Sinambu II 24

1Yoyakimun waati sɔɔra Nɛbukanɛsaa Babilonin sina boko u Yudaba wɔri u bu taarewa wɔ̃ɔ ita. Yen biru ba nùn seesi bu ka tii yina. 2Adama Yinni Gusunɔ u dera Babilonin tabu kowobu ka Sirigibu, ka Mɔabuba, ka Amɔnigibu, ba Yoyakimu wɔri bu ka Yudaba kpeerasia nge mɛ u gerua saa win sɔmɔbun nɔɔn di. 3U yeni kuawa u ka Yudaba gira win wuswaan di Manasen tora ni u kuan sɔ̃. 4Domi Manase wi, u taarɛ sarirugibun yɛm yari mu koka Yerusalɛmun swɛɛ sɔɔ. Yeni kpuron sɔ̃na Yinni Gusunɔ u ǹ bu suuru kue. 5Ye Yoyakimu u kuan sukum ye kpuron gari yi yorua Yudaban sinambun faagin tireru sɔɔ. 6Yeniban biru u kpuna u gu. Ma ba nùn sika win baababan sikaɔ. Ma win bii Yoyakini u bandu kɔsire kua. 7Egibitin tabu kowobu ba ǹ maa yarire ben tem di. Domi Babilonin sina boko u bu tem mwaari saa Egibitin daarun di sere n ka girari daa te ba mɔ̀ Efaratiɔ. 8Wɔ̃ɔ yɛndu yiru sariwa Yoyakini u mɔ saa ye u bandu di. Win mɛron yĩsira Nɛhusita Ɛlinatani Yerusalɛmugiin bii. 9Yoyakini wi, u ǹ kue dee dee Yinni Gusunɔn wuswaaɔ. Kɔ̃sa u kua mam mam nge mɛ win tundo u raa kua. 10Saa ye sɔɔra Babilonin sina boko Nɛbukanɛsaan tabu kowobu ba na ba Yerusalɛmu wɔri ba ye tarusi. 11Ma wi sina bokon tii u na mi, u bu deema. 12Yera Yoyakini Yudaban sina boko u yara u Nɛbukanɛsaa wi sennɔ da ka win mɛro, ka win bwãabu ka win sina asakpɔbu ka win yɛnun sɔm kowobun wirugibu. Ma Nɛbukanɛsaa u nùn mwa u pirisɔm doke. U yeni kuawa win bandun wɔ̃ɔ nɔɔba itase sɔɔ. 13Ma u sãa yerun arumani gura, ma u ten dendi yãa ni Salomɔɔ u kua ka wura kɔsuka, ma u maa sina kpaarun arumani gura nge mɛ Yinni Gusunɔ u gerua. 14Ma u Yerusalɛmun wirugibu ka ben damgibu gura u ka da ben mi. Ben geera sãawa tɔmbu nɔrɔbun suba wɔkuru (10.000). Ben gaba sãa sekobu gabu maa dãa dãkobu. Bwɛ̃ɛbwɛ̃ɛbu tɔnawa u deri. 15U sina boko Yoyakini ka win mɛro ka win kurɔbu ka win yɛnun sɔm kowobun wirugibu ka tem min damgibu kpuro gura u ka da Babiloniɔ. 16Tabu kowo be u gura ba sãawa tɔmbu nɔrɔbun suba nɔɔba yiru (7.000). Ma nɔman sɔm kowobu ba sãa tɔmbu nɔrɔbu (1.000). Be kpuro ba sãawa tabu durɔ wɔrugɔba. 17Yen biru u Matania kua sunɔ Yoyakinin ayerɔ. Ma u nùn yĩsiru kã Sedesiasi. Matania wi, u sãawa Yoyakinin tundon wɔnɔ. 18Saa ye Sedesiasi u bandu di Yerusalɛmuɔ, u mɔwa wɔ̃ɔ yɛnda tia. Ma u kua wɔ̃ɔ wɔkura tia bandu sɔɔ. Win mɛron yĩsira Hamutali Yeremi Libinagiin bii. 19Sedesiasi wi, u ǹ kue dee dee Yinni Gusunɔn wuswaaɔ. Kɔ̃sa ye Yoyakimu u raa kua, yera win tii u maa kua mam mam. 20Ye kpuro ya koora yèn sɔ̃ Yinni Gusunɔ u ka Yudaba ka Yerusalɛmugibu mɔru kua domi u kĩ u bu fɛ̃ra u kɔ̃. Saa ye sɔɔra Sedesiasi u Babilonin sina boko seesi.

will be added

X\