nɔru kua. 22Baa mɛ ba yibɛrɛba waamɔ, baa mɛ ba tabu durɔbun wɔrugɔru waamɔ, Yonatam nɔm wĩira kun dwiiyare ka tɛn tobu. Sɔɔlun takobi kun maa kam wɔrire. 23Sɔɔlu ka Yonatam ba kĩanawa ben wãarun tɔ̃ru kpuro sɔɔ. Ba ǹ karanɛ baa ka gɔɔ sɔɔ. Ba sãu tabu sɔɔ n kere gunɔ bakenu. Ba gbee sinansu dam kere. 24Bɛɛ Isirelin tɔn kurɔbu, Sɔɔlu u ra raa de i beku nɔni swãa burɛginu dewe. Wiya u ra raa de i wuran buranu doke bɛɛn yãnu sɔɔ. I swĩiyɔ win sɔ̃. 25Damgiba wɔruka tabu gberɔ. Yonatam u kpuna Isirelin guunu wɔllɔ. 26Yonatam nɛn kĩnasi, na nuku sankira bakanu mɔ wunɛn sɔ̃. A ra n sãawa gãa bakanu nɛn nɔni sɔɔ. Wunɛn kĩi te a man kĩa ta tɔn kurɔgiru kere. 27Damgiba wɔruka tabu gberɔ. Tabu yãnu nu kam kua.

will be added

X\