Sinambu II 15

1Yeroboamu Isireliban sina bokon bandun wɔ̃ɔ tɛna ita sarise sɔɔra Asaria Amasian bii u bandu di Yudaɔ. 2U mɔwa wɔ̃ɔ wɔkura nɔɔbu ka tia sanam mɛ u bandu di. Ma u kua wɔ̃ɔ weeraakuru ka yiru bandu sɔɔ. Win mɛron yĩsira Yekolia, Yerusalɛmugii. 3U kua ye ya wã Yinni Gusunɔn wuswaaɔ nge mɛ win baaba Amasia u kua. 4Adama u ǹ gungunu mi ba ra bũu yãkunu ko, bu turare dɔ̃ɔ doke kɔsuke. Domi tɔmba daamɔ ba yãkunu mɔ̀ mi. 5Yera Yinni Gusunɔ u sina boko wi bara disigiru kpɛ̃ɛ sere u da u ka gu. Ma ba nùn yara ba ka da diru garun mi. U wãa mi wi turo. Ma win bii Yotamu u nùn kɔsire kua u tem mɛ kpare. 6Ye Asaria u kuan sukum mu yorua Yudaban sinambun faagin tireru sɔɔ. 7Sanam mɛ u kpuna u gu, ba nùn sikua win baababan sikaɔ Dafidin wuuɔ. Ma win bii Yotamu u bandu kɔsire kua. 8Asaria Yudaban sina bokon bandun wɔ̃ɔ weeru yiru sarise sɔɔra, Sakari Yeroboamun bii u kua Isireliban sina boko Samariɔ. U kuawa suru nɔɔba tia bandu sɔɔ. 9Kɔ̃sa u kua Yinni Gusunɔn wuswaaɔ, nge mɛ win baababa ba kua. Yeroboamu Nɛbatin biin yira u swĩi, wi, wi u Isireliba doke toraru sɔɔ. 10Sɔ̃ɔ teeru Salumu Yabɛsin bii u nùn seesi u go Yibileamuɔ. Ma u bandu kɔsire kua. 11Ye Sakari u kuan sukum mu yorua Isireliban sinambun faagin tireru sɔɔ. 12Nge mɛya Yinni Gusunɔn gari yi ka koora yi u Yehu sɔ̃ɔwa u nɛɛ, win biba koo bandu diwa sere ka win bibun debuminɔ. 13Asaria Yudaban sina bokon bandun wɔ̃ɔ weeru tia sarise sɔɔra, Salumu u bandu di Samariɔ Isireliba sɔɔ. U kuawa suru tia ban te sɔɔ. 14Sɔ̃ɔ teeru Mɛnahɛmu Gadin bii u seewa Tirisan di u na Samariɔ. Miya u Salumu Yabɛsin bii go. Ma u bandu kɔsire kua. 15Ye Salumu u kuan sukum ka nge mɛ u Sakari seesi u go, ye kpurowa ya yorua Isireliban sinambun faagin tireru sɔɔ. 16Yen biruwa Mɛnahɛmu wi, u wuu ge ba mɔ̀ Tifusaki wɔri. Ma u tɔmbu go saa Tirisan di n ka da Tifusaki mi. U Tifusaki ye wɔriwa ka dam yèn sɔ̃ tɔn be, ba yina u du ben wuuɔ, ma u ben gurigibun nuki bɛsuka. 17Asaria Yudaban sina bokon bandun wɔ̃ɔ weeru tia sarise sɔɔra Mɛnahɛmu Gadin bii u bandu di Isireliɔ. U kuawa wɔ̃ɔ wɔkuru ban te sɔɔ Samariɔ. 18Kɔ̃sa u kua win wãaru kpuro sɔɔ, Yinni Gusunɔn wuswaaɔ. Yeroboamu Nɛbatin biin yira u swĩi wi u Isireliba doke toraru sɔɔ. 19Yen biru Pulu Asirin sina boko u na u Isireliba wɔri. Yera Mɛnahɛmu u nùn sii geesun tɔnnu tɛna wɛ̃ u ka wa u nùn deri kpa u maa win bandu tãsisia. 20Mɛnahɛmu wi, u sii gee si mwɛɛrawa be ba dukia mɔn mi. U ben baawure burewa sii geesun gobi weeraakuru. Ye Asirin sina boko u sii gee si mwa, yera u gɔsira u da win temɔ. 21Ye Mɛnahɛmu u kuan sukum ye kpuron gari yi yorua Isireliban sinambun faagin tireru sɔɔ. 22Sanam mɛ u kpuna u gu, ba nùn sikua win baababan sikaɔ. Ma win bii Pekasia u bandu kɔsire kua. 23Asaria Yudaban sina bokon bandun wɔ̃ɔ weeraakuruse sɔɔra Pekasia Mɛnahɛmun bii, u bandu di Isireliba sɔɔ Samariɔ. Ma u kua wɔ̃ɔ yiru ban te sɔɔ. 24Kɔ̃sa u kua Yinni Gusunɔn wuswaaɔ. Yeroboamu Nɛbatin biin yira u swĩi, wi u Isireliba doke toraru sɔɔ. 25Yera win tabu sunɔ Peka Remalian bii, ka Galadin tabu kowobu weeraakuru ba nùn seesi ba go sina kpaarɔ Samariɔ. Yen biruwa ba maa Aagɔbu ka Arie go. Ma Peka u bandu kɔsire kua. 26Ye Pekasia u kuan sukum ye kpuron gari yi yorua Isireliban sinambun faagin tireru sɔɔ. 27Asaria Yudaban sina bokon bandun wɔ̃ɔ weeraakuru ka yiruse sɔɔra Peka, Remalian bii, u bandu di Isireliba sɔɔ, Samariɔ. U kuawa wɔ̃ɔ yɛndu ban te sɔɔ. 28Kɔ̃sa u kua Yinni Gusunɔn wuswaaɔ. Yeroboamu Nɛbatin biin yira u swĩi wi u Isireliba doke toraru sɔɔ. 29Pekan waati ye sɔɔra Tigilati Pilesɛɛ, Asirin sina boko, u Iyoni mwa ka Abɛli Bɛti Maaka ka Yanɔa, ka Kedɛsi ka Hasori ka Galadi ka Galilen tem ka Nɛfitaliban tem kpuro. Ma u tem mi kpuron tɔmbu mwɛɛra u ka da Asiriɔ. 30Yen biruwa Osee Elan bii, u Isireliban sina boko Peka seesi u go. Ma u bandu di win ayerɔ. N deema Yotamu Asarian biin bandun wɔ̃ɔ yɛndusewa mi. 31Ye Peka u kuan sukum ya yorua Isireliban sinambun faagin tireru sɔɔ. 32Peka, Remalian bii Isireliban sina bokon bandun wɔ̃ɔ yiruse sɔɔra Yotamu, Asarian bii, u bandu di Yudaɔ. 33U mɔwa wɔ̃ɔ yɛnda nɔɔbu sanam mɛ u ban te di. Ma u kua wɔ̃ɔ wɔkura nɔɔbu ka tia ban te sɔɔ. Win mɛron yĩsira Yerusa, Sadɔkun bii. 34Win baaba Asarian yira u swĩi mam mam. U kua ye ya Yinni Gusunɔ wɛ̃re. 35Adama u ǹ gunguu nìn mi ba ra bũu yãkuru ko kɔsuke. Ma tɔmba daamɔ ba yãkunu mɔ̀ mi, ba turare dɔ̃ɔ dokemɔ nin wɔllɔ. Yotamu wiya, u Yinni Gusunɔn sãa yerun kɔnnɔ ge ga mɛɛra sɔ̃ɔ yɛ̃san nɔm geu gia bana. 36Ye Yotamu u kuan sukum mu yorua Yudaban sinambun faagin tireru sɔɔ. 37Win waati ye sɔɔra Yinni Gusunɔ u dera Resini Sirin sina boko ka Peka, Remalian bii Isireliban sina boko ba Yudaba wɔrim torua. 38Sanam mɛ Yotamu u kpuna u gu, ba nùn sikua win baababan sikaɔ Dafidin wuuɔ. Ma win bii Akasi u bandu kɔsire kua.

will be added

X\