Sinambu II 20

1Saa ye sɔɔ, Esekiasi u bara sere u gɔɔ turuku kua. Ma Gusunɔn sɔmɔ Esai Amɔtin bii u na win mi. U nùn sɔ̃ɔwa u nɛɛ, amɛniwa Yinni Gusunɔ u gerua. U nɛɛ, a wunɛn yɛnugibu sɔ̃ɔwɔ ye baawure ko n da ko wunɛn biru. Domi kaa gbi. 2Yera Esekiasi u win wuswaa sĩiya u gana girari ma u kanaru kua u nɛɛ, 3Yinni Gusunɔ, a suuru koowo, a yaayo ma na sĩa dee dee wunɛn wuswaaɔ. Na wunɛn woodaba mɛm nɔɔwa. Na maa kua ye n nun wɛ̃re. Yen biru u swĩ gem gem. 4Sanam mɛ Esai u yariɔ sina kpaaru min di, yera Yinni Gusunɔ u ka nùn gari kua u nɛɛ, 5a gɔsiro a ka Esekiasi nɛn tɔmbun kparo sɔ̃ a nɛɛ, amɛniwa nɛ, Yinni Gusunɔ na gerua, nɛ wi na sãa bɛɛn baaba Dafidin Yinni. Na nɛɛ, na win kanaru mwa, na maa win nɔni yĩresu wa. Wee, kon de u bɛkura. Yen biru sɔ̃ɔ itase u koo da nɛ, Yinni Gusunɔn sãa yerɔ. 6Kon maa win wãarun tɔ̃ru sosi wɔ̃ɔ wɔkura nɔɔbu kpa n nùn faaba ko n wuu ge wɔra saa Asirin sina bokon nɔman di. Mɛya kon gu kɔ̃su nɛn tiin sɔ̃ ka nɛn sɔm kowo Dafidin sɔ̃. 7Yen biru Esai u nɛɛ, bu dãa ye ba mɔ̀ figien marum suo bu pɛra bu tɛɛni win bara ten wɔllɔ. Ma ba mu pɛra ba tɛɛni ma u bɛkura. 8N deema Esekiasi u raa Esai bikia u nɛɛ, mba n ko n sãa yĩreru te ta koo nùn sɔ̃ɔsi ma u koo bɛkura kpa u da Yinni Gusunɔn sãa yerɔ yen sɔ̃ɔ itaseru. 9Ma Esai u nùn wisa u nɛɛ, Yinni Gusunɔ u koo win gari yibia yìn nɔɔ mwɛɛru u kua. Yɔɔtian tiro ga koo kesi sere naa dabusanu wɔkuru sɔ̃ɔ ù n kɛlla. A kĩ gu kaara? Nge gu sosi. 10Ma Esekiasi u nɛɛ, n ǹ sɛ̃ yɔɔtian tiro gu ka sosi naa dabusanu wɔkuru sɔ̃ɔ ù n kɛlla. Yen sɔ̃, na kĩwa gu kaara. 11Yera Gusunɔn sɔmɔ Esai u Yinni Gusunɔ kana u de gu kaara. Ma Yinni Gusunɔ u dera n koora mɛ. 12Saa ye sɔɔ, Mɛrodaki Baladani, Baladanin bii, Babilonin sina boko u Esekiasi sɔmɔbu gɔria ka tireru ka kɛ̃nu. Domi u nua ma Esekiasi u bara. 13Ye sɔmɔ be, ba tunuma Esekiasin mi, yera u bu dam koosia, ma u ben gari swaa daki ye ba ka sĩimɔ. Yen biru u ka bu da win arumani beru yerɔ. Yera ya sãa sii geesu ka wura ka turare ka gum nubu durorugim ka tabu yãnu. Ye ya gesi sãa win arumani kpuro, yen gaa sari ye u ǹ bu sɔ̃ɔsi. 14Yen biruwa Esai u na u sina boko Esekiasi bikia u nɛɛ, man diya tɔn beni ba nun naawa. Ye ba tunuma, mba ba gerua. Ma Esekiasi u nùn wisa u nɛɛ, ba nawa saa tem tontonden di mɛ ba mɔ̀ Babiloni. 15Esai u kpam nùn bikia u nɛɛ, mba ka mba ba wa wunɛn yɛnuɔ. Ma Esekiasi u nùn wisa u nɛɛ, ye ya wãa nɛn yɛnu ge sɔɔ kpuro, ba wawa. Nɛn arumani sɔɔ gãanu sari ni na ǹ bu sɔ̃ɔsi. 16Yera Esai u nùn sɔ̃ɔwa u nɛɛ, a swaa dakio a nɔ ye Yinni Gusunɔ u gerua. 17U nɛɛ, wee tɔ̃ru gara sisi tè sɔɔ ba koo wunɛn arumani kpuro gura bu ka da Babiloniɔ ka ye wunɛn baababa ba sweena ba nun deria. Yen gaa sari ye ba koo nun deria tɔ̃ɔ te. 18Ba koo wunɛn tiin bweseru sɔɔ bibu mwɛɛri kpa bu ka bu da Babiloniɔ bu bu maatam ko. Kpa bu ko sina bokon sɔm kowobu sina kpaarɔ. 19Yera Esekiasi u Esai wisa u nɛɛ, Yinni Gusunɔn gari yi a gerua mi, gari bura. Domi alafia ka bɔri yɛndu ta ko n wãa nɛn wãarun tɔ̃ru kpuro sɔɔ. 20- 21Yen biru Esekiasi u kpuna u gu, ma ba nùn sika win baababan sikaɔ. Saa yera win bii Manase u bandu kɔsire kua. Ye Esekiasi u kuan sukum ka maa win wɔrugɔru ka nge mɛ u wɔru gba mi nim mu koo sina, ma u mu tori wuna yi ka nim na Yerusalɛmuɔ, ye kpuron gari yi yorua Yudaban sinambun faagin tireru sɔɔ.

will be added

X\