Sinambu II 8

1Sɔ̃ɔ teeru Elisee u kurɔ wìn bii u raa seeya gɔrin di mi, sɔ̃ɔwa u nɛɛ, i seewo wunɛ ka wunɛn yɛnugibu i kpikiru su i da mi i ko i kpĩ i n wãa. Domi Yinni Gusunɔ u koo de gɔ̃ɔ bakaru tu du tem mɛ sɔɔ, sere wɔ̃ɔ nɔɔba yiru. 2Ma kurɔ wi, u kua nge mɛ Gusunɔn sɔmɔ wi, u gerua. Ba seewa wi ka win yɛnugii be, ba kpikiru da Filisitiban temɔ. Miya ba sina sere wɔ̃ɔ nɔɔba yiru ye. 3Wɔ̃ɔ nɔɔba yiru yen biruwa kurɔ wi, u gɔsirama win temɔ Isireliɔ. Ma u da u sina boko deema u nùn win yɛnu ka win gbea wesia. 4N deema saa ye sɔɔra sina boko u ka Eliseen bɔ̃ɔ Gehasi gari mɔ̀ u nùn bikiamɔ sɔm maamaaki ye Elisee u kua. 5Sanam mɛ Gehasi u sina boko gari yi saariammɛ nge mɛ Elisee u goru seeya gɔrin di, yera kurɔ wìn bii u seeya mi, u kurama u na sina bokon mi u ka win yɛnu ka win gbea bikia u nùn wesia. Ma Gehasi u nɛɛ, yinni, kurɔ wi wee, ka win bii wì Elisee u seeya mi. 6Yera sina boko u kurɔ wi Eliseen gari bikia. Ma u nùn kpuro saaria. Yen biruwa sina boko u win kiruku turo seeya u nɛɛ, u doo u kurɔ win tem mwa, u nùn wesia ka ye ba raa duuran are kpuro saa mìn di u ka wuu yara, sere n ka girari dɔma te. 7Yen biru Elisee u da Damasiɔ. N deema Bɛni Hadadi Sirin sina boko u barɔ ta kpã. Yera ba nùn sɔ̃ɔwa ba nɛɛ, Gusunɔn sɔmɔ goo u na u wãa wuu mini. 8Yera sina boko wi, u Hasaɛli sɔ̃ɔwa u nɛɛ, a kɛ̃ru suo a n nɛni, kpa a da Gusunɔn sɔmɔ win mi, a nùn sɔ̃ a nɛɛ, u man Gusunɔ bikio nà n kon bɛkura nɛn bara te na barɔ minin di. 9Ma Hasaɛli u da Eliseen mi ka kɛ̃ɛ ni nu sãa Damasin gãa geenu, u nu yooyoosu weeru sɔbi. Ye u tura Eliseen mi, yera u nɛɛ, wunɛn bɔ̃ɔ Sirin sina boko Bɛni Hadadiwa u man gɔrima n be nun bikia ù n koo bɛkura win bara te u barɔ min di. 10Ma Elisee u nùn sɔ̃ɔwa u nɛɛ, a doo a nùn sɔ̃ ma u koo raa bɛkura, adama wee tɛ̃ Yinni Gusunɔ u man sɔ̃ɔsi ma u koo gbi. 11Yera Elisee u Hasaɛli mɛɛra tii, ma u swĩi wɔri. 12Hasaɛli wi, u nùn bikia u nɛɛ, mba n kua a ka sumɔ, nɛn yinni. Ma Elisee u nùn wisa u nɛɛ, na wa kɔ̃sa ye kaa Isireliba kua. Kaa ben wuu si su gbãra damginu mɔ dɔ̃ɔ mɛni, kpa a ben aluwaasiba go ka takobi, kpa a ben bii piiminu nam muku muku, kpa a ben gurigibun nuki bɛsuku. 13Hasaɛli u nùn wisa u nɛɛ, yinni, man diya kon dam bakam mɛnin bweseru wa n ka gãa baka ninin bweseru ko, nɛ wi na ǹ sãa gãanu. Ma Elisee u nùn wisa u nɛɛ, Yinni Gusunɔwa u man sɔ̃ɔsi ma kaa bandu di Siriɔ. 14Saa ye sɔɔra u doona Eliseen min di u da u win yinni Bɛni Hadadi deema. Yera Bɛni Hadadi u nùn bikia u nɛɛ, mba Elisee u nun sɔ̃ɔwa. Ma u nùn wisa u nɛɛ, kaa be bɛkura. 15Ye n kua sisiru, yera Hasaɛli u bekuru kasu te ta sinum mɔ u wasa nimɔ ma u tu sua u ka sina bokon wuswaa wukiri. Ma u gu. Saa ye sɔɔra Hasaɛli u gɔna kɔsire kua. 16Akabu Isireliban sina bokon bii Yoramun bandun wɔ̃ɔ nɔɔbuse sɔɔra, Yosafati Yudaban sina bokon bii Yoramu u bandu di Yudaɔ. 17Yosafatin bii Yoramu wi, u mɔwa wɔ̃ɔ tɛna ka yiru sanam mɛ u ban te di Yerusalɛmuɔ. U kuawa wɔ̃ɔ nɔɔba ita ban te sɔɔ. 18Ma u kɔ̃sa kua Yinni Gusunɔn nɔni sɔɔ. U Isireliban sinambun yira swĩi, nge mɛ Akabun bwesera kua. Domi Akabun biiwa u sue kurɔ. 19Adama Yinni Gusunɔ u ǹ kĩ u Yudaban bweseru kpeerasia win bɔ̃ɔ Dafidin sɔ̃. Domi u raa nùn nɔɔ mwɛɛru kua ma win bibun bwesera ta ko n wãa ban te sɔɔ sere ka baadommaɔ. 20Yoramun waati ye sɔɔra Edɔmuba ba Yudaba seesi. Ma ba ben tii sunɔ kua. 21Sɔ̃ɔ teeru yera Yoramu u seewa u da Sairiɔ ka win tabu kɛkɛ yi dumi gawe. Ye n kua wɔ̃ku suunu, yera u Edɔmu be wɔri be ba nùn tarusi mi, ka ben tabu sinambu ka sere be ba tabu kɛkɛba kpare. Adama Yudaba kpuro ba duki yakikira, ba da ben yɛnusɔ. 22Saa dɔma ten diya Edɔmuba ba ka tii yina Yudaban min di sere ka gisɔn gisɔ. Saa tia ye sɔɔra Libinagibun tii ba maa Yudaba seesi. 23Ye Yoramu u kuan sukum mu yorua Yudaban sinambun faagin tireru sɔɔ. 24Yen biruwa Yoramu u kpuna u gu. Ma ba nùn sikua win baababan sikaɔ Dafidin wuuɔ. Ma win bii Akasia u gɔna kɔsire kua. 25Yoramu, Akabun bii, wi u sãa Isireliban sina boko, win bandun wɔ̃ɔ wɔkura yiruse sɔɔra Akasia Yoramun bii u bandu di Yudaban mi. 26Akasia u mɔwa wɔ̃ɔ yɛnda yiru saa yè sɔɔ u ban te di. Ma u kua wɔ̃ɔ tia ban te sɔɔ Yerusalɛmuɔ. Win mɛron yĩsira Atali Isireliban sina boko Omirin bii. 27Adama kɔ̃sa u kua Yinni Gusunɔn wuswaaɔ nge mɛ Akabun bwesera kua, yèn sɔ̃ u Akabun debubu sue kurɔ. 28Yera wi ka Yoramu Akabun bii ba da ba Hasaɛli Sirin sina boko tabu wɔri Ramɔtiɔ Galadin temɔ. Ma Sirigii be, ba Yoramu mɛɛra kua. 29Saa ye sɔɔra Yoramu u gɔsira Yisirɛɛliɔ u ka win mɛɛra yen tim ko. Yen biru Akasia Yudaban sina boko u na mi, u ka nùn tɔbiri win mɛɛra yen sɔ̃.

will be added

X\