Sinambu II 9

1Sɔ̃ɔ teeru Elisee u turo soka Gusunɔn sɔmɔn bwãabun wuurun di u nùn sɔ̃ɔwa u nɛɛ, a sɔɔru koowo kpa a gum kɔba ye sua a ka da Ramɔtiɔ Galadin temɔ. 2À n tura mi, a doo a Yehu wa Yosafatin bii, Nimusin debubu. A nùn wunɔ wigibun suunu sɔɔn di a ka da diru garun mi, bee tia. 3Miya kaa nùn gum tãre u ko sunɔ kpa a nùn sɔ̃ a nɛɛ, amɛniwa Yinni Gusunɔ u gerua. U nɛɛ, u koo nùn ko Isireliban sina boko. Yen biru kpa a gambo kɛnia a duka doona. A ku ra yɔ̃re. 4Ma Gusunɔn sɔmɔ aluwaasi wi, u da Ramɔti mi, Galadin temɔ. 5Ye u tura mi, yera u deema wee, be, tabu sinambu ba mɛnnɛ ba wesianamɔ. Ma u bu sɔ̃ɔwa u nɛɛ, i man isa kuo, na kĩ n ka bɛɛn turo gari ko. Ma Yehu u nùn wisa u nɛɛ, bɛsɛn wara. Ma sɔmɔ wi, u nɛɛ, tabu sunɔ wuna. 6Yera u seewa ba da yɛnuɔ. Ye ba tura dirɔ, ma u nùn gum mɛ tãre wirɔ u nɛɛ, amɛniwa Gusunɔ Isireliban Yinni u gerua. U nɛɛ, wuna u gɔsa a ka ko win tɔmbu Isireliban sina boko. 7Kpa a wunɛn Yinni Akabun bweseru kpuro go. U koo maa de a win sɔmɔbu ka win sɔm kowobu kpuron yɛm mɔɔru mwa Yesabɛlin mi. 8Akabun bweseru kpurowa u koo de a kpeerasia sere ka ben bibɔ. 9Kpa bwese te, tu ko nge mɛ Yeroboamu Nɛbatin biigira kua ka Basa Akiyan biigiru. 10Mɛya ba ǹ maa Yesabɛli sikumɔ, bɔ̃na nu koo win goru tem Yisirɛɛliɔ. Ye Gusunɔn sɔmɔ wi, u gari yi gerua u kpa, yera u gambo kɛnia u duka yakura. 11Yehu u yarima u da u win berusebu deema. Ma ba nùn bikia ba nɛɛ, n ka sere do? Mban sɔ̃na wiiro wini u na wunɛn mi. Ma Yehu u bu wisa u nɛɛ, bɛɛn tii i durɔ wi yɛ̃, i maa yɛ̃ ye u koo kpĩ u gere. 12Adama ba nɛɛ, aawo, sa ǹ yɛ̃. A sun sɔ̃ɔwɔ ye u gerua. Ma Yehu u nɛɛ, amɛni ka amɛniwa u man sɔ̃ɔwa. Yen biru u man gum tãre ma u nɛɛ, Yinni Gusunɔwa u man gɔsa n ka ko Isireliban sina boko. 13Mii mii ba seewa ba ben yãnu potira ba tɛria dii kɔnnɔn yɔɔtia wɔllɔ ba Yehu swĩi mi. Ma ba kɔba soomɔ ba mɔ̀ Yehu u kua sunɔ. 14Saa ye sɔɔ, Yoramu ka Isireliba ba Sirin sina boko Hasaɛli wɔrim da Ramɔtiɔ Galadin temɔ. Yera Yehu Yosafatin bii Nimusin debubu u nùn seesi. 15N deema Yoramu wi, u gina wãa Yisirɛɛliɔ ba nùn nɔɔrimɔ mɛɛra ye u wan sɔ̃ sanam mɛ u tabu mɔ̀ ka Sirin sunɔ wi. Yera Yehu u win tabu sina kpaasibu sɔ̃ɔwa u nɛɛ, ǹ n bɛɛn kĩrun na, i ku de baa bɛɛn tɔn turo u yari u da Yisirɛɛliɔ u sina boko yen labaari sɔ̃. 16Saa yera Yudan sina boko Akasia u maa Yoramu mɛɛrim na win mɛɛra yen sɔ̃. Yera Yehu u win tabu kɛkɛ ye dumi gawe yɔɔwa u maa da mi. 17Ma wuu kɔ̃so u Yehun tabu wuuru wa ta wee. Yera u da u sina boko sɔ̃ɔwa u nɛɛ, na tabu wuuru garu waamɔ ta wee. Ma Yoramu u nɛɛ, a maasɔ goo gɔrio u da u bu bikia u nɛɛ, bɔri yɛndun gariya ba ka sĩimɔ? 18Ma maasɔ wi, u da Yehun mi, u nɛɛ, sina boko u nɛɛ, bɔri yɛndun gariya i ka sĩimɔ? Ma Yehu u nɛɛ, mba n nun wa, a wuro nɛn biruɔ! Yera kɔ̃so wi, u maa da sina bokon mi, u nɛɛ, gɔro wi, u tura tɔn ben mi, adama u ǹ gɔsiramɛ. 19Ma Yoramu u maa dera maasɔ kpao u da. Ye u tura mi, yera u nɛɛ, sina boko u nɛɛ, bɔri yɛndun gariya i ka sĩimɔ? Ma Yehu u nɛɛ, mba n nun wa. A wuro nɛn biruɔ! 20Yera kɔ̃so wi, u maa da sina bokon mi, u nɛɛ, winin tii u tura mi. Adama u ǹ wuramɛ. Tɔn wuu te ta maa wee mi, ta sãawa nge Yehu Nimusin biigiru. Domi wi u tabu kɛkɛ ye kpare u mɔ̀wa nge wiiro. 21Yera Yoramu u nɛɛ, i nɛn tabu kɛkɛ sɔɔru koowo, ma ba ye sɔɔru kua. Yera wi, Yoramu, Isireliban sina boko ka Akasia Yudaban sina boko ba seewa ba dɔɔ bu ka Yehu yinna, ben baawure u wãa win tabu kɛkɛ sɔɔ. Ma ba Yehu deema Nabɔti Yisirɛɛligiin gbaarɔ. 22Saa yè sɔɔ Yoramu u Yehu wa, yera u nùn bikia u nɛɛ, alafiawa a ka sĩimɔ mɛ? Ma Yehu u nɛɛ, amɔna alafia ya ko n ka wãa, domi a dera wunɛn mɛro Yesabɛli u bũnu gasirimɔ u sãamɔ ma u sɔroru mɔ̀. 23Ma Yoramu u biruku yira wura u duka yakura. U nɔɔgiru sua u nɛɛ, kɛ̃sira tunuma, Akasia. 24Saa yera Yehu u win tɛndu sua u Yoramu toba win senun baa sɔɔ. Ma sɛ̃u ga da ga wɔri win woo sɔndɔ. Ma u wɔruma u gu, win tabu kɛkɛ ye sɔɔ. 25- 26Ma Yehu u win tabu sunɔ turo Bidikaa sɔ̃ɔwa u nɛɛ, sanam mɛ sa Akabu swĩi ka dumi a yaaye ye Yinni Gusunɔ u gerua win sɔ̃? U nɛɛ, nge mɛ Akabu u Nabɔti ka win bibun yɛm yari gbaa te sɔɔ, nge mɛya u koo maa de win bweserun yɛm mu yari gbaa te sɔɔ. Yen sɔ̃, a Yoramun goo te suo a kare gbaa ten mi. 27Ye Akasia u wa mɛ, yera u duka sua u da Bɛti Gani gia. Ma Yehu u nùn naa swĩi sere Gurin gungurɔ, Yibileamun bɔkuɔ. Ma u nɛɛ, i nùn tweeyo, ma ba nùn twee ba ka da Mɛgidoɔ. Miya u gu. 28Ma win bwãaba win goru sua ba ka da Yerusalɛmuɔ ba sikua, win baababan sikaɔ, Dafidin wuuɔ. 29N deema Akasia wi, u bandu diwa Yudaɔ Akabun bii Yoramun bandun wɔ̃ɔ wɔkura tiase sɔɔ. 30Yen biruwa Yehu u dua Yisirɛɛliɔ. Ye Yesabɛli u nua mɛ, yera u win wuswaa buraru kua u kiroba doke nɔniɔ. Ma u win wiru yara fɛnɛntin di u ka yam mɛɛra. 31Sanam mɛ Yehu u dua wuuɔ, yera Yesabɛli u nùn sɔ̃ɔwa u nɛɛ, Simiri wi u ra win yinni gon kɔsire, n sere do a ka na mi? 32Ma Yehu u wuswaa seeya fɛnɛnti yen bera gia wɔllɔ u nɛɛ, wara u ka man yɔ̃ra. Ma sina bokon sɔm kowobun wirugibu gabu yiru ǹ kun mɛ ita ba nùn mɛɛrima temɔ. 33Yera u nɛɛ, i Yesabɛli kasa kooma temɔ. Ma ba nùn kasa kua. Yera win yɛm yari gbãraru wɔllɔ, ka maa dumin wɔllɔ. Ma Yehu u nùn yasisi ka tabu kɛkɛ ye dumi gawe. 34Yen biruwa Yehu u dua sina kpaaru mi, ma u di u nɔra. Yera u nɛɛ, i doo i kurɔ kam wi sike domi u sãawa sina bokon bii. 35Ye ba da, yera ba deema win wii koko ka win naasu ka nɔm taranu tɔnawa nu wãa mi, ma ba nu sua ba sikua. 36Ma ba da ba ye Yehu sɔ̃ɔwa, yera u bu wisa u nɛɛ, mɛya Yinni Gusunɔ u raa gerua saa win sɔmɔ Eli Tisibigiin nɔɔn di, ye u nɛɛ, bɔ̃na nu koo Yesabɛlin goru tem Yisirɛɛlin gberɔ. 37Nge mɛya win wasin sukum mu kua taaki Yisirɛɛlin gberɔ. Kpa bu ku raa ka nɛɛ, Yesabɛlin sikira mini.

will be added

X\