Sinambu II 3

1Yosafati Yudaban sina bokon bandun wɔ̃ɔ yɛndu yiru sarise sɔɔra, Yoramu Akabun bii u bandu di Isireliba sɔɔ, Samariɔ. U kuawa wɔ̃ɔ wɔkura yiru ban te sɔɔ. 2Ma u kɔ̃sa kua Yinni Gusunɔn wuswaaɔ. Adama ya ǹ win tundo ka win mɛrogia tura. Domi u bũu wi ba mɔ̀ Baalin bwãarokunu kɔsuka ye win tundo u raa kua. 3Yeroboamu Nɛbatin bii wi u Isireliba doke toraru sɔɔn yira u swĩi mam mam. 4N deema Mɛsa, Mɔabuban sina boko, yaa sabenun sɔmbura u ra ko. Mɛya Isireliba ba ra nùn mɔɔru mwaari. Mɔɔ tera yãa gbiibi nɔrɔbun suba wunɔbu (100.000) ka yãa kinɛnu nɔrɔbun suba wunɔbu, ka sere maa nin sansu. 5Saa yè sɔɔ Akabu u gu, yera Mɔabuban sunɔ wi, u Isireliba seesi. 6Yera sɔ̃ɔ teeru Yoramu u seewa Samarin di u da u Isireliban tabu kowobu kpuro bera. 7Ma u gɔra bu Yosafati Yudaban sina boko sɔ̃ bu nɛɛ, wee, Mɔabun sunɔ u nùn seesi. Yen sɔ̃, wi Yosafati u kĩ u na u ka nùn da bu Mɔabun sunɔ wi wɔri? Ye Yosafati u gari yi nua, u wura u nɛɛ, oo, kon da nɛ ka nɛn tɔmbu, ka maasɔ tabu durɔbu. Domi nɛ ka wunɛ sa sãawa tia. 8Adama u bikia u nɛɛ, swaa yerà sa ko kpe su ka bu wɔri bi da. Ma Yoramu u nɛɛ, bu doo bu nùn sɔ̃ ma ba koo kpewa Edɔmun gbaburu tem mi gãanu ku ra kpi gian di. 9Ma Isireliban sina boko ka Yudaban sina boko ka Edɔmun sina boko ba seewa ba swaa ye wɔri. Ye ba sĩa sɔ̃ɔ nɔɔba yiru yera sinam be, ka ben tabu kowobu ka ben yaa sabe ni ba ka bu swĩi kpuro, ba nim bia bu nɔ. 10Ma Isireliban sina boko u nɔɔgiru sua u nɛɛ, kuukuu! Yinni Gusunɔ, a bɛsɛ sinambu ita yeni sokawa a ka sun Mɔabuba nɔmu bɛria? 11Saa yera Yosafati u nɛɛ, Yinni Gusunɔn sɔmɔ goo sari mini, wìn min di sa ko kpĩ su nɔ ye Yinni Gusunɔ u koo sun sɔ̃? Ma Isireliban sina bokon bɔ̃ɔ turo u nɛɛ, Elisee Safatin bii u wãa mini, wi u raa sãa Elin bɔ̃ɔ. 12Ma Yosafati u nùn bikia u nɛɛ, Yinni Gusunɔ u ra ka nùn gari ko? Ba nɛɛ, oo. Saa yera Isireliban sunɔ ka Yosafati Yudaban sunɔ, ka Edɔmun sunɔ ba seewa ba da Eliseen mi. 13Ma Elisee u Isireliban sunɔ sɔ̃ɔwa u nɛɛ, mba n sun mɔɔsinɛ nɛ ka wunɛ. A doo Gusunɔn sɔmɔ bèn mi wunɛn baa ka wunɛn mɛro ba ra raa bikiaru den mi. Ma Isireliban sina boko u nùn wisa u nɛɛ, aawo, domi Yinni Gusunɔ u bɛsɛ sinambu ita yeni sokawa u ka sun Mɔabuba nɔmu bɛria. 14Yera Elisee u nɛɛ, sere ka Gusunɔ wɔllu ka tem Yinnin wãaru wìn sɔmɔ na sãa, nà kun daa Yosafati Yudaban sina boko mɛɛra, na ǹ daa wunɛn laakari mɔ̀, n sere mam nɛɛ, kon nun mɛɛri. 15Adama tɛ̃, a ka man mɔrɔku sowo naawa. Sanam mɛ mɔrɔku sowo wi, u na u mɔrɔku soomɔ, yera Yinni Gusunɔn dam mu dua Elisee sɔɔ. 16Ma u nɛɛ, ye Yinni Gusunɔ u gerua wee. U nɛɛ, i wɔrusu gbeo wɔwa mini. 17Domi i ǹ woo wasi, i ǹ maa gura wasi. Ka mɛ, wɔwa ye, ya koo nim yibu kpa i nɔ bɛɛ ka bɛɛn tabu kowobu, ka maa sere bɛɛn yaa sabenu. 18Adama yeniba kpuro gãa piimina Yinni Gusunɔn nɔni sɔɔ. Domi u koo Mɔabuba bɛri bɛɛn nɔma sɔɔ. 19Kpa i ben wuu marosu mwɛɛri si su gbãranu mɔ. Kpa i ben dãa gbaanu kpuro mwɛɛri i bɔɔri. Kpa i ben dɔkɔba ka ben bwii kpuro kɔre. Mɛya i ko i maa ben gbee geenu kam koosia i nu kpenu sɛ̃siki. 20Yen sisiru bururu, saa ye ba kĩ bu bururun yãkuru ko, yera ba wa wee, nim mu wee, saa Edɔmun bera gian di, mu tem wukiri. 21Saa ye sɔɔra Mɔabuba ba nua ma sinam be, ba bu wɔrim wee. Yera ba ben tɔmbu kpuro mɛnna be ba tura bu tabu da ka be ba kere mɛ. Ma ba bu yi yi ben tem nɔɔ bura yenɔ. 22Ye Mɔabu be, ba seewa bururu, yera ba wa sɔ̃ɔ yana ballimɔ nim mɛ sɔɔ. Ma mu sɔ̃ri nge yɛm. 23Saa yera ba nɛɛ, yɛma mi, Isireliban sinam be ka ben tabu kowoba ba sɔkirina ba goona. Ǹ n mɛn na, i de su da su ben yãnu gura. 24Ye ba tura Isireliban sansaniɔ, yera Isireliba ba yarima ba bu go go. Ben gaba duki yakikira. Ma Isireliba ba bu naa swĩi sere wuuɔ ba bu go go. 25Ma ba ben wuu marosu kpuro kɔsuka ba ben gbee geenu kpuro kam koosia. Ba nu kpenu sɛ̃siki. Ma ba ben dɔkɔba ka bwii kpuro kɔrua. Ba maa ben dãa gbaanu kpuron dãnu bɔɔra. Yen biru be ba ka kpurantɛɛru tabu mɔ̀, ba wuu ge ba mɔ̀ Kiri Haresɛti wɔri, ba gen gbãraru kɔsuka. 26Ye Mɔabuban sunɔ u wa ma ba nùn tabu kamiawa, yera u tɔmbu nata ka wunɔbu (700) wuna be ba ka takobi tabu yɛ̃, ba swaa kasu bu ka da bu Edɔmun sunɔ wɔri. Adama ba kpana. 27Yera Mɔabuban sunɔ wi, u win yeruma sokusia wi u koo raa nùn kɔsire ko bandu sɔɔ. Ma u nùn mwa u ka yãku dɔ̃ɔ mwaararugiru kua win gbãraru wɔllɔ. Ma ya Isireliba biti kua. Yen sɔ̃na ba gɔsira ba doona ba nùn deri.

will be added

X\