Sinambu II 2

1Ye saa ya tura Yinni Gusunɔ u ka Eli sua wɔllɔ ka woo guna, yera wi ka Elisee ba seewa ba yara Giligalin di. 2Swaa sɔɔ, yera Eli u Elisee sɔ̃ɔwa u nɛɛ, a yɔ̃ro mini, domi Yinni Gusunɔ u man gɔriɔ sere Betɛliɔ. Ma Elisee u nùn wisa u nɛɛ, sere ka Yinni Gusunɔn wãaru ka maa wunɛn tiigiru na ǹ nun derimɔ. Ma ba da Betɛliɔ sannu. 3Yera Gusunɔn sɔmɔn bwãabu gabu, ba yarima ba Elisee sɔ̃ɔwa ba nɛɛ, a yɛ̃ ma gisɔra ba koo nun wunɛn yinni suari? Ma u bu wisa u nɛɛ, oo, na yɛ̃. I bɛɛn nɔsu mario. 4Ye ba maa swaa wɔri ba doonɔ, yera Eli u kpam Elisee sɔ̃ɔwa u nɛɛ, a yɔ̃ro mini. Domi ba man gɔriɔ Yerikoɔ. Elisee u nùn wisa u nɛɛ, sere ka Yinni Gusunɔn wãaru ka maa wunɛn tiigiru na ǹ nun derimɔ. Ma ba da Yeriko mi sannu. 5Ma Gusunɔn sɔmɔn bwãa be ba wãa Yerikoɔ, ba Elisee sɔ̃ɔwa ba nɛɛ, a yɛ̃ ma gisɔra ba koo nun wunɛn yinni suari? Ma u bu wisa u nɛɛ, oo, na yɛ̃. I bɛɛn nɔsu mario. 6Ye ba maa swaa wɔri ba doonɔ, yera Eli u maa nùn sɔ̃ɔwa u nɛɛ, a yɔ̃ro mini, domi Yinni Gusunɔ u man gɔriɔ Yuudɛniɔ. Elisee u nùn wisa u nɛɛ, sere ka Yinni Gusunɔn wãaru ka maa wunɛn tiigiru, na ǹ nun derimɔ. Ma ba swaa wɔri ba n doonɔ. 7Gusunɔn sɔmɔn bwãa ben tɔnu weeraakuru ba na ba yɔ̃ra Yuudɛnin daarun deedeeru, ba dɛsire fiiko. Ma Eli ka Elisee ba da ba yɔ̃ra daa ten goorɔ. 8Yera Eli u win kumbooro pota u gu kurua u ka daa ten nim so. Ma nim mɛ, mu burana mu kua tem dira. Ma be yiru ye, ba tɔbura ba doona. 9Saa ye ba sara ba kpa, Eli u Elisee sɔ̃ɔwa u nɛɛ, mba a kĩ n nun kua bu sere man nun suari. Elisee u nɛɛ, ye na nun kanamɔ yera a de na n wunɛn dam mɛ Gusunɔn Hunde u nun wɛ̃n nɔn yiru mɔ. 10Eli u nùn wisa u nɛɛ, gãa sɛ̃sɔgina a bikia. Adama à n man waamɔ sanam mɛ na suaramɔ wɔllɔ, ya koo koora nge mɛ a kĩ. À kun maa man wa ya ǹ koorɔ. 11Nge mɛ ba faagi mɔ̀ ba ka dɔɔ, yera gãanu ganu na ka dɔ̃ɔ nge tabu kɛkɛ ye dumi gawe ka yen maasɔbu, ma ya bu karana. Ma Eli u suara wɔllɔ ka woo guna. Ma u win kumbooro kɔ̃ temɔ. 12Saa ye Elisee u wa ba ka Eli doona, yera u nɔɔgiru sua wɔllɔ u nɛɛ, nɛn baaba, nɛn baaba, wunɛ wi a sãa Isireliban dam mɛ mu bu kɔ̃su nge ben tabu kɛkɛ dumigii ka yen maasɔbu. Yen biru u ǹ maa nùn wa. Ma Elisee u win tiin yaberu nɛnua u gĩa wasi yiru, nuku sankiranun sɔ̃. 13Ma u kumbooro ge sua ge Eli u kɔ̃ temɔ. Yen biru u gɔsirama u na u yɔ̃ra Yuudɛnin daarun tɔbuɔ. 14Yera u kumbooro ge sua u ka nim mɛ so u nɛɛ, mana a wãa, Gusunɔ, Elin Yinni. Mana a wãa! Ma nim mɛ, mu burana mu kua tem dira. Saa yera u tɔbura. 15Yera Gusunɔn sɔmɔn bwãa be ba na Yerikon di mi, ba nùn wa. Ma ba nɛɛ, Elin dam mu wãa Elisee sɔɔ. Ma ba nùn sennɔ da, ba yiira win wuswaaɔ ba wiru tem girari. 16Yera ba nùn sɔ̃ɔwa ba nɛɛ, bɛsɛ wunɛn bwãabu sɔɔ, tabu durɔbu weeraakuru ba wãa. A de bu da bu nun wunɛn yinni kasuama. Sɔrɔkudo, Yinni Gusunɔ u ko n nùn deri guuru garun wɔllɔ, ǹ kun mɛ wɔwa gaa sɔɔ. Ma Elisee u bu wisa u nɛɛ, i ku de bu da. 17Adama ba nùn bikia ba baasi. Ma u wura u nɛɛ, bu doo. Yera tɔn be, ba da ba Eli kasu sere sɔ̃ɔ ita ba ǹ nùn wa. 18Yen biru ba gɔsirama ba Elisee deema Yerikoɔ. Ma u bu sɔ̃ɔwa u nɛɛ, na ǹ daa bɛɛ sɔ̃ɔwa na nɛɛ, i ku da? 19Sɔ̃ɔ teeru Yerikogibu ba na Eliseen mi, ba nɛɛ, bɛsɛn wuu ge, ga wã nge mɛ wunɛ bɛsɛn yinni a waamɔ. Adama gen nim kun gea sãa. Mɛya mu ku ra de gãanu nu ma, saa tɔmbu sere ka yaa sabenɔ ka dãaɔ. 20Yera u bu sɔ̃ɔwa u nɛɛ, bu gbɛ̃ɛ kpaaru tama bu bɔru doke te sɔɔ. Ma ba ka nùn tu naawa. 21Ma u da daa ten wirɔ, u bɔɔ te doke mi. Yera u nɛɛ, amɛniwa Yinni Gusunɔ u gerua. U nɛɛ, u koo nim mɛ dorasia, mu ǹ maa goo goomɔ, mu ǹ maa yinamɔ gãanu nu ma. 22Ma nim mɛ, mu dora sere ka gisɔn gisɔ nge mɛ Elisee u gerua. 23Saa Yerikon di Elisee u maa da Betɛliɔ. Yera swaa sɔɔ, biba nùn wuremɔ ba mɔ̀, wii kpararugii, a yario minin di. 24Yera Elisee u sĩira biruɔ u bu mɛɛrima ma u bu bɔ̃rusi ka Yinni Gusunɔn yĩsiru. Yera yɛɛ kɔ̃si yiru yi yarima dãa sɔ̃ɔn di yi ben weeru ka yiru sɛ̃suka yi go. 25Saa Betɛli min di, u maa da guu te ba mɔ̀ Kaamɛliɔ. Min diya u gɔsira u da Samariɔ.

will be added

X\