Sinambu II 18

1Osee, Elan bii, Isireliban sina bokon bandun wɔ̃ɔ itase sɔɔra, Esekiasi Akasin bii, Yudaban sina boko u bandu di Yudaɔ. 2U mɔwa wɔ̃ɔ yɛnda nɔɔbu sanam mɛ u ban te di. Ma u kua wɔ̃ɔ tɛna tia sari ban te sɔɔ Yerusalɛmuɔ. Win mɛron yĩsira Abi, Sakarin bii. 3Esekiasi u kua ye ya Yinni Gusunɔ wɛ̃re nge mɛ win sikado Dafidi u kua. 4U gungunu kɔsuka mi ba ra bũu yãkuru ko ka maa nin bwãarokunu. Ma u waa sii gandugia ye bɔɔka ye Mɔwisi u kua. Domi Isireliba ba ra n daamɔ yen nuurɔ ba n turare dɔ̃ɔ dokemɔ. Ba ye yĩsiru kã Nɛhusitani. 5Esekiasi wi, u Gusunɔ naanɛ kua n kere Yudaban sinam be ba nùn gbiiye kpuro ka sere be ba bandu di win biru. 6U ka Gusunɔ yɔ̃rawa dim dim. U ǹ nùn biru kisi baa fiiko. U win woodaba mɛm nɔɔwawa ye u Mɔwisi wɛ̃. 7Gusunɔ u ka nùn wãa. Ma n nùn koorammɛ ye u mɔ̀ kpuro sɔɔ. Saa ye sɔɔ, u Asirin sina boko seesi. Ma u yara win yorun di. 8Yen biru u Filisitiba tabu wɔri u kamia sere u ka da Gasaɔ. Ma u ben tem mwɛɛra ka ben wuu gbãra damgisu ka mi ben kɔ̃sobu ba ra n wãa wãa. 9Esekiasi Yudaban sina boko win bandun wɔ̃ɔ nnɛse sɔɔ, ka maa Osee, Elan bii, Isireliban sina bokon bandun wɔ̃ɔ nɔɔba yiruse sɔɔ, yera Saamanasaa Asirin sina boko ka win tɔmbu ba Samari tarusi wɔ̃ɔ yiru. 10Ma wɔ̃ɔ itaseru ba ye kamia. Saa yera Esekiasi u win bandun wɔ̃ɔ nɔɔba tiase sɔɔ dɔɔ. Ma Osee, Isireliban sina boko u maa wãa win bandun wɔ̃ɔ nɔɔba nnɛse sɔɔ. 11Asirin sina boko u Isireliba gura u ka da win temɔ. Ma u bu yi wuu ge ba sokumɔ Salasiɔ ka Saborin daarun goorɔ Gosanin temɔ ka sere maa Mɛdiban wusɔ. 12Domi Isireli be, ba ǹ Yinni Gusunɔn gere mɛm nɔɔwɛ, ba ǹ maa arukawani ye u ka bu bɔkua wure. Mɛya ba ǹ maa Mɔwisi win sɔm kowo mɛm nɔɔwɛ. 13Esekiasi Yudaban sina bokon bandun wɔ̃ɔ wɔkura nnɛse sɔɔ, yera Asirin sina boko Sankeribu u Yudaban wuu si su gbãranu mɔ kamia. 14Ma Esekiasi u gɔra Lakisiɔ Asirin sina boko win mi u nɛɛ, bu nùn sɔ̃ ma wi Esekiasi u torawa. Ye u maa nùn bikia kpuro u koo ye ko. Yen sɔ̃, u de u doona win tem di. Ma Asirin sina boko wi, u Esekiasi sii geesu kilo nɔrɔbun suba nɔɔba nnɛ (9.000) ka wura kilo nɛnɛ ka wunɔbu (900) bikia. 15Ma Esekiasi u sii gee si su wãa Yinni Gusunɔn sãa yerɔ ka maa si su wãa sina bokon arumani beru yerɔ gura u Asirin sina boko wi wɛ̃, 16ka maa wura ye u raa doke sãa yerun gamboba sɔɔ ka kɔnnɔn dãa sɔɔ. 17Saa Lakisi min diya Asirin sina boko u tabu durɔ damgibu gɔrima ka ben wirugibu ita bu Esekiasi wɔri Yerusalɛmuɔ. Ye tɔn be, ba tura mi, yera ba bura ba yɔ̃ra nim toran bɔkuɔ ye ba kua ya ra ka nim nɛ wuuɔ saa bwian di, mi ba ra beka wɔ̃ken swaaɔ. 18Sanam mɛ sɔɔra ba sina boko sokusia. Adama Eliakimu Hilikiyan bii, sina bokon sɔm kowobun wirugiiwa u da ben mi ka Sebina wi u sãa sina bokon tire yoro ka Yoasi Asafun bii wi u ra tirenu bere. 19Asirin tabu kowobun wirugii ben turo, u bu sɔ̃ɔwa u nɛɛ, i Esekiasi sɔ̃ɔwɔ i nɛɛ, amɛniwa bɛsɛ Asirigibun sina boko wi u kpuro kere u gerua. U nɛɛ, mba u yɔ̃rari u naanɛ sãa mɛ. 20Domi u nɛɛ, u dam mɔ. Ma u bwisi kɛ̃ɔ mɔ u ka tabu ko. Adama gari saarinu tɔnawa. Ǹ n mɛn na, ma sɔɔra win naanɛ ya wãa u ka nùn seesi. 21Geema win naanɛ wãawa Egibitin sunɔn mi, wi u sãa nge kaba te ta kɔsikire. Wi u tu nɛnua u tãsiri kpa tu nùn mura tu mɛɛra ko. Nge mɛya Egibitin sunɔ u sãa be ba nùn yĩiyɔn mi. 22Mɛya i ko i gere i nɛɛ, Gusunɔ bɛɛn Yinniwa i naanɛ sãa. Adama n ǹ win sãa yenu ka yãku yena Esekiasi u kɔsuka? Ma u bɛɛ Yudaba ka Yerusalɛmugibu sɔ̃ɔwa u nɛɛ, i n da de sãa yerɔ, Yerusalɛmuɔ i yãkuru ko mi tɔna? 23Ǹ n mɛn na, u ka nɛn yinni Asirin sina boko arukawani bɔkuo kpa u nùn dumi nɔrɔbun suba yiru (2.000) wɛ̃ ù n yɛ̃ u koo maasɔbu wa bu yi sɔni. 24Domi u ǹ kpɛ̃ u yɔ̃ra u wi u piiburu bo nɛn yinnin tabu kowobu sɔɔ ma, baa mɛ u tamaa Egibitigibu ba koo nùn tabu kɛkɛ yi dumi gawe ka maasɔbu wɛ̃. 25U ǹ yɛ̃ ma ka Yinni Gusunɔn yɛ̃ra u ka tem mɛ wɔrima, kpa u mɛ kɔsuku? Domi Gusunɔn tiiwa u nɛɛ, u doo u tem mɛ wɔri kpa u mu kɔsuku. 26Eliakimu Hilikiyan bii ka Sebina ka Yoasi ba durɔ wi sɔ̃ɔwa ba nɛɛ, a suuru koowo, sa nun kanamɔwa a ka bɛsɛ wunɛn bwãabu gari koowo ka aramum, domi sa mu nɔɔmɔ. A ku ka maa bɛsɛn barum Heberum gari gere, kpa tɔn be ba swaa daki gbãrarun di bu ku nɔ ye sa gerumɔ. 27Adama durɔ wi, u bu wisa u nɛɛ, i tamaa nɛn yinni u man gɔrima bɛɛ ka bɛɛn yinni tɔnan sɔ̃ n ka gari yini gere? Aawo, ka maa be ba sɔ̃ gbãraru wɔllɔn sɔ̃na u man gɔrima. N ǹ maa tɛɛmɔ i ka bɛɛn tiin swaa swĩibu di kpa i bɛɛn yɛ̃kum nɔ ka be sannu. 28Saa ye sɔɔra durɔ wi, u gbãra ka dam ka Yudaban barum u nɛɛ, i bɛsɛ Asirigibun sina boko wi u kpuro keren gari swaa dakio. 29U nɛɛ, i ku de Esekiasi u bɛɛ nɔni wɔ̃ke domi u ǹ kpɛ̃ u bɛɛ wɔra saa win nɔmun di. 30I ku wura i Gusunɔ naanɛ ko baa Esekiasi ù n nɛɛ, Yinni Gusunɔ u koo bɛɛ wɔra, n ǹ koorɔ Asirin sina boko u wuu ge mwa. 31I ku maa nùn swaa daki. Adama i nɔɔwɔ ye Asirin sina boko u gerua. U nɛɛ, i ka nùn nɔɔ tia koowo kpa i nùn tii wɛ̃. Kpa baawure u wa u win tiin resɛmba ka win dãa binu di. Kpa u maa win dɔkɔn nim nɔ. 32Yen biru u koo na u bɛɛ sua u ka da tem gam mɛ mu sãa nge bɛɛn tiin tem mɛ, mi resɛm ka alikama wãa, kpa i n pɛ̃ɛ ka tam mɔ ka tim ka olifin gum. Mɛya i ko i n wãa, ye i ko i raa ka gbi mini. Yen sɔ̃, i ku maa Esekiasin gere swaa daki. Domi u koo bɛɛ nɔni wɔ̃ke u nɛɛ, Yinni Gusunɔ u koo bɛɛ wɔra. 33Bwese ni nu tien bũnu nu ǹ bu wɔre Asirin sina bokon nɔman di. 34Mana Hamati ka Aapadi ka Sefaafaimu ka Hena ka Ifan bũnu nu wãa tɛ̃. Nu kpĩa nu Samarigibu wɔra saa win nɔman di? 35Bũu ni kpuro sɔɔ, nin nirà nu nin tem wɔra saa win nɔman di, bu sere nɛɛ, Yinni Gusunɔ u koo Yerusalɛmu wɔra. 36Ma Yudaba kpuro ba mari, domi sina boko Esekiasi u nɛɛ, bu ku raa nùn gɛɛ wisi. 37Ma Eliakimu Hilikiyan bii, sina bokon sɔm kowobun wirugii wi, ka maa win tire yoro Sebina ka sere Yoasi, Asafun bii wi u ra tirenu bere, ba na Esekiasin mi, ba yabe kĩanu sebua nuku sankiranun sɔ̃. Ma ba nùn durɔ win gari yi kpuro saaria.

will be added

X\