Sinambu II 16

1Peka, Remalian biin bandun wɔ̃ɔ wɔkura nɔɔbuse sɔɔra Akasi, Yotamun bii u bandu di. 2Akasi wi, u mɔwa wɔ̃ɔ yɛndu sanam mɛ u ban te di. Ma u kua wɔ̃ɔ wɔkura nɔɔbu ka tia bandu sɔɔ Yerusalɛmuɔ. Adama kɔ̃sa u kua Yinni Gusunɔn wuswaaɔ. U ǹ kue nge win sikado Dafidi. 3Isireliban sinambun yira u swĩi sere u mam dera ba ka win bii yãkuru kua ba wɔ̃ɔwa nge mɛ bwese tukunu nu ra ko ni Yinni Gusunɔ u nɛɛ bu kpeerasio. 4Mɛya ba ra maa bũu yãkuru ko kpa bu turare dɔ̃ɔ doke gungunu wɔllɔ ka guunu wɔllɔ ka sere maa dãa kubenɔ. 5Yera sɔ̃ɔ teeru Resini, Sirin sina boko ka Peka Remalian bii Isireliban sina boko ba seewa ba Akasi tabu wɔri, ma ba Yerusalɛmu tarusi. Adama ba kpana bu nùn kamia. 6Saa ye sɔɔra Resini u Elati mwa Yudaban nɔman di, ma u bu gira min di. U dera Edɔmuba ba na Elati mi, sere ka gisɔn gisɔ. 7Yera Akasi u Tigilati Pilesɛɛ Asirin sina boko sɔmɔ gɔria u nɛɛ, nɛna Akasi, wunɛn bɔ̃ɔ, a na a man somi, Sirin sina boko ka Isireliban sina bokon sɔ̃ be ba man tabu wɔrima. 8Ma Akasi u sii geesu sua ka wura ye ya wãa Yinni Gusunɔn sãa yerɔ, ka sinambun arumani beru yerɔ. Ma u ye kpuro gura u Asirin sina boko wɛ̃. 9Saa ye sɔɔra Asirin sina boko wi, u Akasin gari yi wura. Ma u da u Damasi wɔri u mwa u gen tɔmbu yoru mwɛɛra u ka da Kiriɔ. Ma u ben sina boko Resini wi mwa u go. 10Ye Akasin tii u da Damasiɔ u ka Tigilati Pilesɛɛ yinna mi, yera u bũu turaru garu wa mi, ma u ten dɛ̃ɛbu ka ten yasum ka ten gunum yĩira u yorua ye ya sãa ten saria kpuro gesi. Ma u ye yãku kowo Uri mɔrisia u nɛɛ, u nùn ten bweseru kuo. 11Ma yãku kowo wi, u bũu tura ten weenasiru kua nge mɛ Akasi u nùn yorua u ko. U tu kuawa Akasi u sere gɔsirama saa Damasin di. 12Ye Akasi u gɔsirama Damasi min di, u bũu tura te wa. 13Ma u susi u yãku dɔ̃ɔ mwaararugiru kua ka ni ba ra ko ka tam ka som ka sere maa siarabun yãkunu. Ma u ten yaa yɛm wisi bũu tura ten wɔllɔ. 14Yãku yee te ba kua ka sii gandu Yinni Gusunɔn sɔ̃ ta wãa Yinni Gusunɔn sãa yerun kɔnnɔ ka yãku yee ten baa sɔɔ. Yera Akasi u Yinni Gusunɔn yãku yee te swɛnyasia u tu yi kpaa ten biruɔ sɔ̃ɔ yɛ̃san nɔm geu gia. 15Ma sina boko Akasi u yãku kowo wi sɔ̃ɔwa u nɛɛ, saa tɛ̃n di, a de a n da bururun yãku dɔ̃ɔ mwaararugiru ko ka yokan yãku te ba ra ko ka som yãku yee kpaa ten mi, ka nɛ sina bokon yãku dɔ̃ɔ mwaararugiru ka yãku ni ba ra ko ka som ka tam ka sere maa yãku ni tɔmba ka naamɔ. Kpa a n da yãku ni ba ka na kpuro gesin yɛm wisi ten wɔllɔ. Adama nɛn tii ko na n da bikiaru ko Yinni Gusunɔn yãku yee te ba kua ka sii gandun mi. 16Ma yãku kowo Uri, u wura ye sina boko Akasi u gerua kpuro. 17Akasi u boo sii gandugii sin sɔwaritii kɔsuka ma u boo sin tii sua. Ma u boo bɔkɔ ge swɛnya nɛɛ yin wɔllun di, yi ba kua ka sii gandu. Ma u gu sɔndi turaru garun wɔllɔ te ba bana ka kpenu. 18Asirin sina bokon nuku dobun sɔ̃, u maa kɔnnɔ gèn min di ba ra ka du Yinni Gusunɔn sãa yerɔ tɔ̃ɔ wɛ̃rarugiru sɔɔ kɔsa, ka sinambun duu yeruguu. 19Ye Akasi u kuan sukum ye kpuron gari yi yorua Yudaban sinambun faagin tireru sɔɔ. 20Sanam mɛ Akasi u kpuna u gu, ba nùn sikua win baababan sikaɔ Dafidin wuuɔ. Ma win bii Esekiasi u gɔna kɔsire kua.

will be added

X\