Sinambu II 22

1Wɔ̃ɔ nɔɔba itawa Yosiasi u mɔ saa ye u bandu di Yerusalɛmuɔ. U kua wɔ̃ɔ tɛna ka ita ban te sɔɔ. Win mɛron yĩsira Yedida, Adaya Bosikatigiin bii. 2Yosiasi wi, u kua ye ya Yinni Gusunɔ wɛ̃re, domi u sĩa win sikado Dafidin yira kpuro sɔɔ, u ǹ yen gaa gɛɛrari. 3Ye Yosiasi u kua wɔ̃ɔ yɛndu yiru sari bandu sɔɔ, yera sɔ̃ɔ teeru u win tire yoro Safani Asalian bii, Mɛsulamun debubu gɔra sãa yerɔ u nɛɛ, 4a doo yãku kowo tɔnwero Hilikiyan mi, a nùn sɔ̃ a nɛɛ, u gobi yi dooru koowo yi ba ka na Yinni Gusunɔn sãa yerɔ yi tɔmba kɔ̃sobu wɛ̃. 5Kpa bu sãa yerun sɔm kowobun wirugibu gobi yi nɔmu bɛria. 6Kpa bu ka yi dãa dãkobu ka banɔbu ka sɔm kowobu kɔsia kpa bu ka dãa dwe ka kpenu ni ba koo ka sãa yee te sɔmɛ. 7Adama bu ku bikia nge mɛ ba ka gobi yi dendisina, domi ba sãawa naanɛgibu. 8Safani u da u Hilikiya gari yi sɔ̃ɔwa. Ma Hilikiya u Safani sɔ̃ɔwa u nɛɛ, na Yinni Gusunɔn woodan tireru wa sãa yerɔ. Ma u nùn tu wɛ̃ u gara. 9Yen biru Safani u gɔsirama u na sina bokon mi, u nùn gɔra tusia. U nɛɛ, wunɛn bwãaba gobi yi sua ba sãa yerun sɔm kowobun wirugibu nɔmu bɛria. 10Ma u maa nɛɛ, tireru garu wee te yãku kowo tɔnwero Hilikiya u man wɛ̃. Ma u tu sina boko garia. 11Saa yè sɔɔ sina boko Yosiasi u tire ten gari nua, yera u win tiin yaberu nɛnua u karana nuku sankiranun sɔ̃. 12Ma u yãku kowo Hilikiya ka Akikamu Safanin bii ka Akabori Miseen bii ka sere Safani win tire yoro ka Asaya win sɔm kowo sɔ̃ɔwa u nɛɛ, 13i doo i Yinni Gusunɔ bikia ye tire tenin gari gerumɔ nɛ ka nɛn tɔmbu Yudaban sɔ̃. Domi mɔru ye Yinni Gusunɔ u ka sun mɔ̀ ya kpã, yèn sɔ̃ bɛsɛn baababa ba ǹ tire ten gari swaa sue bu sere ko nge mɛ ta gerua. 14Ma yãku kowo Hilikiya ka Akikamu ka Akabori ka Safani ka Asaya ba da ba Gusunɔn sɔmɔ Huluda wa Yerusalɛmun wɔɔ bera kpaaɔ. Huluda win durɔwa Salumu Tikifan bii, Harasin debubu. Salumu wiya u ra yãku kowobun yabenu bere. Ye ba tura mi, yera ba Huluda gari yi sɔ̃ɔwa. 15Ma u bu wisa u nɛɛ, amɛniwa Gusunɔ Isireliban Yinni u gerua. U nɛɛ, i durɔ wi u bɛɛ gɔrima sɔ̃ɔwɔ i nɛɛ, 16amɛniwa Yinni Gusunɔ u gerua. U nɛɛ, u koo de kɔ̃sa yu na Yerusalɛmuɔ kpa yu min tɔmbu deema nge mɛ tire ten gari yi gerua te wi Yudaban sina boko u gara. 17Domi ba wi Yinni Gusunɔ deri, ma ba bũnu turare dɔ̃ɔ dokeammɛ bu ka win mɔru seeya ka ben kookoosu kpuro. Yen sɔ̃ tɛ̃, u ka Yerusalɛmugibu mɔru mɔ̀, ya ǹ maa suremɔ. 18Adama Yudaban sunɔ wi u bɛɛ gɔrima, i nùn sɔ̃ɔwɔ i nɛɛ, amɛniwa Gusunɔ Isireliban Yinni u gerua win wooda ye u garan sɔ̃. U nɛɛ, 19yèn sɔ̃ wi, sina boko u nua Yerusalɛmugibu ba koo kɔ̃sa wa, bu nuki sankira kpa bu bu gɛm, ma gari yi, yi wi sina bokon gɔ̃ru so, ma u tii kawa Yinni Gusunɔn wuswaaɔ u swĩ, u win yaberu nɛnua u karana, 20yen sɔ̃na u koo de wi, sina boko u gbi bɔri yɛndu sɔɔ kpa bu nùn sike win baababan sikaɔ. Win nɔni kun maa kɔ̃sa ye wasi, ye ya koo Yerusalɛmu deema. Ma tɔn be, ba gɔsirama ba sina boko gari yi kpuro sɔ̃ɔwa.

will be added

X\